اقتوبەدەگى «مەگادان» مينا ىزدەلدى

اقتوبە. 30 ناۋرىز. اقتوبەدە «102» تەلەفونىنا بەلگىسىز بىرەۋلەر قوڭىراۋ شالىپ: «مەگا» ويىن-ساۋىق ورتالىعىنا جارىلعىش زات قويىلدى», – دەپ حابارلادى. ابىروي بولعاندا, اقپار جالعان بولىپ شىقتى. جالعان حابار تاراتقان ادامدى ءتارتىپ ساقشىلارى ءبىر ساعاتتا قۇرىقتادى. بۇل تۋرالى اقتوبە وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. 29 ناۋرىز كۇنى تۇنگى مەزگىلدە جەدەل باسقارۋ ورتالىعىنىڭ «102» تەلەفونىنا بەلگىسىز بىرەۋ حابارلاسىپ, «مەگا-اقتوبە» ويىن-ساۋىق ورتالىعىنا جارىلعىش زات قويىلعاندىعى تۋرالى حابارلاعان. وسى حاباردى العاننان كەيىن وقيعا ورنىنا تەز ارادا ىشكى ىستەر دەپارتامەنتىنىڭ جەدەل تەرگەۋ توبى, «ارلان» ارنايى ماقساتتاعى بولىمشەسىنىڭ ساپەرلارى, ۇلتتىق قاۋىپسىزدىك كوميتەتىنىڭ قىزمەتكەرلەرى جانە توتەنشە جاعدايلار دەپارتامەنتىنىڭ كەزەكشى جاساعى جىبەرىلدى. ارنايى قىزمەتتەر مەن قۇقىق قورعاۋ ورگاندارى كەلگەنشە ويىن-ساۋىق ورتالىعىنداعى بارلىق ادام كاۋىپسىز جەرگە شىعارىلدى. وسىدان كەيىن «ارلان» ارنايى ماقساتتاعى بولىمشەسىنىڭ ساپەرلارى قىزمەتتىك-ىزدەستىرۋ يتتەرىن جانە قاجەتتى قۇرالداردى قولدانۋ ارقىلى عيماراتتىڭ ءىشىن جانە وعان جاقىن اۋماقتارعا تەكسەرۋ جۇرگىزىپ, ەشقانداي جارىلعىش زاتتى تاپپادى. جەدەل باسقارۋ ورتالىعى مەن جەدەل قىزمەتتەردىڭ بىرلەسكەن ارەكەتتەرىنىڭ ارقاسىندا سول ءتۇنى وسى قىلمىستى جاسادى دەگەن كۇدىكپەن 29 جاستاعى قالا تۇرعىنى قولعا ءتۇستى. تەرگەۋ بارىسىندا كۇدىكتى جارىلعىش زات قويىلعاندىعى تۋرالى اقپاراتتى بۇزاقىلىق نيەتپەن حابارلاعانىن مويىندادى. قازىر ويىن-ساۋىق ورتالىعىنا جانە مەملەكەتكە كەلتىرىلگەن شىعىن كولەمى انىقتالۋدا. بۇگىندە كۇدىكتى ۋاقىتشا ۇستاۋ قاماعىنا قامالدى. وعان قاتىستى قر قك 273-بابى بويىنشا قىلمىستىق ءىس قوزعالدى. اتالعان باپتىڭ سانكتسياسىندا 6 جىلعا دەيىن باس بوستاندىعىنان ايىرۋ جازاسى قاراستىرىلعان. بۇل جىل باسىنان بەرى جارىلعىش زات قويىلعاندىعى تۋرالى ەكىنشى دەرەك. وتكەن جىلى مۇنداي جاعداي 4 مارتە قايتالانسا, 2013 جىلى وبلىس بويىنشا 13 دەرەك تىركەلگەن. ساتىبالدى ءساۋىرباي. دەرەك: اقتوبە وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: remarka.kz.