بالالارىن تاستاپ كەتكەن انا ءۇش ايدان كەيىن تابىلدى

پەتروپاۆل. 30 ناۋرىز. پەتروپاۆلدا ءۇش بالاسىن تاستاپ, ءۇن-ءتۇنسىز تابان جالتىراتقان كەلىنشەك ءۇش ايدان كەيىن اتباسار قالاسىنان تابىلدى. بۇل تۋرالى جەرگىلىكتى «دوبرىي ۆەچەر» گازەتى حابارلادى. «بالالار ءۇيىنىڭ» باس دارىگەرى ءمارۋار قاپەنوۆانىڭ ايتۋىنشا, پەتروپاۆل قالاسىنىڭ تۇرعىنى اناستاسيا گۋريانوۆا 4, 3 جانە1 جاسار ساشا, دەنيس, يگور ەسىمدى بالالارىن جاڭا جىل الدىندا مەكەمەنىڭ تابىلدىرىعىنا تاستاپ كەتىپتى. ال ءوزى بەلگىسىز جاققا زىم-زيا جوعالعان. قالالىق اكىمدىكتەگىلەر مەن الەۋمەتتىك قورعاۋ قىزمەتكەرلەرى كۇيەۋى تۇرمەدە وتىرعان, ال ءوزى ءۇش ۇلىمەن كوشە كەزىپ, تەنتىرەپ جۇرگەن جالعىزىلىكتى كەلىنشەككە قولدان كەلگەن كومەگىن جاساپ باققان. ۋاقىتشا باسپانا دا بولگەن. ەسىك-تەرەزەلەرىن اۋىستىرىپ, جاڭالاپ بەرگەن. كيىم-كەشەك پەن ازىق-ت ۇلىك جەتكىزىلىپ تۇرعان. «سەمىزدىكتى قوي عانا كوتەرەدى» دەگەن راس-اۋ. وسىنشا جارىلقاۋشىلىق پەن راقىمشىلىقتان مەزى بولسا كەرەك, ايەل بالالارىن تاستاپ, بەتى اۋعان جاققا جونەپ بەرگەن. ءۇش بالاسىن تاستاپ كەتكەن كەلىنشەك اتباساردان تابىلدى. ول ءوزىنىڭ تاسباۋىر ءىس-ارەكەتىن «اتباسارعا جۇمىس ىزدەپ بارىپ ەدىم. كۇيەۋگە شىقتىم. ەندى بالالارىمدى الىپ كەتەمىن», دەگەن اقتالۋمەن جۋىپ-شايعىسى كەلگەنىن ايتا كەتەيىك. ءومىر ەسقالي. دەرەك: «دوبرىي ۆەچەر» باسىلىمى. سۋرەت: voxpopuli.kz.