قوستانايدا جىل باسىنان بەرى تەمىرجولدا ەكى ادام قازا تاپتى

قوستاناي. 18 مامىر. جىل باسىنان بەرى قوستاناي وبلىسىنداعى تەمىرجول بويىندا ەكى ادام قازا تاپتى. ولار تەمىرجولدىڭ بويىنداعى بەلگىلەنبەگەن جەردەن وتەم دەگەندە پويىزدىڭ استىنا ءتۇسىپ قالادى.  وڭىردە لوكوموتيۆتىڭ ءۇي جانۋارلارىن قاعىپ كەتكەن جاعدايلارى دا از كەزدەسپەيدى. بۇل تۋرالى  egemen.kz ءتىلشىسى حابارلادى. جىل سايىن قازاقستانداعى تەمىر جول بويىندا توتەنشە جاعدايلار از كەزدەسپەيدى. ولار جول بويىندا قىزمەت كورسەتەتىن قىزمەتكەرلەردىڭ كىناسىنەن ەمەس. مۇنداي جاعدايلاردان قوستاناي وبلىسى دا سىرت قالماي وتىر. وتكەن جىلى العاشقى ءتورت ايدا 25 ادام پويىز قۇرامىنىنڭ استىندا قالعان ەدى. بيىل جاعداي ودان جاقسارعان جوق, جىل باسىنان بەرى 26 ادامدى لوكوموتيۆ سوعىپ كەتكەن. وكىنىشكە قاراي, ولاردىڭ اراسىندا ولىممەن اياقتالاتىنى دا بار. ىرىلەندىرىلگەن قوستاناي جول ديستانتسياسى وندىرىستىك-تەحنيكالىق ءبولىمىنىڭ باستىعى قۋانىش ەسقابىلوۆ: «قىس ايىندا پەشكوۆ-جاركول ماڭىندا ءبىر ادام پويىزدىڭ استىندا قالىپ قايتىس بولدى.  ول تەمىر جولدان وتەم دەگەندە, پويىز باسىپ كەتتى» دەدى. اسىرەسە, اۆتوموبيل جۇرگىزۋشىلەرى جول بويىنداعى قاۋىپتى ەلەمەيدى.  سوندىقتان پويىز قۇرامىمەن سوقتىعىسىپ جاتادى. جىل باسىنان بەرى ماشينالاردىڭ پويىزبەن 8 رەت سوقتىعۋى تىركەلگەن. ال وتكەن جىلى تەمىر جول بويىندا 3 جول-كولىك اپاتى بولعان ەكەن. قاراۋسىز مالداردىڭ جول بويىندا ءجۇرۋى دە تەمىرجولشىلاردىڭ باس اۋرۋىنا اينالىپ تۇر. ىرىلەندىرىلگەن قوستاناي جول ديستانتسياسىنىڭ ينجەنەرى سەرگەي سولوماتوۆ: «تەمىرجولعا جاقىن جەرلەرگە مال باعىلادى. مال قاراۋسىز قالادى دا, تەمىرجول بەلدەۋىنە شىعىپ كەتەدى. سونىڭ سالدارىنان پويىزدار قوزعالىسىندا كەشەۋىلدەۋ, كەشىگۋلەر بولىپ جاتادى. ال مۇنىڭ ءوزى تاسىمال ۇدەرىسىندە ءبىراز ماتەريالدىق شىعىن اكەلەدى», دەدى. مالدى قاقپاۋ ءۇشىن لوكوموتيۆتى توقتاتقان جاعدايلار دا بولدى. دەگەنمەن مال ءجيى پويىزدىڭ قۇربانى بولادى. سولوماتوۆتىڭ ايتۋىنشا, تەمىرجول بەلدەۋلەرىندە بالالاردىڭ ءجۇرۋى ءجيى كەزدەسەدى, ولار كەتىپ بارا جاتقان پويىزعا تاس اتادى. قازىردە تەمىرجولشىلار مەن پوليتسەيلەر ءجيى رەيدتەر جاسايتىن بولعان. ەگەر بالالار تاراپىنان ەرەجە, قۇقىق بۇزۋ كەزدەسسە, ولاردىڭ اتا-اناسىنا ايىپپۇل سالىنادى. ءنازيرا جارىمبەتوۆا. دەرەك, سۋرەت: alau.kz