كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ اۋعانستان يسلام رەسپۋبليكاسىنىڭ تاۋ-كەن ونەركاسىبى جانە مۇناي ءمينيسترى داۋد شاح سابامەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى.
تاراپتار ەكونوميكالىق جانە گۋمانيتارلىق سالالارداعى ىنتىماقتاستىق ماسەلەلەرىن تالقىلادى.
باقىتجان ساعىنتاەۆ قازاقستاننىڭ پرەزيدەنت موحامماد اشراف عاني مەن اتقارۋشى بيلىك باسشىسى ابدۋللا ابدۋللا باسقاراتىن ۇلتتىق بىرلىك ۇكىمەتىن قولدايتىنىن اتاپ كورسەتتى. ول ەلدىڭ جاڭا باسشىلىعىنىڭ اۋعان حالقىنىڭ ءال-اۋقاتىن جاقسارتۋعا باعىتتالعان تولىققاندى رەفورمالاردى جۇزەگە اسىرا الاتىنىنا ۇمىتتەنەتىنىن جەتكىزدى.
كەزدەسۋگە قاتىسۋشىلار ەكىجاقتى ساۋدانىڭ ۇلعايعانىن اتاپ ءوتتى (2014 جىلدىڭ قورىتىندىسى بويىنشا ەكى ەلدىڭ اراسىنداعى تاۋار اينالىمى 336,7 ملن. دوللاردى قۇراپ, 2013 جىلمەن سالىستىرعاندا ۇشتەن بىردەن استامعا ءوستى), دەگەنمەن, ساۋدا-ەكونوميكالىق ىنتىماقتاستىق الەۋەتىنىڭ ءالى دە سوڭىنا دەيىن اشىلماعانىن تىلگە تيەك ەتتى. وسىلايشا داۋد شاح سابا قازاقستاننىڭ اۋعان تاۋارلارىن جەتكىزۋدى ۇلعايتۋ ءۇشىن قاجەت دەگەننىڭ ءبارىن جاسايتىنىنا سەنىم ءبىلدىردى.
ساۋدا-ەكونوميكالىق ىنتىماقتاستىق جونىندەگى قازاقستان-اۋعان ۇكىمەتارالىق كوميسسياسى ەكىجاقتى ىقپالداستىقتى ۇلعايتۋدىڭ ماڭىزدى تەتىكتەرىنىڭ ءبىرى بولىپ تابىلادى.
گۋمانيتارلىق ىنتىماقتاستىققا قاتىستى پرەمەر-مينيستردىڭ ءبىرىنشى ورىنباسارى قازاقستاننىڭ اۋعان جاستارىنىڭ وكىلدەرى ءۇشىن ءبىلىم بەرۋ باعدارلاماسىن جالعاستىرىپ جاتقانىن اتاپ كورسەتتى. 2010-نان 2020 جىلعا دەيىنگى كەزەڭدە مىڭعا جۋىق اۋعانستاندىق جاس قازاقستاندىق جوو-لاردا ءبىلىم الاتىن بولادى. بۇل باعدارلامانىڭ جالپى قۇنى 50 ملن. اقش دوللارىن قۇرايدى. دەگەنمەن, اۋعان تاراپىنىڭ سۇرانىسىنا سايكەس قازاقستاندا باعدارلامانى ۇزارتۋ ماسەلەسى قاراستىرىلۋدا.
باقىتجان ساعىنتاەۆ سونداي-اق, كەزدەسۋ بارىسىندا قازاقستاننىڭ اۋعانستاندى تۇراقتاندىرۋعا باعىتتالعان حالىقارالىق كۇش-جىگەرگە بەلسەندى قولداۋ بىلدىرەتىنىن جانە ول ەلگە جىل سايىن گۋمانيتارلىق كومەك كورسەتەتىنىن اتاپ ايتتى.
