قيال قاناتىندا

تالانتسىز بالا بولمايدى, تەك ونىڭ تىنىسىن اشىپ, دەر كەزىندە ءبىر ارناعا باعىتتاي ءبىلۋ كەرەك. اتالارىمىزدىڭ: «جاستا بەرگەن تاربيە, جاس شىبىقتى يگەندەي» دەيتىنى دە سوندىقتان. مىنە, بالالاردى وسىنداي يگى ىزدەنىستەرگە يكەمدەپ, قيالىنا قانات ءبىتىرىپ وتىرعان مارتوك اۋىلىنداعى «بالالاردىڭ تەحني­كالىق شىعارماشىلىق ورتالىعى» مم-ءىنىڭ قول جەتكەن تابىستارىن ەستىگەندە كوڭىلىمىز مارقايىپ قالدى. سەبەبى, بۇل اۋدان ورتالىقتارىندا جۇمىس ىستەيتىن جالعىز ورتالىق. ءبىز ورتالىققا كەلگەندە وقۋ جىلى اياقتالىپ, ءوز كۇشتەرىمەن جوندەۋ جۇمىستارىنا كىرىسىپ تە كەتكەن ەكەن. ورتالىق ديرەكتورى يلدار شاكيروۆ ءوز اڭگىمەسىن ورتالىقتىڭ قالاي قۇرىلعاندىعىنان باستادى. ونىڭ ايتۋىنشا, بۇل بۇرىن ميليتسيا, سوت عيماراتى بولعان ەكەن, كەيىن مۇندا وقۋ – وندىرىستىك كومبيناتى ورنالاسقان. كومبينات تاراعاننان سوڭ 2009 جىلى قۇرىلعان وسى ورتالىققا بەرىلىپتى. سول كەزدە ديرەكتورلىق تىزگىنىن ۇستاعان يلدار شاكيروۆ ۇستازداردى دا ءوزى تاۋىپ, شاقىرىپ, جۇمىستى كۇيى كەتكەن عيماراتتى «الھام شۇكىرگە» كەلتىرۋدەن باستاپتى. – باستاپقى جىلدارى نەبارى بەس ۇيىرمە جۇمىس ىستەدى. مەن ءوزىم وسى اۋىلدا ۇستازدىق ەتكە­نىمە وتىز جىلدان استى. كەزىندە وقۋ-وندىرىستىك كومبيناتىن دا باس­قاردىم. قاي ۇستازدىڭ نەگە يكەمى بار ەكەنىن بىلەمىن, سوندىقتان شامام كەلگەنىنشە, ءىستى ىلگەرى اپارۋعا بىرگە جۇمىلاتىن, قولىنان ءىس كەلەتىن ۇستازداردى جۇمىسقا تارتتىم. ءبىز كوپ ۋاقىت وتپەي جۇمىستى قالىپقا تۇسىردىك, بالالاردى كوپتەپ تارتۋعا قول جەتكىزدىك, – دەيدى ول. ورتالىقتىڭ حلەبودا­روۆكا­داعى فيليالىندا ءۇش توپتا بالالار اۆيامودەلمەن ال, ۆوزنە­سەنوۆكاداعى توپتا قىزدار ءىس تىگۋ جانە مودەلدەۋمەن شۇعىلدانادى. ەلدى مەكەندەردە فيليالدار جۇيەسىن كەڭەيتۋ جالعاسا بەرەدى. قازىر بالالاردىڭ تەحنيكالىق شىعارماشىلىق ورتالىعىندا ون ەكى ۇستاز ەڭبەك ەتەدى. ولاردىڭ ءبارى ءوز ىسىنە بەرىلگەندەر, بالالاردى جاقسىعا تالاپتاندىرىپ, قولعا العان شىعارماشىلىعىنا قۇشتارلىعىن وياتۋعا شەبەرلىكتەرى جەتكىلىكتى ماماندار. بالالاردىڭ قيالىن كەڭەيتەدى, بوس ۋاقىتتارىن ءتيىمدى وتكىزۋگە ۇيتقى بولادى. ال اعاشتان ءتۇيىن تۇيەتىن ەدىلباي ورازىمبەتوۆتىڭ شاكىرت­تەرى وسى وڭىردە وسەتىن اعاشتاردى وڭدەپ, بۇيىمدار جاسايدى ەكەن. ولاردىڭ قولىنان شىققان ءار­تۇرلى قولونەر بۇيىمدارى جانە باسقا زاتتار وبلىستىق كورمەلەرگە قويىلىپ, ءبىرىنشى ورىنعا يە بولىپ جۇرگەن كورىنەدى. اعاشتان ورنەكتەپ جاسالعان ساندىققا تۇرعىنداردان دا سۇرانىس بار ەكەن. بالالار جەرگىلىكتى قاراعاشتى وڭدەپ, قيالدارىنداعى زاتتاردى جاساۋعا توسەلىپ الىپتى. سونىڭ ءبىرى «فانتازيا» كۋبوگى بىزگە ۇنادى. شاكىرتتەرىنىڭ الدى وسى قولونەر ماماندىعىن تاڭداپ, جوعارى وقۋ ورنىنا تۇسكەن. ساتىبالدى ءساۋىرباي, «ەگەمەن قازاقستان». اقتوبە وبلىسى, مارتوك اۋدانى.