«سارىارقا» «توروستان» تاعى جەڭىلدى

استانا. 29 ناۋرىز. جوعارى حوككەي ليگاسىنىڭ جارتىلاي فينالىندا ەكىنشى ويىنىن وتكىزگەن «سارىارقا» تاعى دا جەڭىلۋگە ءماجبۇر بولدى. نەفتەكامسكىنىڭ «توروسىمەن» كۇش سىناسقان ءبىزدىڭ كوماندا بۇگىن 1:2 ەسەبىمەن ەسە جىبەردى. بۇل تۋرالى egemen.kz حابارلادى. العاشقى كەزەڭدە ايدىن يەلەرى باسىم بولدى. بىرنەشە وتكىر شابۋىل ۇيىمداستىرىپ, جۇيەلى ويىن ورنەگىن كورسەتكەن «سارىارقا» 12-مينۋتتا ەسەپ اشتى. ناتيجەلى سوققىنىڭ اۆتورى الەكساندر زۋبريتسكي. ەسەسىنە, قالعان ەكى كەزەڭدە قوناقتار ويىن تىزگىنىن ۋىستارىنان شىعارعان جوق. كەزدەسۋدىڭ 24-مينۋتىندا ۆاسيلي موردۆينوۆ تارازى باسىن تەڭەستىرسە, 44-مينۋتتا كيريلل پولوزوۆ كومانداسىنىڭ جەڭىس شايباسىن سوقتى. وسىلايشا, رۋسلان سۇلەيمەنوۆتەن ءتالىم الاتىن «توروس» حوككەيشىلەرى ەكىنشى جەڭىستەرىنە قول جەتكىزدى. كەشەگى ويىندا دا «سارىارقا» جەڭىپ تۇرىپ جەڭىلگەن ەدى. قازىر قوس كوماندا اراسىنداعى جالپى ەسەپ «توروستىڭ» پايداسىنا 2:0. ەندى قارسىلاستار 1-2 ءساۋىر كۇندەرى نەفتەكامسكىدە كۇش سىناسادى. ەلامان قوڭىر. دەرەك: egemen.kz. سۋرەت: hc-saryarka.com.