كيپر كومانداسىن جەڭدى

بۇرناعى كۇنى چەمپيوندار ليگاسى ىرىكتەۋ ءتۋرنيرىنىڭ پلەي-وفف باسەكەسى شەڭبەرىندە «استانا» ءوز الاڭىندا كيپردىڭ اپوەل كومانداسىن قابىلدادى. «استانا-ارەنا» سپورت كەشەنىندە وتكەن كەزدەسۋ ناتيجەسىندە ەلوردالىقتار 1:0 ەسەبىمەن جەڭىسكە جەتتى. وسى رەتتە ستاديونعا 30 مىڭ جانكۇيەر جينالىپ, رەكوردتىق كورسەتكىش تىركەلگەنىن اتاپ وتكەن ءجون. ويىندى الاڭ يەلەرى وتە بەلسەندى باستادى. ءتىپتى 4-مينۋتتا ولار قاۋىپتى شابۋىل ۇيىم­داستىرىپ, ەسەپ اشاتىن تاماشا مۇمكىندىككە يە بولدى. الايدا, باۋىرجان جولشيەۆتىڭ جاساعان سوققىسىنا قارسىلاستاردىڭ قاقپاشىسى بوي ۆاتەرمان توسقاۋىل قويا ءبىلدى. دەگەنمەن, ءبىزدىڭ كوماندا جىلدام گول سوعۋدىڭ ورايىن كەلتىرە الدى. ماتچتىڭ 14-مينۋتىندا فوكسي كەتەۆوامانىڭ قاپ­تالدان اسىرعان پاسىنا وزگەلەردەن بۇرىن جەتكەن باۋىرجان دوپتى باسىمەن قاق­پاعا ەنگىزىپ, وتە ادەمى گولدىڭ اۆتورى اتاندى. بۇل ەسەپ ۇزىلىسكە دەيىن وزگەرگەن جوق. ەكىنشى تايم قوناقتاردىڭ باسىمدىعىمەن ءوتتى. نەگىزىنەن قورعانىسقا ءمان بەرىپ, قارىمتا شابۋىلدارعا عانا يەك ارتقان «استانا» قارسىلاستارىنا ەركىن ويناۋعا مۇمكىندىك بەرىپ قويدى. ابىروي بولعاندا, كيپردەن كەلگەن ويىنشىلار ءبىزدىڭ قاقپادان ساڭىلاۋ تابا العان جوق. ەندى كوماندالار 26 تامىزدا نيكوسيادا قارىمتا كەزدەسۋ وتكىزەدى. چەمپيوندار ليگاسىنىڭ توپتىق سايىسىنا جولداما الۋ ءۇشىن «استاناعا» ول ويىندا تەڭ ويناسا دا جەتىپ جاتىر. ايتا كەتەيىك, وسى جەڭىستەن كەيىن قازاقستان ۋەفا-نىڭ قۇراما كوماندالار اراسىنداعى رەيتينگىندە 31-ساتىعا تۇراقتادى. بۇگىندە ءبىزدىڭ قورجىندا 11,750 ۇپاي بار. ەۋروكۋبوكتىق باسە­كەلەردە «استانادان» بولەك, الما­تىنىڭ «قايراتى» دا ءساتتى ويناپ جات­قانىن ەسكەرسەك, بۇل كورسەتكىشتى ءالى دە جاقسارتۋعا مۇمكىندىك بار. ەلامان قوڭىر, «ەگەمەن قازاقستان».