وزبەكستاندا بۇگىن تاڭەرتەڭ پرەزيدەنت سايلاۋى باستالدى

استانا. 29 ناۋرىز. بۇگىن تاڭەرتەڭ جەرگىلىكتى ۋاقىت بويىنشا 06:00 ساعاتتا وزبەكستاندا پرەزيدەنت سايلاۋىنا ارنالعان بارلىق 14 سايلاۋ وكرۋگى بويىنشا سايلاۋ ۋچاسكەلەرى اشىلىپ, ءوز جۇمىسىن باستاپ كەتتى. بۇل تۋرالى UZ24 حابارلادى. بارلىق ۋچاسكەلەردە الدىمەن وزبەكستان رەسپۋبليكاسىنىڭ مەملەكەتتىك گيمنى وينالدى. «سايلاۋ ۋچاسكەلەرىنە ءبىزدىڭ ەلىمىزدىڭ 20 ميلليون 798 مىڭ 52 ازاماتى تىركەلگەن», - دەلىنگەن حابارلامادا. ورتالىق سايلاۋ كوميسسياسى حابارلاعانداي, وزبەكستان رەسپۋبليكاسىنىڭ پرەزيدەنتتىگىنە سايلاۋ جاڭا قوعامدىق-ساياسي جانە الەۋمەتتىك-ەكونوميكالىق جاعدايدا ءوتىپ وتىر. وزبەكستان رەسپۋبليكاسى ورتالىق سايلاۋ كوميسسياسىنىڭ مارتەبەسى كوتەرىلدى. زاڭنامانى ابىرويمەن ساقتاۋ, ورتالىق سايلاۋ كوميسسياسىنىڭ شەشىمدەرىن بۇلجىتپاي ورىنداۋ جونىندەگى جاۋاپكەرشىلىك كۇشەيتىلدى. سايلاۋ ناۋقانى بارىسىندا باقىلاۋشىلار ينستيتۋتى مەن بۇقارالىق اقپارات قۇرالدارىن قاتىستىرا وتىرىپ, جاريالىلىق پەن اشىقتىقتى قامتاسىز ەتۋگە ايرىقشا زور كوڭىل بولىنۋدە. ورتالىق سايلاۋ كوميسسياسىندا الەمنىڭ 43 ەلى مەن 5 حالىقارالىق ۇيىمنان 300-گك جۋىق باقىلاۋشى تىركەلگەن. سايلاۋدىڭ مونيتورينگى ۇدايى جۇرگىزىلىپ تۇرادى. سايلاۋ ۇدەرىسىن كورسەتىپ تۇرۋعا وتاندىق جانە شەت ەلدىك باق-تاردىڭ مىڭعا تارتا وكىلدەرى قاتىسىپ جاتىر. سايلاۋعا كەلۋشى ازاماتتار تومەندەگى ءتورت كانديداتتىڭ وزدەرى قالاعان تۇلعالارىنا داۋىس بەرە الادى: - يسلام ابدۋگانيەۆيچ كاريموۆ, وزبەكستان ليبەرالدى-دەموكراتيالىق پارتياسى; - حاتامجون ابدۋراحمانوۆيچ كەتمونوۆ, وزبەكستان حالىق-دەموكراتيالىق پارتياسى; - ناريمون ماجيدوۆيچ ۋماروۆ, وزبەكستان سوتسيال-دەموكراتيالىق پارتياسى; - اكمال حولماتوۆيچ سايدوۆ,  «ميللي تيكلانيش» دەموكراتيالىق پارتياسى. مۇرات ايتقوجا. مانبە, سۋرەت: UZ24