شىمكەنتتە تۇرعىنداردى كەپىلگە العان كۇدىكتى ۇستالدى

استانا. 30 ماۋسىم. شىمكەنتتە «تەلەفون لاڭكەسى» ۇستالدى. 1963 جىلعى ەر ادامعا قاتىستى قىلمىستىق كودەكستىڭ 273 بابى («لاڭكەستىك اكتىسى تۋرالى كورىنەۋ جالعان حابارلاما بەرۋ») بويىنشا قىلمىستىق ءىس قوزعالدى. بۇل تۋرالى وڭتۇستىك قازاقستان وبلىسى ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان «قازاقپارات» حابارلادى. وقيعا 29 ماۋسىم كۇنى ساعات 23:30-دا ورىن العان. ۇلتتىق قاۋىپسىزدىك كوميتەتى دەپارتامەنتىنىڭ كەزەكشىلىك بولىمىنە تەلەفون سوققان بەلگىسىز ەر ازامات بىرنەشە ادامدى تۇتقىنعا العانىن, بەس قاباتتى ۇيگە مينا قويعانىن ايتىپ, اتالعان دەپارتامەنتتىڭ جوعارى وكىلەتتى وفيتسەرىمەن كەزدەسۋىن تالاپ ەتكەن. سونداي-اق, ول اقشا مەن ۇشاق قاجەت ەكەنىن ايتىپ, قالاداعى تۇرمەدەن جازاسىن وتەپ جۇرگەن بىرنەشە سوتتالعان ازاماتتى بوساتۋىن تالاپ ەتكەن. ىشكى ىستەر باسقارماسىنىڭ باستىعى دانيار مەيىرحاننىڭ ايتۋىنشا, وڭتۇستىك قازاقستان وبلىسى ىشكى ىستەر دەپارتامەنتىنىڭ گەنەرالى اسقار وسپانوۆ جانە باسقا جوعارى وكىلەتتى وفيتسەرلەردىڭ باسشىلىعىمەن ءبىر جارىم ساعات جۇرگىزىلگەن ءىس-قيمىلدار كەزىندە كۇدىكتى سىرتقا شىعارىلىپ, سول جەردە ۇستالدى. ايتا كەتەيىك, قويىلعان بومبا تۋرالى تەلەفون حابارلاماسىنان كەيىن 300-دەن استام ادام قاۋىپسىز جەرگە كوشىرىلگەن. ولاردىڭ اراسىندا بەس قاباتتى ءۇيدىڭ تۇرعىندارى مەن ەكى ءدامحانانىڭ جانە سول ماڭداعى شاعىن ماركەتتەردىڭ كەلۋشىلەرى مەن قىزمەتكەرلەرى بولعان. مۇنان بولەك قورشالعان ورىندا ارنايى وپەراتسيا اياقتالعانشا كولىك قوزعالىسى توقتاتىلىپ, كوممۋنيكاتسيالار اجىراتىلعان. تالعات رايىمبەك. دەرەك, سۋرەت: «قازاقپارات».