وتاندىق بيزنەستىڭ ءورىسى كەڭ

كەشە استانادا «نۇر وتان» پارتياسى جانىنداعى كاسىپكەرلىكتى قولداۋ جونىندەگى رەسپۋبليكالىق قوعامدىق كەڭەستىڭ العاشقى وتىرىسى ءوتتى. وعان «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك, پارلامەنت دەپۋتاتتارى جانە بيزنەس وكىلدەرى قاتىستى. جيىندى اشقان باۋىرجان بايبەك ءوزىنىڭ كىرىسپە سوزىندە «نۇر وتان» پارتياسى جانىنداعى «شاعىن جانە ورتا كاسىپكەرلىكتى قولداۋ» بويىنشا ساراپشىلار توبى ەندى كاسىپكەرلىكتى قولداۋ جونىندەگى رەسپۋبليكالىق قوعامدىق كەڭەسكە اينالعانىنا توقتالدى. ونىڭ ايتۋىنشا, وتاندىق بيزنەستىڭ باسەكەگە قابىلەتتىلىگىن ارتتىرۋ باعىتىنداعى تۇجىرىمدامالىق ۇسىنىستاردى ازىرلەۋ جانە «نۇر وتان» پارتياسىنىڭ, ۇلتتىق كاسىپكەرلەر پالاتاسىنىڭ, بيزنەستىڭ, قوعامدىق بىرلەستىكتەر مەن مەملەكەتتىك ورگانداردىڭ كۇش-جىگەرىن بىرىكتىرۋ اتالعان كەڭەستىڭ باستى مىندەتى بولماق.بۇدان بولەك, ول بيزنەستىڭ ەل دا­مۋىنداعى ەرەكشە رولىنە كوڭىل اۋداردى. – بيزنەس ەكونوميكالىق دامۋدىڭ قوزعاۋشى كۇشى, يننوۆاتسيانىڭ نەگىزگى باستاۋشىسى بولىپ تابىلادى. بيزنەس ورتا تاپتىڭ نەگىزى مەن ازاماتتىق قوعامنىڭ تىرەگى بولا وتىرىپ, جۇمىسپەن قامتۋ بويىنشا ماڭىزدى الەۋمەتتىك ميسسيانى اتقارادى. سوندىقتان, «نۇر وتان» وتاندىق بيزنەستى جان-جاقتى قولدايدى. ءبىزدىڭ ماقساتىمىز – وتاندىق بيزنەس پەن كاسىپكەرلىك رۋحتى كۇشەيتۋگە ىقپال ەتۋ, ۇلتتىق بيزنەس ءۇشىن قولايلى جاعداي جاساۋ, سول ارقىلى ەكونوميكانى دامىتۋ, – دەدى باۋىرجان بايبەك. ونىڭ سوزىنە قاراعاندا, ەلىمىزدىڭ ەاەو مەن دسۇ ينتەگراتسيالىق بىرلەس­تىك­تەرىنە كىرۋ قارساڭىندا وتاندىق بيزنەس ءۇشىن جاعدايلار تۇبەگەيلى وزگەرگەن. بىرىگۋدىڭ ارقاسىندا قازاقستاندىق كاسىپكەرلەرگە ەاەو-نىڭ, ودان بولەك, دسۇ-عا مۇشە 160 ەلدىڭ نارىعى اشىلدى. الايدا, ىشكى نارىقتىڭ اشىلۋىمەن باسەكەلەستىك كۇشەيۋدە, بۇل وتاندىق بيزنەس ءۇشىن كۇردەلى سىناق بولىپ وتىر. سونداي-اق, ب.بايبەك پارتيانىڭ جەكەمەنشىككە قول سۇقپاۋدى, اشىق باسەكەلەستىكتى, قولايلى ينۆەستيتسيالىق احۋال قۇرۋدى, وڭىرلەردىڭ ۇيلەستىرىلگەن دامۋىن, يننوۆاتسيا مەن ەكسپورتتى ىنتالاندىرۋدى, ەكونوميكانى ءارتاراپتاندىرۋدى, ينفراقۇرىلىمدى دامىتۋدى جاقتايتىنىن جەتكىزدى. بۇعان قوسا, وتىرىس بارىسىندا ب.بايبەك قازىرگى تاڭدا مەملەكەت باسشىسى ساياساتىنىڭ ارقاسىندا ەلىمىزدە كاسىپكەرلىك ءۇشىن جۇيەلى جاعدايلار جاسالعانىنا نازار اۋداردى. – «نۇر وتان» پارتياسىنىڭ سە­زىندە ەلباسى باستاماشى بولعان بەس حالىقتىق رەفورما بيزنەستىڭ دامۋى مەن قازاقستاننىڭ الەمدەگى ەڭ دامىعان 30 ەلدىڭ قاتارىنا قوسىلۋى ءۇشىن ينستي­تۋتتىق جاعداي تۋعىزۋعا باعىتتالعان, – دەدى ب.بايبەك. سونىمەن بىرگە, ب.بايبەك مەملەكەتتىك اپپاراتتىڭ, بيزنەس پەن قوعامنىڭ سەنىمدى ءارى ءوزارا تىعىز ارەكەتى كەز كەلگەن سىن-تەگەۋرىنگە توتەپ بەرۋگە مۇمكىندىك بەرە­تىنىن اتاپ ءوتتى. جيىندا ءسوز سويلەگەن ءماجىلىس دەپۋتاتتارى ايگۇل سولوۆەۆا, شالاتاي مىرزاحمەتوۆ جانە باسقالار مەملەكەت باسشىسىنىڭ سارابدال ساياساتى شاعىن جانە ورتا كاسىپكەرلىكتىڭ دامۋىنا قولاي­لى جاعداي جاساپ بەرىپ وتىرعانىن, بەس ينستيتۋتتىق رەفورمانى جۇزەگە اسىرۋ ەل دامۋىنىڭ باستى كەپىلى بولا الاتىنىن جەتكىزدى. ايتا كەتەيىك, پارتيا جانىنداعى كاسىپكەرلىكتى قولداۋ جونىندەگى رەسپۋب­ليكالىق قوعامدىق كەڭەسكە ءماجىلىس دەپۋتاتى ايگۇل سولوۆەۆا باسشىلىق ەتەتىن بولدى. ول بۇعان دەيىن «شاعىن جانە ورتا كاسىپكەرلىكتى قولداۋ» بويىنشا ساراپشىلار توبىنا جەتەكشىلىك ەتىپ كەلگەن-ءدى. ال اتالعان كەڭەستىڭ قۇرامىنا پارلامەنت دەپۋتاتتارى, ۇلتتىق كاسىپكەرلەر پالاتاسىنىڭ, بيزنەس-قوعامداستىقتىڭ, مەملەكەتتىك ورگانداردىڭ وكىلدەرى جانە بەلگىلى ساراپشىلار كىردى. جولدىباي بازار, «ەگەمەن قازاقستان».