شىمكەنتتە ۇيىمداسقان قىلمىستىق توپ مۇشەلەرى سوتتالدى

استانا. 29 ناۋرىز. شىمكەنتتە جالعان اكتسيز جاپسىرىلعان الكوگول ساتۋمەن اينالىسقان 10 ادامنان تۇراتىن ۇيىمداسقان قىلمىستىق توپتىڭ مۇشەلەرى سوتتالدى. بۇل تۋرالى «7 ارنا» حابارلادى. «شىمكەنتتە جۇرت ءدۇر سىلكىندىرگەن قىلمىستىق پروتسەسس اياقتالدى. ونىڭ قورىتىندىسىمەن ۇيىمداسقان قىلمىستىق توپتىڭ 10 قاتىسۋشىسى ءارتۇرلى مەرزىمگە جازاعا كەسىلدى. ءىس ماتەريالدارى بويىنشا, ولار ۇزاق ۋاقىت بويى جالعان اكتسيز ماركالى الكوگول ونىمدەرىن دايىنداپ, ولاردى ساتۋمەن اينالىسىپ كەلگەن. ايىپتالۋشىلاردىڭ اراسىندا شاراپ زاۋىتىنىڭ ديرەكتورى, ورال قالاسىندا تۇراتىن بيزنەسمەن, ءىرى ساۋدا جۇيەسىنىڭ بۋحگالتەرى جانە 7 بىردەي سالىق ينسپەكتورى بار», - دەلىنگەن حابارلامادا. سوتتالۋشىلار ورىندىعىندا 10 ايىپتالۋشىنىڭ تەك 7-ءى عانا وتىردى. سوتتا توراعالىق ەتۋشىنىڭ تۇسىندىرۋىنشە, تاعى 3 سالىق ينسپەكتورى اۋىرىپ قالۋلارىنا بايلانىستى ءبىر جىل بويى ۇيقاماقتا وتىرعان. ال قىلمىستىق ءىستىڭ نەگىزگى قاتىسۋشىلارى: شاراپ زاۋىتىنىڭ ديرەكتورى, ورالدىق جەكە كاسىپكەر جانە شىمكەنتتەگى ءىرى ساۋدا جۇيەسىنىڭ ەسەپشىسى مەملەكەتكە كەلتىرگەن كوپتەگەن ميلليون تەڭگە زالالدارى ءۇشىن ناقتى جازالار العان. «اتاپ ايتقاندا, «ۆينحاۋس» جشس-دا 77 ميلليون تەڭگەنىڭ, «ءتوتىنشى» جشس-دا 59 ميلليون تەڭگەنىڭ الكوگول ونىمدەرىنە جالعان اكتسيزدەر دايىندالىپ, ساۋداعا شىعارىلعان. الكوگول ونىمدەرى جالعان ەسەپ-باقىلاۋ جانە اكتسيز قاعازدارىمەن تاراتىلعان. وسىعان وراي «ۆينحاۋس» شاراپ زاۋىتىنىڭ ديرەكتورى كيتەروۆ دميتري الەكسەەۆيچ جالپى جيىنتىعى 8 جىل 6 ايعا, باتىسقازاقستاندىق جەكە كاسىپكەر گۋباشەۆ بەگينيات ۇلى 7 جىلعا, «فيركان» جشس-دا بۋحگالتەر بولىپ ىستەگەن راشيدوۆا زارينا 5 جىلعا باس بوستاندىقتارىنان ايرىلدى», - دەپ مالىمدەدى وڭتۇستىك قازاقستان وبلىستىق قىلمىستىق ىستەر جونىندەگى ارنايى مامانداندىرىلعان سوتىنىڭ سۋدياسى ءابينۇر قاراباەۆ. سۋديانىڭ اقپارى بويىنشا, بۋحگالتەر ەكىقابات بولۋىنا بايلانىستى جازاسىن كەيىنىرەك وتەيدى. بارلىق جەتى سالىق ينسپەكتورى سوت زالىنان بوساتىلدى. ولار ءبىر جىلعا بوستاندىقتارىن شەكتەۋ جازاسىن العان. قازىر شاراپ زاۋىتىن ليتسەنزياسىنان ايىرۋ ماسەلەسى شەشىلىپ جاتىر. ەسكە سالا كەتەيىك, بۇل قىلمىستىڭ سحەماسىن بۇدان ءبىر جارىم جىل بۇرىن قارجى پوليتسەيلەرى اشقان ەدى. ولار كاسىپورىندا اۋىسىمنىڭ رەسمي جۇمىس ۋاقىتى بىتكەننەن كەيىن قوسىمشا ءوندىرىس جەلىسىنىڭ ىسكە قوسىلاتىنىن انىقتاعان. سول كەزدە اراق پەن كونياكتىڭ ىدىستارىنا جالعان اكتسيزدىك ماركالار جاپسىرىلىپ, ساتۋعا شىعارۋ ءۇشىن باسقا جاقتارعا جونەلتىلەتىن بولعان. جەدەل ىزدەستىرۋ قىزمەتكەرلەرى كەڭ اۋقىمدى تەكسەرۋ جۇمىستارى بارىسىندا ەسەپكە الىنباعان ءبىر جارىم ميلليونان استام الككوگول شىنىلارىن تاپقان. ءدال وسىنداي قاماۋعا الۋ جۇمىستارى بارلىق وبلىستاردىڭ ورتالىقتارىندا جۇرگىزىلدى. ولار بويىنشا 10 قىلمىستىق ءىس قوزعالدى. «تەكسەرۋ كەزىندە ەكىنشى شاراپ زاۋىتىنىڭ ديرەكتورى جۇرەگىنە وپەراتسيا جاساتقان. سوندىقتان وعان قاتىستى قىلمىستىق ءىس بويىنشا بولەك ءوندىرىس جۇرگىزىلدى», - دەدى قاراباەۆ. ونىڭ مالىمەتى بويىنشا, ءبىر قىلمىستىق توپتى ۇيىمداستىرۋشى قولعا تۇسكەن, ال تاعى ەكى كاسىپورىننىڭ قۇرىلتايشىلارى بۇرىنعىسىنشا ىزدەستىرىلۋ ۇستىندە. قۇرىش نۇرىمبەت.