باتىسقازاقستاندىقتار حالىقارالىق ءان سايىسىندا باس جۇلدە الدى

ورال. 30 ناۋرىز. استانادا حالىقارالىق «اق كوگەرشىن» انشىلەر بايقاۋى مارەسىنە جەتتى. وسى مارتەبەلى ونەر سايىسىندا باتىس قازاقستان وبلىسىنىڭ جالپاقتال اۋىلىنان بارعان «قىز جىبەك» توبى ءداستۇرلى ءان اتالىمى بويىنشا باس جۇلدەنى جەڭىپ الدى. بۇل تۋرالى egemen.kz ءتىلشىسى حابارلادى. اۋىل ونەرپازدارىنىڭ حالىقارالىق بايقاۋدا توپ جارۋىنا ەسىمى اقجايىق ايماعىنا كەڭىنەن تانىمال ءانشى, تەرمەشى, سازگەر بايان حابيەۆانىڭ سىڭىرگەن ەڭبەگى مول. «بۇلاق كورسەڭ, كوزىن اش» دەگەندەي, ول اۋىلداعى قاۋىرسىن قانات ءانشى بالاپانداردىڭ ۇلكەن ساحناعا قانات قاعۋى ءۇشىن ءوزىنىڭ بار قارىم-قابىلەتىن جۇمساپ كەلەدى. حالىق ونەرىنىڭ جاناشىرى بايان حابيەۆانىڭ ونەر مەكتەبىنەن تۇلەپ ۇشقان تالانتتى جاستار از ەمەس. اتالعان حالىقارالىق بايقاۋدا بايان جەتەكشىلىك جاسايتىن ونەر ۇجىمى «سمۋگليانكا» جانە «اح, سامارا قالاسى» اتتى اندەردى ناقىشىنا كەلتىرە ورىندادى. سونداي-اق, ولاردىڭ تەرمەلەر مەن حالىق اندەرىنەن قۇرالعان ءپوپۋرريىن دە كورەرمەندەر ريزاشىلىقپەن قابىلدادى. وسى توپتىڭ مۇشەسى ۆەنەرا اسقاروۆا جەكە ورىنداۋدا دا باس جۇلدەنى يەلەندى. تەمىر قۇسايىن. دەرەك: egemen.kz. سۋرەت: kaztrk.kz.