سۋرەت: ulan.kazgazeta.kz
مۇعالجار اۋدانىنىڭ ەمبى قالاسىندا 1977 جىلى مۋزىكا مەكتەبىنىڭ فيليالى اشىلىپ, وندا العاش رەت بەلگىلى كۇيشى, مادەنيەت قايراتكەرى ءساليما الدابەرگەنوۆا ءدارىس بەرە باستادى. وسى ءبىلىم وشاعىندا ءتالىم العان كوپتەگەن شاكىرت كەيىن ونەر جولىن تاڭداپ, ەلىمىزدىڭ ءار وڭىرىندە مادەنيەت سالاسىنىڭ دامۋىنا ۇلەس قوسىپ كەلەدى. ولاردىڭ قاتارىندا الەمگە ايگىلى ءانشى ديماش قۇدايبەرگەننىڭ اكەسى قانات ايتباەۆ, كاسىبي قوبىزشى ءارى جەتىگەن اسپابىنىڭ تانىمال شەبەرى باقىت مىرزابەكوۆا, سونداي-اق اسلانبەك جاناساەۆ, ءشاربات كىشىباەۆا, ۇلبولسىن مۇحانبەتوۆا, باسقا دا ونەر يەلەرى بار.
بۇگىندە ەمبى قالاسىندا بەس جالپى ءبىلىم بەرەتىن مەكتەپ جۇمىس ىستەيدى. الايدا مۋزىكا مەكتەبى فيليالىندا نەبارى ەكى مۇعالىم قىزمەت اتقارىپ, بار بولعانى 25 بالا ءبىلىم الىپ ءجۇر. ساباق ەمبى قالالىق اۋلا كلۋبىنىڭ ەكى شاعىن بولمەسىندە وتكىزىلەدى. بالالارىن مۋزىكا مەكتەبىنە بەرگىسى كەلەتىن اتا-انالار كوبەيگەنىمەن, مۇعالىمدەر شتات بىرلىگىنىڭ جەتكىلىكسىزدىگىن العا تارتىپ, جاڭا وقۋشىلاردى قابىلداي الماي وتىرعاندارىن ايتادى. سونىڭ سالدارىنان ونەرگە قىزىعۋشىلىق تانىتقان كوپتەگەن بالا قوسىمشا ءبىلىم الۋ مۇمكىندىگىنەن قاعىلىپ وتىر.
بۇل ماسەلە جىل سايىن قايتالانادى. اتا-انالار مەن تۇرعىندار تاراپىنان اۋداندىق دەڭگەيدە بىرنەشە رەت كوتەرىلگەنىمەن, ازىرگە ناقتى ناتيجە بايقالماي وتىر. ەمبى قالاسىندا دەربەس مۋزىكا مەكتەبىن اشاتىن ۋاقىت الدەقاشان جەتكەن سياقتى. ەگەر مۇنداي مۇمكىندىك ازىرگە بولماسا, ەڭ بولماسا قوسىمشا شتات بىرلىكتەرىن ءبولىپ, بالالاردى كوبىرەك قابىلداۋعا جاعداي جاساۋ قاجەت.
ەمبى قالاسىندا قوسىمشا ءبىلىم بەرەتىن مەكەمەلەر بار. اتاپ ايتقاندا, اۋداندىق وقۋشىلار شىعارماشىلىعىن دامىتۋ ورتالىعى مەن قالالىق اۋلا كلۋبىندا دومبىرا ۇيىرمەلەرى جۇمىس ىستەيدى. قازىر بۇل ۇيىرمەلەرگە شامامەن 70 بالا قاتىسادى. الايدا مۇندا دومبىرادان وزگە مۋزىكالىق اسپاپتاردى ۇيرەتەتىن باعىتتار جوق. ونىڭ ۇستىنە, بۇل – ۇيىرمە بولعاندىقتان ساباقتار توپتىق فورماتتا وتەدى. ءار وقۋشىمەن جەكە جۇمىس جۇرگىزۋ مۇمكىن ەمەس. ال مۋزىكا مەكتەبىندە ءار بالاعا جەكە كوڭىل ءبولىنىپ, اسپاپتى كاسىبي دەڭگەيدە مەڭگەرۋگە جاعداي جاسالادى. مۇندا نوتا ساۋاتى وقىتىلىپ, جۇيەلى مۋزىكالىق ءبىلىم بەرىلەدى. سوندىقتان مۋزىكا مەكتەبى مەن ۇيىرمەنىڭ مۇمكىندىگىن سالىستىرۋعا كەلمەيدى.
مۋزىكا مەكتەبى – جاس ۇرپاقتى ونەرگە باۋلىپ قانا قويماي, ولاردىڭ رۋحاني جانە مادەني دۇنيەتانىمىن قالىپتاستىراتىن, بولاشاق تالانتتاردىڭ كاسىبي تۇرعىدان شىڭدالۋىنا جول اشاتىن ماڭىزدى ءبىلىم وشاعى. بەلگىلى پەداگوگ ۆاسيلي سۋحوملينسكيدىڭ: «مۋزىكا تىڭداتپايىنشا تاربيە بەرۋ, بالالىق شاقتىڭ وزىندە ادامنىڭ ءسۇيىپ تىڭدايتىن ءان-كۇيلەرىنسىز تاربيە بەرۋ دەگەن مەنىڭ باسىما قونبايتىن نارسە», دەگەن ءسوزى وسىنىڭ ايقىن دالەلى.
ءبىز – اكادەميك, عالىم, كومپوزيتور, قازاق حالىق اسپاپتار وركەسترىنىڭ نەگىزىن قالاۋشى احمەت جۇبانوۆتىڭ تۋعان جۇرتىمىز. سوندىقتان بالالاردىڭ ونەرمەن اينالىسۋىنا جاعداي جاساۋ – بارشامىزدىڭ ورتاق مىندەتىمىز. ءار بالانىڭ بويىنداعى قابىلەتتى اشىپ, ونەرگە جول تابۋىنا مۇمكىندىك بەرۋ ماقساتىندا ءتيىستى جاعداي جاسالۋى قاجەت دەپ سانايمىز.
ەمبى قالاسىندا بالالار مەن جاستاردىڭ بوس ۋاقىتىن ءتيىمدى ۇيىمداستىرۋعا ارنالعان مادەني-شىعارماشىلىق ورتالاردىڭ تاپشىلىعى ايقىن سەزىلەدى. سونىڭ سالدارىنان كوپتەگەن جاس ونەر مەن شىعارماشىلىقتان الشاقتاپ, ءوز قابىلەتتەرىن دامىتۋعا مۇمكىندىك تابا الماي وتىر. جاستاردىڭ ءبىر بولىگى تۋعان جەرىندە بولاشاعىن كورمەي, ۇلكەن قالالارعا كەتۋگە ۇمتىلادى.
بالالاردى ونەرگە باۋلۋعا سۇرانىس جوعارى بولعانىمەن, كادر تاپشىلىعى مەن شتات بىرلىكتەرىنىڭ جەتكىلىكسىزدىگى ماسەلەنى كۇردەلەندىرىپ تۇر.
ەمبى قالاسىندا مۋزىكا مەكتەبىن اشۋ نەمەسە قولدانىستاعى فيليالدىڭ ماتەريالدىق-تەحنيكالىق بازاسى مەن كادرلىق الەۋەتىن كۇشەيتۋ – جاس ۇرپاقتىڭ مادەني تاربيەسىنە, كاسىبي باعدار الۋىنا جانە ءوڭىردىڭ رۋحاني دامۋىنا قىزمەت ەتەتىن ماڭىزدى قادام بولار ەدى.
مىرزاعالي راحمانوۆ,
مۋزىكا ءپانىنىڭ مۇعالىمى, حالىق ۇلت اسپاپتارى وركەسترىنىڭ كوركەمدىك جەتەكشىسى
اقتوبە وبلىسى
