بالانى جەرگە الىپ ۇرعان ەر ادامنىڭ ارەكەتى كوپتىڭ جاعاسىن ۇستاتتى (ۆيدەو)

استانا. 16 مامىر. ەلىمىزدەگى الەۋمەتتىك جەلىلەردە كەڭىنەن تاراپ كەتكەن ۆيدەوروليك كورگەن جاننىڭ جاعاسىن ۇستاتتى. وندا ەكى كىشكەنتاي بالانىڭ توبەلەسىپ جاتقانى ءتۇسىپ قالعان. بۇل تۋرالى today.kz حابارلادى. ەڭ سوراقىسى, جانجالعا ارالاسقان ەرەسەك ەر ادام بالالاردىڭ ءبىرىن كوتەرىپ الىپ, جەرگە الىپ ۇردى. جەرگە باسىمەن تۇسكەن بالا ورنىنا كوتەرىلە الماي قالدى. ال ەكى جەتكىنشەكتى «اجىراتقان» ەر ادام وعان ءمان بەرمەستەن, ءوز جونىنە كەتە باردى. وسى جايتتان كەيىن جەردە جاتقان بالانى وزگە بىرەۋى كەلىپ تەپكىلەي باستادى. وسىنشالىقتى قاتىگەزدىكتى كورە تۇرا, سول ماڭنان ءوتىپ بارا جاتقان جاياۋ جۇرگىنشىلەر مەن جۇرگىزۋشىلەردىڭ ءبىرى دە بۇرىلىپ, وقيعانىڭ ءمان-جايىن انىقتاۋعا اسىقپادى. قازىرگى تاڭدا بۇل جايت قازاقستاندىقتاردىڭ اشۋ-ىزاسىن تۋدىرۋدا. Facebook الەۋمەتتىك جەلىسىن پايدالانۋشىلاردىڭ ءبىرىنىڭ ايتۋىنشا, وقيعا شىعىس قازاقستان وبلىسى اياگوز قالاسىندا بولعان. ۆيدەو العاش جەرگىلىكتى تۇرعىندار اراسىندا تاراعان. ولاردىڭ كەيبىرى بەينەدەگى ەر ادامنىڭ اياگوزدەگى «وڭتۇستىك» اسكەري قالاشىعىندا تۇراتىنىن جانە كەلىسىمشارت بويىنشا سول سالادا قىزمەت ەتەتىنىن ايتۋدا. ەلامان قوڭىر. دەرەك, سۋرەت: today.kz.