مەملەكەتتىك حاتشى حالىقارالىق دزيۋدو فەدەراتسياسى پرەزيدەنتىمەن كەزدەستى

استانا. 22 تامىز. مەملەكەتتىك حاتشى گۇلشارا ابدىقالىقوۆا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەرمەن كەزدەستى. بۇل تۋرالى akorda.kz حابارلادى. كەزدەسۋ بارىسىندا قازاقستاننىڭ حالىقارالىق دزيۋدو فەدەراتسياسىمەن اراداعى ءوزارا ءىس-قيمىلىنىڭ وزەكتى ماسەلەلەرى جانە سپورتتىڭ وسى ءتۇرىن رەسپۋبليكامىزدا دامىتۋ پەرسپەكتيۆالارى تالقىلاندى. مەملەكەتتىك حاتشى كەلەسى الەم چەمپيوناتىن وتكىزۋشى ەل رەتىندە قازاقستانعا تاڭداۋ جاساعانى ءۇشىن فەدەراتسياعاا ريزاشىلىعىن ءبىلدىردى. چەمپيونات 2015 جىلعى 24-30 تامىز ارالىعىندا استانادا وتەتىن بولادى. گ.ابدىقالىقوۆا مەملەكەت باسشىسىنىڭ دەنە تاربيەسىنە, بۇقارالىق سپورتقا جانە جوعارى جەتىستىكتەرگە جەتكىزەتىن سپورت تۇرلەرىنە ايرىقشا ءمان بەرەتىنىن اتاپ ءوتتى. بۇگىندە قازاقستاندا حالىقارالىق تالاپتارعا ساي سپورتتىق نىساندار بوي كوتەرىپ, الەمدىك دەڭگەيدەگى سپورت شارالارى وتكىزىلۋدە. دزيۋدو رەسپۋبليكاداعى ەڭ تانىمال سپورت ءتۇرىنىڭ ءبىرى بولىپ سانالادى, ونىمەن 80 مىڭنان استام قازاقستاندىق تۇراقتى اينالىسادى. سپورتشىلاردىڭ شەبەرلىگىن جەتىلدىرۋ ماقساتىندا بارلىق قاجەتتى جاعداي جاسالعان. ماسەلەن, بۇگىندە قازاقستاندا ەلدىڭ قۇراما كوماندالارى جاتتىعۋ شارالارىن وتكىزەتىن, سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى اككرەديتتەگەن 15 سپورتتىق بازا بار. تاۋەلسىزدىك جىلدارى دزيۋدوشىلارىمىز وليمپيادا ويىندارىندا 1 كۇمىس مەدال, الەم چەمپيوناتتارىندا 1 التىن, 2 كۇمىس, 3 قولا مەدال, ازيا ويىندارىندا 1 التىن, 10 كۇمىس جانە 21 قولا, ازيا چەمپيوناتتارىندا 4 التىن, 6 كۇمىس جانە 30 قولا مەدال يەلەندى. الداعى الەم چەمپيوناتىندا قازاقستان سپورتشىلارى جەڭىس تۇعىرىنىڭ جوعارى ورىندارىن يەلەنۋ ءۇشىن سايىسقا تۇسەتىن بولادى. الەمدىك بىرىنشىلىككە دۇنيە ءجۇزىنىڭ 140 ەلىنەن 900-دەن استام سپورتشى قاتىسادى جانە ەرلەر مەن ايەلدەر اراسىندا 7 سالماق دارەجەسى بويىنشا 14 مەدال جيىنتىعى ساراپقا سالىنادى. ايدار ورىسباەۆ. دەرەك, سۋرەت: akorda.kz.