تاعزىمدى وقيعالار تولاستامايدى

ۇلى وتان سوعىسىنىڭ ارداگەرلەرىنە بارىنشا قۇرمەت كورسەتۋ, قاندى قىرعىننان قايتپاي قالعان مايدانگەرلەردىڭ رۋحىن اسقاقتاتۋ ماقساتىندا ەلدى مەكەندەردە ەڭسەلى ەسكەرتكىشتەر تۇرعىزۋ ءتارىزدى كوپتەگەن كەلىستى كورىنىستەر كەڭىنەن قولعا الىنۋدا. سونداي سالتاناتتى ءىس-شارالاردىڭ قاتارىنا الماتى وبلىسىنىڭ جامبىل اۋدانىندا وتكەن ۇلى وتان سوعىسى جانە ەڭبەك ارداگەرى شاياحمەت عاينانوۆتىڭ تۋعانىنا 101 جىل تولۋ ساتىنە ورايلاستىرىلىپ وتكىزىلگەن جاسوسپىرىمدەر اراسىنداعى ءداستۇرلى بوكس ءتۋرنيرى قوسىلدى. شاياحمەت عاينانوۆتى ەسكە الۋعا ارنالعان جاسوسپىرىمدەر اراسىنداعى بيىلعى ءVى بوكس تۋرنيرىنە قازاقستاننان وزگە قىرعىزستان مەن وزبەكستان رەسپۋب­ليكالارى دا تاڭداۋلى بىلعارى قولعاپ شەبەرلەرىن اتتاندىرىپتى. تالاي-تالاي جەكپە-جەكتەردىڭ ءدامىن تاتىپ, شەبەرلىك جاعىنان دا, نامىس جاعىنان دا شارشى الاڭدا شىنايى شىڭدالعان قازاقستاندىق بوكسشىلاردىڭ قۇرامىن قۇرايتىن كوماندالاردىڭ ساپىندا قىزىلوردا, وڭتۇستىك قازاقستان, جامبىل وبلىستارىنىڭ, سونداي-اق, الماتى وبلىسىنىڭ الاكول, رايىمبەك, ىلە, تالعار, ەڭبەكشىقازاق, قاراساي, جامبىل اۋداندارىنىڭ جانە الماتى قالاسىنىڭ بوكسشى سپورتشىلارى بولدى. جانكۇيەرلەر مەن كورەرمەندەردىڭ مول بولۋىنا بايلانىستى اۋىل مەكتەبىنىڭ اشىق اسپان استىنداعى اۋلاسىنا قۇرىلعان بوكس رينگىندە تاماشا ويىن ورنەكتەرى ورىن الىپ, ونداعى تاماشا جەكپە-جەكتەر دۇركىن-دۇركىن جينالعانداردىڭ رياسىز قوشەمەتتەرىنە بولەنىپ جاتتى. دودالى دا دۋماندى ءساتتىڭ ەڭ قىزعان كەزىندە قازاقتىڭ ويۋ-ورنەكپەن كومكەرىلگەن شاپانى مەن قالپاعىن كيىپ, استىنداعى قارا تۇلپاردىڭ ءجۇرىسىن ويناقشىتىپ, قالىڭ كوپشىلىكتىڭ ورتاسىنا 1980 جىلعى ماسكەۋ وليمپياداسىنىڭ چەمپيونى جاقسىلىق ۇشكەمپىروۆتىڭ كەلۋى – مۇنداعىلاردىڭ دەلەبەسىن قوزدىرىپ, ول كىسىگە دەگەن قۇرمەتتەن تۋىنداعان جارىس الاڭىنداعى قازاقي قيقۋ اينالانى كومكەرىپ كەتتى. جارىستىڭ ناتيجەسى شىعىپ, جەكە جانە كوماندالىق ەسەپتەگى ورىندار ايقىندالعانشا سوعىس جانە ەڭبەك ارداگەرى شاياحمەت عاينانوۆتى ەسكە الۋ­عا ارنالعان جاسوسپىرىمدەر اراسىنداعى VI حالىقارالىق بوكس ءتۋرنيرىنىڭ اياقتالۋىنا بايلانىستى قورىتىندى ءسوز سويلەيتىندەرگە كەزەك بەرىلىپ, ورتاعا ماسكەۋ وليمپياداسىنىڭ چەمپيونى جاقسىلىق ۇشكەمپىروۆ اعامىز كوتەرىلدى. ءوز سوزىندە قوناق ءار جىلدارى وتكەن وليمپيادالاردا قازاقستاننان شىققان چەمپيوندار تۋرالى ايتا كەلىپ, 200-دەن اسا مەملەكەت قاتىسقان لوندون وليمپياداسىندا قازاقستاننىڭ 7-ءشى ورىنعا يە بولعاندىعىن ۇلكەن ماقتانىش سەزىممەن جەتكىزدى. «سول سپورتشىلاردىڭ داڭقتى ناتيجەلەرىن جاڭادان جاڭعىرتىپ, بولاشاقتا قازاقستاننىڭ سپورتتىق ابىرويىن ارتتىراتىن سەندەرسىڭدەر, اينالايىن ءجاسوسپىرىم بىلعارى قولعاپ شەبەرلەرى!» دەگەن جاقسىلىق ۇشكەمپىروۆ قىرعىز جانە وزبەك ەلدەرىنەن كەلگەن سپورتشىلارعا دا زور تابىستار تىلەدى. ودان كەيىن ءسوز كەزەگى بەرىلگەن ءبىلىم جانە عىلىم مينيسترلىگى دەنە-شىنىقتىرۋ عىلىمي-پراكتيكالىق ورتالىعىنىڭ باس ديرەكتورى مارات قوشاەۆ, الماتى وبلىسىنداعى جامبىل اۋداندىق ءماسليحاتىنىڭ حاتشىسى سايات جۇرىن, ءال-فارابي اتىنداعى قازاق ۇلتتىق ۋنيۆەرسيتەتى سپورت كەشەنىنىڭ باسشىسى تالعات دۇيسەنباەۆ وسى وتكىزىلىپ وتىرعان حالىقارالىق سپورتتىق باسەكەنىڭ ۇلى جەڭىستىڭ 70 جىلدىعىنا جاسالعان ۇلكەن سىي, جاس ۇرپاق تاربيەسىنە بەرەرى مول ساياسي شارا ەكەندىگىنە ەرەكشە توقتالىپ, باياندى باستامانىڭ قوزعاۋشىسى بولىپ كەلە جاتقان سوعىس جانە ەڭبەك ارداگەرى شاياحمەت عاينانوۆتىڭ پەرزەنتى, مەملەكەت جانە قوعام قايراتكەرى, گەنەرال-لەيتەنانت ءادىل شاياحمەتوۆكە دەگەن ريزاشىلىقتارىن ءبىلدىردى. بۇگىنگى سپورت دوداسىن ۇيىمداستىرۋ بارىسىندا اسقان بەلسەندىلىك پەن ىسكەر­لىك تانىتقان ازاماتتارعا ارنايى ماراپاتتاردى تابىستاۋ ءۇشىن حالىق الدىنا شىققان قازاقستان جازۋشىلار ودا­عىنىڭ مۇشەسى ماناربەك ءىزباسار جوعارىدا ءسوز العان قوناقتارمەن ءبىر­گە شاياحمەت عاينانوۆتىڭ ۇرپاعى دا­نيار جانتىقباەۆتىڭ, الماتى وبلى­سىنداعى جامبىل اۋدانىنىڭ بوكس جات­تىقتىرۋشىسى بەكبولات ناعا­شى­باي­دىڭ, وزبەكستاندىق جاتتىق­تىرۋ­شى نۇرلان قاراجىگىتوۆتىڭ, قىرعىز­ستاندىق جاتتىقتىرۋشى نۇربەك ءومىر­عازيەۆتىڭ, قازاقستاننىڭ ەڭبەك سىڭىرگەن جاتتىقتىرۋشىسى اسقار ومارقۇلوۆتىڭ, الماتى وبلىسىنداعى كوكوزەك ورتا مەكتەبىنىڭ ديرەكتورى حاميت ەسباەۆتىڭ ومىراۋلارىنا ەسكەرتكىش مەدالدار مەن توسبەلگىلەردى تاقتى. وسى كەزدە مەرەكەلىك سپورت دودا­سىنىڭ ناتيجەلەرى دە بەلگىلى بو­لىپ, جۇلدەگەر سپورتشىلار سالماق كاتەگو­ريالارى بويىنشا كەزەك-كەزەگىمەن تۇ­عىر­عا كوتەرىلىپ, سىي-سياپاتتارعا يە بو­لىپ جاتتى. ال, جالپى كوماندالىق ەسەپ بويىنشا الماتى وبلىسىنداعى جامبىل اۋدانىنىڭ قۇراما كومانداسى ءبىرىنشى ورىنعا كوتەرىلسە, ەكىنشى ورىن وزبەكستان قۇراما كومانداسىنىڭ ەنشىسىنە بۇيىردى. جەڭىس تۇعىرىنىڭ ءۇشىنشى ساتىسىنا الماتى قالاسىنىڭ بىلعارى قولعاپ شەبەرلەرى لايىق دەپ تابىلدى.   ايناش ەسالي, «ەگەمەن قازاقستان». الماتى وبلىسى, جامبىل اۋدانى.