تاشكەنت بازارلارى قازاقستان پيازىنا دىلگەر بولىپ وتىر

استانا. 30 ناۋرىز. وزبەكستان استاناسى – تاشكەنت قالاسىنداعى بازارلاردا سوڭعى كەزدەرى پياز ناعىز قاردار دۇنيەگە اينالىپ وتىر. بۇل تۋرالى UZ24 حابارلادى. «سوڭعى ۋاقىتتارى بايتاق تۇرعىندارىن بازارلاردان باستى پيازداردىڭ مۇلدەم جوعالىپ كەتۋى الاڭداتىپ وتىر», - دەلىنگەن حابارلامادا. تۇتىنۋشىلار قازىر تاشكەنتتىڭ ءىرى رىنوكتارىندا ساتۋشىلاردىڭ پيازدى نە جاسىرىپ ساتاتىندارىن, نە ونىڭ مۇلدەم جوق ەكەندىگىن اتاپ وتەدى. وسىعان سايكەس ونىڭ باعاسى دا ىشقىنىپ تۇر. بۇگىندە كيلوسى 3500-4000 سۋم ارالاعىندا ساۋدالانادى. قالاداعى ءىرى سۋپەرماركەتتەردە ازىرگە پياز كەزدەسىپ قالادى. بىراق ساتىپ الۋشالىر ولاردىڭ ساپالارى كوڭىلدەگىدەي ەمەس ەكەنىن ايتادى. جۇرتتىڭ كوبى بۇل تاپشىلىقتى جاڭا ءونىمنىڭ تۇسەتىن كەزىنە قاراي قولدان جاسالىپ وتىرعان تىرلىك سانايدى. بۇرىنعىدان قالعان پيازدىڭ قورى از, ال جاڭاسى ءالى شىعا قويعان جوق. وسىدان كەلىپ, باعا كۇرت كوتەرىلىپ كەتكەن. مۇنىڭ بازبىرەۋلەر ءۇشىن وتە ءتيىمدى ەكەنى دە ءسوزسىز. دەگەنمەن, UZ24 ءتىلشىسى انىقتاعانداي, دايىنداۋشىلار قول قۋسىرىپ قاراپ وتىرعان جوق ەكەن. ولاردىڭ ءبىر توبى تاياۋ كۇندەردەن باستاپ قازاقستاننان, قوڭسى سارىاعاش جەرىنەن پياز تاسىمالداۋدى باستاپ كەتىپتى. الايدا, كوكونىستىڭ بۇل تۇرىنە دەگەن سۇرانىستىڭ جاقىن ارادا قاناعاتتاندىرىلا سالۋى مۇمكىن ەمەس. سەبەبى, «ۋزۋلگۋرجيساۆدوينۆەست» اسسوتسياتسياسى ءمالىم ەتكەندەي, قازىر پيازدىڭ تاپشىلىعى وزبەكستاننىڭ بارلىق ايماقتارىندا بايقالىپ وتىر. «پيازدىڭ كوپ مولشەرى قازاقستاننان جەتكىزىلىپ جاتىر. ال تاپشىلىقتىڭ قاشان تولاستايتىنى ازىرگە بەلگىسىز», - دەدى اسسوتسياتسيا وكىلى. «توشبوزورساۆدو» باسشىلارى جاعدايعا تۇسىندىرمە بەرۋدەن باس تارتقان. وتكەن جىلى جازدا رەسپۋبليكادا قانت توڭىرەگىندە دە وسىنداي جاعداي قالىپتاسقان ەكەن. جۇرت ونى ساتىپ الۋ ءۇشىن ۇزىننان-ۇزاق كەزەكتەرگە تۇرۋعا ءماجبۇر بولعان. سول كەزدە باعا ءدال مۇنداي بولىپ كۇرت كوتەرىلمەپتى. ماسەلەگە سوسىن «گوسكومكونكۋرەنتسيا» ارالاسىپ, تاپشىلىقتى ازايتۋعا ءبىراز كومەكتەسىپتى. مۇرات ايتقوجا. مانبە, سۋرەت: UZ24.