«مەكتەپكە جول» اكتسياسى: وقۋشىلارعا الەۋمەتتىك  كومەك كورسەتىلدى

    وبلىس ورتالىعىنداعى «جاس­تار» ساياباعىندا «مەكتەپكە جول» اكتسياسى ءوتتى. وسكەمەن قا­لا­سى اكىمدىگى مەن ءبىلىم ءبولى­مى ۇيىمداستىرعان اكتسياعا با­لالاردىڭ شىعارماشىلىق ءۇيى مەن ونەر مەكتەبى جانە شىعارماشىلىق ۇجىمدارى, وتباسى مەن بالالاردى قولداۋ ورتالىعى جانە مەملەكەتتىك قۇرىلىمدار وكىلدەرى قاتىستى. اكتسيا اياسىندا وقۋشىلار مەن اتا-انالارعا ارنالعان مەرەكەلىك كونتسەرت, مۋلتفيلم­دەر مەن ەرتەگى كەيىپكەرلەرىنىڭ قاتىسۋىمەن ويىن الاڭى ۇيىم­داستىرىلدى. قالا اكىمدىگى الەۋمەتتىك جاعىنان از قام­تىل­عان وتباسىلاردىڭ بالالارىنا مەكتەپ قۇرالدارى سا­لىن­عان 42 پورتفەل سىيلادى. «بالا­لاردىڭ دوسى» قالالىق قوزعالىسى شەڭبەرىندە بالالارعا كومەك كور­سەتكەن دەمەۋشىلەرگە قۇرمەت كور­سەتىلدى. وسكەمەن قالاسى ءبىلىم ءبولىمى­­نىڭ حابارلاۋىنشا, تامىز ايىنىڭ باسىندا باستالعان «مەكتەپكە جول» رەسپۋبليكالىق اكتسياسىنىڭ العاشقى كەزەڭى اياقتالدى. بۇل كەزەڭدە الەۋمەتتىك جاعى­نان قور­­عالاتىن وتباسىلاردىڭ بالالارىن جاڭا وقۋ جىلىنا دايىنداۋعا كومەك كورسەتۋ بويىنشا اۋقىمدى جۇمىس اتقارىلدى. جالپىعا ءمىن­­­­دەتتى وقۋ قورىنىڭ قارجىسى ەسەبىنەن قالاداعى الەۋمەتتىك تۇرعىدا قورعالاتىن وتباسىلاردىڭ 3937 بالاسىنا, ونىڭ ىشىندە الەۋ­مەت­­تىك جاعىنان از قامتىلعان وتباسىلاردىڭ 3937 بالاسىنا, 493 قامقورلىققا الىنعان, 52 ءمۇم­كىندىگى شەكتەۋلى بالالارعا كومەك كورسەتىلدى. 23 تامىزعا دەيىن مەكتەپ, جەرگىلىكتى ءوزىن-ءوزى باسقارۋ كوميتەتى جانە ازاماتتاردىڭ كۇش-جىگەرىمەن بالالاردى مەكتەپكە دايىنداۋعا كومەك كورسەتۋگە ارنالعان 14 پۋنكت جۇمىس ىستەدى. 1 قىركۇيەكتەن باس­تاپ «مەكتەپكە جول» اكتسياسىنىڭ ەكىنشى كەزەڭى باستالادى. اتالعان كەزەڭدە ءبىلىم ءبولى­مى مەن قالالىق ىشكى ىستەر باسقار­ما­­سىنىڭ قىزمەتكەرلەرى مەكتەپ تا­بالدىرىعىن اتتاعان وقۋشى­لارمەن كەشەندى جۇمىس جۇرگىزبەك. سەبەبى, جىل باسىنان بەرى جەتى اي­­دىڭ ىشىندە شىعىس وڭىرىندە بالالاردىڭ قاتىسۋىمەن 188 جول-كولىك وقيعاسى ورىن الدى. وقيعا سالدارىنان 5 بالا كوز جۇمىپ, 214 بالا جاراقاتتاندى. كامەلەتكە تولماعان 219 بالانىڭ ىشىندە 27 بالا ءوز كىنالەرىنەن زارداپ شەككەن ەكەن. جاڭا وقۋ جىلىنىڭ قار­سا­ڭىندا بالالاردىڭ جول-كولىك وقيعاسىندا جاراقاتتانۋىنىڭ الدىن الۋ, بالالاردىڭ قاۋىپسىزدىگىن قامتاماسىز ەتۋ جانە بالالاردىڭ جول ۇستىندەگى قاۋىپسىزدىگىنە ەرە­­سەك­­تەردىڭ نازارىن اۋدارۋ ماق­ساتىندا 20 تامىز – 10 قىر­كۇيەك ارالىعىندا وبلىستىق ىشكى ىستەر دەپارتامەنتىنىڭ اكىم­شى­لىك پوليتسياسى باسقارماسى «ابايلاڭىز, بالالار!» اتتى الدىن الۋ ءىس-شا­­را­لارىن وتكىزۋدە. شارا بارىسىندا جول ساقشىلارى جول قوزعالىسىنا قاتىسۋشىلارىمەن اپاتتىڭ الدىن الۋ جۇمىستارىن جۇرگىزىپ, كەزدەسۋلەر, اۆتوجۇرىستەر ۇيىمداستىردى. سونداي-اق, بالالار مەكەمەلەرى ماڭايىندا كوشە-جول جۇيەلەرىنىڭ كەشەندى تەكسەرۋلەرى جۇرگىزىلىپ, بالالار كوپ جينالاتىن ورىن­دارعا ەرەكشە نازار اۋدارىلدى, جول-كولىك وقيعاسىنىڭ الدىن الۋ بويىنشا اتا-انالار جينالىستارى, سەمينارلار وتكىزىلدى. ارنايى ساباقتاردى جۇرگىزۋ ءۇشىن ءبىلىم بەرۋ ورگاندارىنا ادىستەمەلىك جانە تاجىريبە­لىك كومەك كورسەتىلىپ, ءجاسوسپىرىم ءجۇر­گىنشىلەر تاراپىنان جاسالاتىن جول قوزعالىسى ەرەجەلەرىن بۇزۋدىڭ الدىن الۋ جۇمىسىنا, جول قاۋىپسىزدىگى شارالارىنا ەرىكتى كومەكشى-جاساقتار قاتىستىرىلدى. «ابايلاڭىز, بالالار!» الدىن الۋ ءىس-شاراسىنىڭ تيىمدىلىگىن ارتتىرۋ ماقساتىندا اكىمشىلىك پوليتسيا باسقارماسىنا «نۇر وتان» پار­تياسى, سالاماتتى ءومىر سالتىن قالىپتاستىرۋ ورتالىعى, «قى­زىل جارتى اي» ۇيىمى قولداۋ كور­سەتىپ كەلەدى. – جول قوزعالىسى قاۋىپسىزدىگىنە قاتىستى ماسەلەلەر ارقاشان ىشكى ىستەر دەپارتامەنتىنىڭ باقى­لا­ۋىن­­دا. ءاربىر ورىن العان وقيعا­­­لارعا, اسىرەسە, بالالاردى جانە جولاۋشىلاردى تاسىمال­داۋ­­­­مەن اينالىساتىن كولىك قۇ­رال­دارىنىڭ جۇرگىزۋشىلەرىمەن بول­عان وقيعالارعا قىزمەتتىك تەكسەرۋلەر جۇرگىزىلەدى. اپاتتىڭ دەڭ­­­گەيىن تومەندەتۋ – ءبىزدىڭ باس­­تى مىندەتىمىز, – دەيدى وب­­لىس­­تىق ءىىد اكىمشىلىك پوليتسياسى باسقارماسىنىڭ باستىعى جان­بولات باقىجانوۆ. دۋمان اناش, «ەگەمەن قازاقستان». وسكەمەن.