«...سول قازاقتىڭ ءبىرىمىن»

قولجازبا حاتتار – شى­نايى­لىقتىڭ تۇنباسى. ولار­دان ىشكى جان تازا­لى­عىنىڭ تۇماسى توگىلىپ تۇرادى. باس­پا­سوزدە كۇندەلىك اتاۋلى مەن اۆتورلىق حاتتاردىڭ تىم وقىلىمدى كەلەتىنى سو­دان. اسىرەسە, تانىمال تۇلعا­لار­دىڭ اق پاراققا ءوز قولىمەن تۇسىرگەن جازبالارىن بەستسەللەرگە بالاۋعا بولادى. ەلباسى كىتاپحاناسىنىڭ مۇ­را­عاتىندا مەملەكەت باسشىسىنا قاتىستى مول دەرەك ساقتاۋلى. سولاردىڭ اراسىندا ءبىز ءۇشىن ەرەك­شە قىزىعۋشىلىق تۋدىراتىنى – نۇرسۇلتان نازارباەۆتىڭ زامان­داس­تارىنا, قاتارداعى قازاق­ستاندىقتارعا ءار ۋاقىتتا جولداعان حاتتارى. بۇلارمەن تانىسقان ادام اسا ايتۋلى تۇلعانىڭ رەسميلىكتەن تىس ساتتەرىن, ادامي كەلبەتىن اڭعارا الادى. پرەزيدەنت 2009 جىلدىڭ 17 ماۋ­سىمىندا, وسى سويلەم قۇرالىپ جاتقان ساتتەن تۋرا التى جىل بۇرىن, مەملەكەت قايراتكەرى, اقىن, بۇگىندە باقيلىق كاكىمبەك سا­لىقوۆقا حات جازعان ەكەن. ءسوز بىلاي باستالادى: «ەل تاريحىندا, سىن كەزەڭدەردە ەلدى بىرلىككە شاقىرىپ, ەرلىككە باۋلىعان كەمەڭگەر بابالارىمىز بارشىلىق. سول ءداستۇردى جالعاستىرىپ, ءوز وي-پىكىرىڭىزدى «ەگەمەن قازاقستاننىڭ» 17 ماۋسىم كۇنى شىققان نومىرىندەگى ماقالاڭىزدا جاريالادىڭىز». ياعني, تاڭەرتەڭگىلىك پوشتامەن تانىسقاننان كەيىن, بىردەن جان اسەرىن قاعاز بەتىنە اۋدارادى. قىرۋار ءىس, قايناعان تىرشىلىك ءىشى­نەن ماقالا اۆتورىنا تىلەكتەستىك ءبىل­دىرۋگە ۋاقىت ارنايدى. بۇدان ەلبا­سىنىڭ ەل تامىرىنىڭ بۇلكىلىنە ەنجار قارامايتىن قالامگەر اتاۋ­لىعا قۇرمەتى كورىنەدى: «مەنى كوپتەن بەرى بىلەتىن بولعان سوڭ, ءوز پىكىرىڭىزدى بىلدىرۋگە ءسىزدىڭ بارلىق قاقىڭىز بار. ماسەلە وندا ەمەس. بۇل ماقالاڭىز ەل تاعدىرىن ويلايتىن, ەلدىڭ جايىن بىلەتىن بىلىمگەر ەل اعاسىنىڭ ويى دەپ بىلەمىن», دەيدى پرەزيدەنت. قازاقستاننىڭ تاۋەلسىزدىگىن حال-قادىرىمىزدى جۇمساپ, ىلگەرىلەتۋ – بارشامىزدىڭ الدىمىزداعى ۇلىق مۇرات. وسىناۋ ۇلى پارىزدى بويعا سىڭىرە ءتۇسۋ بارىسىندا سول ازاتتىقتى جاريالاعان مەملەكەت باسشىسىنىڭ ءار سوزىنە ءھام سەزىمىنە ەرەكشە دەن قويعان ابزال: «استانا ەل تاۋەلسىزدىگىنىڭ التىن دىڭگەگىنە اينالدى. الىستى, جاقىندى تاڭ قالدىراتىن عاجايىپ ەلوردامىزدى ورناتۋ – قازاقستان تاۋەلسىز­دى­گىن ورناتۋمەن تەڭ دەر ەدىم. استانا ەركىندىكتى اڭسا­عان ەلى­مىزدىڭ اسقاق ارمانى مەن جىگەرىنەن جارالعان. تاۋەل­سىزدىكتى ورناتۋ بار جانە ونى نىعايتىپ ۇستاپ قالۋ بار». نۇرسۇلتان ءابىش ۇلىنىڭ بۇل سوزدەرى ءبىر-اق حاتتا قامتىلعانىمەن, كۇللى قوعامعا ارنالعان ۇندەۋمەن تەڭ. دەسەك تە, ەلباسىنا جازۋىنا, ەڭ الدىمەن, كاكىمبەك اعامىز كوزى تىرىسىندە قالاي ارقالانعانىنا, شابىتتانعانىنا ءوزىمىز كۋامىز. گازەتتە ىستەگەن كەزىمىزدە اقساقال اس­تانا تۋرالى توپتاماسىن قول­تىق­تاپ, بىرنەشە رەت كەلگەن. باس قالانىڭ باسىلىمىنا ءار ولەڭىنىڭ جانىنا سۋرەت قوسا, جارقىراتىپ جاريالاعانىمىزدا اعامىز ءماز بولىپ, بالاشا شاتتانىپ ەدى. پرەزيدەنت حاتىنىڭ سوڭى اسىل مۇراتىنىڭ ۇشقىنىنداي. «جەكە تۇلعاعا جازىلعان سوزدەرىندە ءجۇر» دەمەسەڭىز, بۇل لەبىز ءالى-اق قاناتتى سوزدەر جيناقتالاتىن تالاي كىتاپقا ەنگىزىلەر. ءاۋ باستا-اق ەپيستوليارلىق جانرعا ءتان شىنايىلىق تۋرالى ەسكە تۇسىرگەنىمىز دە وسى بولسا كەرەك: «قازاق بالاسىنا بار كۇش-جىگەرىن, ءبىلىمىن ەلىمىزدىڭ التىن بولاشاعىنا ارناۋدان ارتىق قانداي قاسيەتتى بورىش بار؟ جوق. مەن – سول قازاقتىڭ ءبىرىمىن. كەلەر ۇرپاق ءدال وسىلاي ءتار­بيە­لەنسە دەيمىن», دەپ تولعا­نادى ەلباسى. ەربولات قامەنوۆ, قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ جەتەكشى ساراپشىسى. استانا.