اقتاۋ. 30 ناۋرىز. ماڭعىستاۋدا 28 ناۋرىز كۇنى كەشكىسىن باستالعان شاڭدى داۋىل ءالى تولاستاعان جوق. بۇل تۋرالى egemen.kz ءتىلشىسى حابارلادى.
وڭىردە كۇن كۇرت سۋىتتى. قاتتى جەل تۇرىپ, وبلىستىڭ كەيبىر اۋماقتارىندا ايازدان سۋ قاتۋدا. ال ماڭعىستاۋ, تۇپقاراعان, قاراقيا اۋداندارى مەن اقتاۋ, جاڭاوزەن قالالارىندا وتە قاتتى ەكپىنمەن سوققان جەل مەن شاڭدى داۋىل بەت قاراتپاي تۇر. سەكۋندىنا 25 مەترلىك جىلدامدىقپەن ۇيىتقىعان قاتتى جەل جانە جولدى كورسەتپەي بوراعان شاڭ سالدارىنان مۇنايلى اۋدانىندا ەكى جەڭىل كولىك سوقتىعىستى. ودان بولەك, جەتىباي-اقتاۋ تاسجولىندا ۆاحتالىق جۇمىسشىلاردى تيەگەن اۆتوبۋس اۋدارىلدى. بىراق, ادام شىعىنى ورىن العان جوق. قاتتى جەل قاراقيا اۋدانىنىڭ قۇرىق اۋىلىنداعى ورتا مەكتەپتىڭ شاتىرىن قيراتىپ كەتتى. قازىر وبلىستا جول قاۋىپسىزدىگىن ساقتاۋ شارالارى قولعا الىنعان.
«ءۇش كۇنگە سوزىلعان شاڭدى داۋىلدىڭ سوڭى قار ارالاس جاڭبىرعا ۇلاسادى» دەيدى مەتەرولوگيا ماماندارى.
گۇلايىم شىنتەمىرقىزى.
دەرەك: egemen.kz.
سۋرەت: تالانت قۇسايىن.
