باتىس قازاقستاندا جاڭگىر حاننىڭ كوزىندەي بولعان ورمان وتالۋدا

ورال. 18 مامىر. باتىس قازاقستان وبلىسى بوكەي ورداسى اۋدانى وردا اۋىلىندا كەزىندە حان جاڭگىردىڭ باستاماسىمەن وتىرعىزىلعان قاراعايلى ورمان بار. بارحان قۇمنىڭ ورتاسىنان ورىن تەپكەن ورمان بۇگىنگە دەيىن ساقتالىپ كەلگەن ەدى. وكىنىشكە قاراي, قازىرگى تاڭدا سول جەردەگى قاراعايلار كەسىلىپ جاتىر. بۇل تۋرالى egemen.kz ءتىلشىسى حابارلادى. وردا ورمان شارۋاشىلىعى اۋماعىندا بولىپ جاتقان جايتتاردى بىزگە وبلىس ورتالىعىنان شالعايدا جاتقان سول اۋىلدان ارنايى كەلگەن زەينەتكەر, اۋداننىڭ قۇرمەتتى ازاماتى ەسەنتاي نۇرلىباەۆ اشىنا ايتىپ بەردى. ءتىپتى ول وتالعان, وڭدى-سولدى كەسىلگەن ورماننىڭ سۋرەتتەرىن قوسا كورسەتتى. ەسەنتاي اقساقالدىڭ ايتۋىنشا, وسى جايتقا قاتىستى وردا ورمان شارۋاشىلىعىنىڭ باسشىلىعى ناقتى ءبىر شارا قولدانباي وتىرعان كورىنەدى. ال قاراعايلارعا قىرعيداي تيگەندەر ونى ەلەكتر اراسىنىڭ كۇشىمەن تاقتا ەتىپ ءتىلدىرىپ, ءۇيدىڭ قۇراستىرمالى بۇيىمدارىن جاساپ, ساتۋدى ادەتكە اينالدىرعان. «بۇرىن اكىمشىلىك قۇقىقبۇزۋشىلىق بولىپ سانالعان اعاشتار مەن ەكپە اعاشتاردى زاڭسىز كەسۋ – قازىرگى تاڭدا, ورمان كودەكسىنە ەنگىزىلگەن وزگەرىستەرگە سايكەس, قىلمىستىق قۇقىقبۇزۋشىلىققا جاتادى», – دەيدى ەل اعاسى. سونداي-اق, ول: «XIX عاسىردىڭ العاشقى شيرەگىندە قولدان وتىرعىزىلعان ورماندى وتاماي, ايالاپ, كەيىنگە ۇرپاققا اماناتتاساق, الدەقايدا ابىرويلى ءىس بولار ەدى. تاريحتىڭ جاڭعىرىپ, سانامىزدا قايتا ويانۋىنا دا كونە جادىگەردەي بولعان وسىنداي جاۋھارلارىمىزدىڭ سەپتىگى مول. ەندەشە ورماننىڭ وتالۋىنا جول بەرمەيىك», – دەدى. تەمىر قۇسايىن. دەرەك, سۋرەت: egemen.kz.