ماڭعىستاۋدا 24 ادام مىنگەن اۆتوبۋس اۋدارىلىپ قالدى

اقتاۋ. 29 ناۋرىز. ماڭعىستاۋدا ەكپىنى سەكۋندىنا 25 مەترلىك جىلدامدىقپەن ۇيىتقي سوققان شاڭدى داۋىلدىڭ سالدارىنان مۇنايشىلار مىنگەن اۆتوبۋس اپاتقا ۇشىرادى. بۇل تۋرالى egemen.kz ءتىلشىسى حابارلادى. وقيعا بۇگىن تاڭەرتەڭگى ساعات 7 شاماسىندا اقتاۋ-جەتىباي-جاڭاوزەن تاسجولىندا بولدى. شاڭدى داۋىلدان جول دۇرىس كورىنبەگەن. قۇزىرلى ورىنداردىڭ حابارلاۋىنشا,  جۇمىسشىلار مىنگەن Daewoo-BH 117 اۆتوبۋسى اۋا رايىنىڭ قولايسىزدىعىنا بايلانىستى جولدىڭ وڭ جاق بەتىنە قاراي اۋدارىلعان. اۆتوبۋستاعى 24 ادامنىڭ بارلىعى دا جەتىباي اۋىلىنداعى ۆاحتالىق جۇمىستارىنا بارا جاتقان «تەحنو-ترەيدينگ لتد» جشس-ءنىڭ جۇمىسشىلارى بولىپ شىقتى. جول اپاتى سالدارىنان ءبىر جولاۋشى ءتۇرلى دەنە جاراقاتتارىن الىپ, وبلىستىق اۋرۋحاناعا, تاعى ءۇش جولاۋشى جەتىباي اۋىلىنىڭ اۋرۋحاناسىنا جىبەرىلگەن. وقيعادان سوڭ جول-پاترۋلدىك پوليتسياسى قىزمەتكەرلەرى اتالعان تاسجولدا تەك وزدەرىنىڭ باستاۋىمەن, توپ بولىپ جۇرۋگە عانا رۇقسات ەتىپ جاتىر. گۇلايىم شىنتەمىرقىزى. دەرەك, سۋرەت: egemen.kz.