ارالدىڭ بولاشاعى الدا

جۇما كۇنى الماتىدا بۇۇ باس حات­شى­سىنىڭ ورىنباسارى, بۇۇ-نىڭ ەۋرو­پالىق ەكونوميكا­لىق كوميسسياسىنىڭ اتقارۋشى حاتشى­سى يان كۋبيش­تىڭ, سون­داي-اق بۇۇ-نىڭ ەۋروپالىق ەكونومي­كالىق كوميسسياسىنىڭ قورشاعان ورتا جونىندەگى اۋماقتىق كەڭەسشىسى بو لي­بەرت­تىڭ حالىقارالىق ارالدى قۇتقارۋ قورى (حاقق) اتقارۋشى كوميتەتىنىڭ وكىلدەرىمەن كەزدەسۋى بولدى. وسى ءبىر شارانىڭ ءوتۋىنىڭ ءوزى­نەن-اق ءبىراز جايدى اڭعارعانداي بولاسىڭ. حالىق­ارا­لىق باس ۇيىم ارال وڭىرىندەگى قالىپتاسقان كۇر­­دەلى جاعدايعا بەيجاي قارامايدى, ونى ساۋىق­تىرۋعا بەلسەندى ارالاس­پاق. ال مۇنى جەر­گى­لىكتى ءوڭىردىڭ وكىل­دەرى ءتيىمدى پايدالانۋى كەرەك-اق. بۇل يگى قارىم-قاتىناس بيىلعى ءساۋىر ايىندا بۇۇ باس حاتشىسى پان گي مۋننىڭ ورتا ازيا ەلدە­رىن, ونىڭ ىشىندە ارال تەڭىزى ءوڭىرىن ارالاعاننان كەيىن ايتارلىقتاي بەلسەندى دە ناقتى سيپاتقا يە بول­عان. بۇۇ باسشىسى حاقق اتقارۋ­شى كوميتەتى تاراپىنان ءجۇر­گىزىلىپ جاتقان جۇمىستارعا جوعارى باعا بەرە وتىرىپ, الداعى ۋاقىتتا بۇۇ تا­­راپىنان پارمەندى قولداۋ كور­سەتى­لەتىنىن مالىمدەگەن. الماتىعا بۇۇ باس حاتشىسىنىڭ ورىنباسارى يان كۋبيش مىرزانىڭ كەلىپ, حاقق اتقارۋشى كو­ميتەتىنە مۇشە ەلدەر وكىلدەرىمەن كەز­دەسىپ, بولاشاق ءىستىڭ باعىت-باعدارىن اڭگىمە ەتۋى حالىق­ارالىق باس ۇيىم باسشىسىنىڭ تىلەك-ۋادەلەرىنىڭ ناقتى جۇزەگە اسۋى دەسە بولار. بۇگىنگى اڭگىمەنىڭ نەگىزىندە ءوت­كەن جىلعى ساۋىردە الماتىدا وتكەن ارال وڭىرىنە قاتىستى ەلدەر باس­شى­لارىنىڭ سامميتىندە قابىلدانعان بىرىككەن مالىمدەمە بويىنشا ءازىر­لەنىپ جاتقان 2011-2015 جىلدارعا “ارال تەڭىزى باس­سەينىندەگى ەلدەرگە كومەك كورسەتۋگە باي­لانىستى اتقا­رىلاتىن باعدارلا­ما­نى” ازىرلەۋگە قاتىستى ماسەلەلەر جات­قا­نى بەل­گىلى. بۇۇ باسشىلىعىمەن حاقق ات­قارۋ كوميتەتى مۇشەلەرى پىكىر­لەرى­نىڭ ءبىر ارنادا تابىسقانىن سول كەز­دە­سۋدەن كەيىن حاقق اتقارۋشى كومي­تە­تىنىڭ توراعاسى ساعيت يبا­تۋل­ليننىڭ, سون­داي-اق يان كۋبيشتىڭ ەگجەي-تەگ­جەي­لى سوزدەرىنەن اڭعار­عانداي بولاسىڭ. وسىنىڭ بارىنەن شىعارىلاتىن قورىتىندى – بۇكىل الەم الاڭداپ وتىر­عان ارال وڭىرىندەگى جاعدايدى ساۋىق­تىرۋعا بايلانىستى قىرۋار شارۋا تىندىرىلىپ جاتىر, الداعى ۋاقىتتا بۇل جۇمىس ورىستەي تۇسپەك. ايتار­لىق­تاي قارجى ءبولىپ وتىرعان دەمەۋشىلەر دە بار ەكەن, اۋقىمدى جۇمىستى ۇيلەس­تىرۋشىلەر دە ءىستىڭ كوزىن تاۋىپ جاتقان كورىنەدى. ەڭ باستىسى – بۇل ماسەلە حالىق­ارا­لىق ۇيىمداردىڭ نازارىندا, قامقورىندا. حالىقارالىق ۇيىمدار باسشى­لارى­نىڭ كەزدەسۋىنەن كەيىنگى اڭگى­مەدە قاتىسقان جۋرناليستەر كوڭىلدى وسىرەر سوزدەر ەستىدى. ونىڭ باستى ماز­مۇنى – ارالدىڭ بولاشاعى بار ەكەن, ويتكەنى وعان اراشاشىلار تابىلىپ وتىر. ماماديار جاقىپ.