بۇدان بۇرىنعى سايلاۋداعىداي ەمەس, بۇل جولعى جەڭىستىڭ ورنى بولەكتەۋ. بۇرىن سايلاۋشىلار كونسەرۆاتورلارعا بولجاممەن ءۇمىت ارتسا, بۇل جولعى جەڭىستى ولاردىڭ بەس جىلعى جۇمىسىنا باعا دەپ قابىلداۋعا دا بولادى. وتكەن جولى بريتانيا الدىندا شوتلانديانىڭ ءبولىنىپ شىعۋ قاۋپى تۇرسا, كەمەرون ۇكىمەتى ودان ويداعىداي وتكەن. ءتىپتى, وسى سايلاۋدا دا سول شوتلانديادا ۇلتشىلدار باسىم داۋىسقا جەتسە دە, بۇل ايماقتىڭ ءبولىنىپ شىعۋ ماسەلەسى كۇن تارتىبىندە جوق.
ادەتتە, بيلىكتەگى پارتياعا كوپ سىن ايتىلادى. كونسەرۆاتورلار ونى دا باستان كەشتى. سوعان قاراي, سايلاۋ الدىنداعى بولجامدا لەيبوريستەرگە جۇرتتىڭ ىقىلاسى باسىمداۋ دا كورىنگەن. ءبىر ساۋالنامالارعا قاراعاندا, ولار كوبىرەك داۋىس جيناۋعا ءتيىس ەدى. لەيبوريستەر كوسەمى ەدۆارد ميليبەند سايلاۋ قورىتىندىسىنا وپتيميزممەن قارادى. ولار سايلاۋشىلاردى سالىقتى ازايتۋ ۋادەسىمەن دە قىزىقتىرعان. سويتسە دە, ولار ويسىراي جەڭىلدى.
كونسەرۆاتورلار پارلامەنتتىڭ زاڭ شىعارۋشى پالاتاسىنداعى 650 ورىننىڭ 338 ورنىنا يە بولدى. بۇل دەگەنىڭىز – باسقالارمەن كواليتسيا قۇرماي-اق ۇكىمەت قۇرا الادى, ءوز باستامالارىن پارلامەنتكە وتكىزە الادى دەگەن ءسوز. وتكەن جولى ولار ليبەرال-دەموكراتتارمەن وداقتاسىپ بارىپ, كوپشىلىك داۋىسقا جەتكەن, سول ءۇشىن ليبەرالدارعا ۆيتسە-پرەمەر ورنىن ۇسىنعان. ەندى ەشكىمنىڭ قاس-قاباعىنا قارامايدى, ءوز باعىتتارىن جۇرگىزەدى.
ۇلىبريتانيادا قازىرگى ىشكى-سىرتقى ساياسات جالعاسادى دەگەندە, ەلدىڭ ىشكى بىرلىگىنە, ەكونوميكاداعى تۇراقتىلىققا, ءبىرىنشى كەزەكتە بريتاندىق مۇددەنىڭ قويىلۋىنا, سىرتقى ساياساتتا بۇرىنعىسىنشا اقش-پەن وداقتاستىققا ايرىقشا نازار اۋدارىلماق. ءبىراز ساياساتشىلار مەن ساراپشىلاردىڭ كەمەروننىڭ سوناۋ باستان 2017 جىلى ۇلىبريتانيانىڭ ەۋرووداقتان شىعۋ ماسەلەسىن رەفەرەندۋمعا شىعارۋ ۋادەسىنە قاراپ, ەۋروپالىق بىرلىككە ونى تەرىس قارايتىنداي كورسەتەتىنى بار. شىن مانىندە, ول – ەۋروپالىق مۇددەگە بارىنشا بەلسەندى قىزمەت ەتىپ كەلە جاتقان قايراتكەر. ال ەۋروپالىق وداقتان ءبولىنۋ جونىندەگى رەفەرەندۋمعا كەلەتىن بولساق, ەل ىشىندە مۇنداي پىكىر بولعان سوڭ ونى ايقىنداپ العان دا ءجون. ال بريتاندىقتاردىڭ كوپشىلىگى ءبولىنۋدى قالايدى دەۋ دە قيىن. ۋكرايناداعى جاعدايعا, رەسەيگە قارسى ارەكەتتەرگە بايلانىستى ساياساتتا كەمەرون ۇكىمەتى ەۋروپالىق مۇددەگە ادال.
ويسىراي جەڭىلگەن ليبەرالدار اراسىندا ابىرجۋشىلىق بولاتىنى زاڭدى. ولاردىڭ كوسەمى ەد ميليبەند وتستاۆكاعا كەتەدى دەگەن دە پىكىر قيسىندى. بىراق جەڭىلىستى ءبىر-اق ادامعا اپارىپ تىرەۋ دە ءادىلدىك بولماس. قايتا ۋاقىت تاڭداعان سول تۇلعانىڭ توڭىرەگىنە توپتاسىپ, باعدارلامالارىن ناقتىلاپ, كۇرەستەرىن شيراتقانى ءجون شىعار.
كونسەرۆاتورلاردىڭ جەڭىسى ەلدە بەلگىلى دارەجەدە تۇراقتىلىقتىڭ بارلىعىن اڭعارتادى. ال وسى سايلاۋدان كەيىن ونىڭ ناتيجەسىنە ءبىلدىرىلىپ جاتقان نارازىلىق شارالارىنا كەلسەك, ول – قالىپتاسقان ءداستۇردىڭ كورىنىسى. وندايلار بارلىق جەردە دە كەزدەسەدى. الەمدىك ساياساتتا ايرىقشا ورنى بار ۇلىبريتانياداي دەرجاۆادا تۇراقتىلىقتىڭ بولعانى الەمدىك ورتاق يگىلىك.
