وزبەكستاندا سايلاۋشىلاردىڭ 85 پايىزى داۋىس بەردى

استانا. 29 ناۋرىز. وزبەكستاندا جەرگىلىكتى ۋاقىت بويىنشا ساعات 17:00-گە دەيىن سايلاۋشىلاردىڭ 85 پايىزدان استامى پرەزيدەنت سايلاۋى ءۇشىن داۋىس بەرۋ ءجۇرىپ جاتقان سايلاۋ ۋچاسكەلەرىنە كەلىپ ۇلگەردى. بۇل تۋرالى «گازەتا.Ru» حابارلادى. «سايلاۋشىلار تىزىمىنە كىرگەن 20 ملن. ادامنىڭ 17 ميلليوننان استامى داۋىس بەردى», - دەلىنگەن حابارلامادا. «قازىرگى ساتكە دەيىن ورتالىق سايلاۋ كوميسسياسىنا الدەقانداي ءبىر سايلاۋ زاڭىنىڭ بۇزىلعانى تۋرالى اقپار كەلىپ تۇسكەن جوق», - دەدى وزبەك ورتالىق سايلاۋ كوميسسياسىنىڭ باسشىسى ميرزا-ۋلۋگبەك ابدۋسالوموۆ. وزبەكستانداعى سايلاۋ تاڭەرتەڭگى ساعات 10-دا, سايلاۋشىلاردىڭ ۇشتەن ءبىر بولىگىنەن استامى, ياعني 36 پايىزى كەلگەن كەزدە زاڭدى ءوتىپ جاتىر دەپ تانىلدى. وزبەكستان ليبەرالدى دەموكراتيالىق پارتياسىنىڭ اتىنان سايلاۋعا ءتۇسىپ جاتقان پرەزيدەنتتىككە كانديدات يسلام كاريموۆ بۇگىن تاڭەرتەڭ سايلاۋ ۋچاسكەسىنە كەلىپ, داۋىس بەردى. ءىس باسىنداعى مەملەكەت باسشىسى بۇرىننان قالىپتاسقان داستۇرگە سايكەس, تاشكەنتتەگى ميروباد اۋدانىندا ورنالاسقان 644-سايلاۋ ۋچاسكەسىنە كەلدى. وزبەكستان سايلاۋ تىزىمىنە 20 798 052 ادام تىركەلگەن. ولار 4 كانديداتتىڭ اراسىنان ءبىر ادامدى تاڭدايدى. مۇرات ايتقوجا. مانبە, سۋرەت: گازەتا.Ru.