استانا. 28 ناۋرىز. فۋتبولدان 2016 جىلعى ەۋروپا چەمپيوناتىنىڭ ىرىكتەۋ ءتۋرنيرى اياسىندا قازاقستان ءوز الاڭىندا يسلانديامەن ويناپ, 0:3 ەسەبىمەن جەڭىلدى. بۇل تۋرالى egemen.kz حابارلادى.
كەزدەسۋدىڭ العاشقى ون مينۋتى ءبىزدىڭ كوماندانىڭ باسىمدىعىمەن ءوتتى. ءتىپتى 6-مينۋتتا ەسەپ اشاتىن تاماشا مۇمكىندىككە يە بولدىق. دەگەنمەن, يۋري كراسنوجاننىڭ شاكىرتتەرى شەشۋشى ساتتە ءمۇلت كەتتى. ۋاقىت وتكەن سايىن بەلسەندىلىگىن ارتتىرعان قوناقتار ءبىرىنشى كەزەڭنىڭ ورتاسىندا ءوز ويىن ورنەگىن تاپتى دەسەك, ارتىق ايتقاندىق ەمەس. ناتيجەسىندە, 20-مينۋتتا يسلانديانىڭ ارداگەر ويىنشىسى ەيدۋر گۋدونسەن ەسەپ اشتى. بۇل جەردە قاقپاشىمىز اندرەي سيدەلنيكوۆتىڭ قاتەلىگىن ايتا كەتكەن ءجون. قورعاۋشىلاردىڭ بىرىنەن پاس العان ول دوپتى يسلانديا ويىنشىسى يوحانن گۋدمۋندسسوننىڭ اياعىنا سالىپ بەردى. بىردەن العا ۇمتىلعان يوحانن كوماندالاس ارىپتەسى گۋدونسەنگە پاس شىعارىپ, سوڭعىسى ناتيجەلى سوققىنىڭ اۆتورى اتاندى.
ەكىنشى گول ستاندارتتى جاعدايدان كەيىن سوعىلدى. ويىننىڭ 32-مينۋتىندا قوناقتار ايىپ سوققىسىن ورىنداۋعا مۇمكىندىك الدى. گيلفي تور سيگۋردسسوننىڭ ايىپ الاڭىنا اسىرعان دوبىنا ءبىرىنشى بولىپ بيركير بيارناسون جەتتى. بىردەن باسىمەن سوققى باعىتتاعان ول قاقپانى ءدال كوزدەدى.
ۇزىلىستەن كەيىن دە ويىن ورنەگى وزگەرگەن جوق. ءبىزدىڭ كوماندانىڭ شابۋىلدارى كوبىنە اياقسىز قالىپ جاتتى. ال يسلانديا فۋتبولشىلارى ءوز الاڭدارىندا جۇرگەندەي تىم ەركىن وينادى. ءتىپتى ەكىنشى گولدان كەيىن ايتارلىقتاي شابۋىل دا ۇيىمداستىرعان جوق. ءسويتىپ ءجۇرىپ-اق ويىن تىزگىنىن ۋىستارىنان شىعارعان جوق. ماتچ سوڭىندا بيارناسون ەكىنشى گولىن سوعىپ, دۋبلدىڭ اۆتورى اتاندى.
ويىن بارىسىندا ءبىزدىڭ فۋتبولشىلاردان رەنات ابدۋللين مەن الەكسەي ششەتكيندە گول سوعاتىن تاماشا مۇمكىندىك بولعان ەدى. الايدا, ەكەۋى دە دوپتى ءجوندى تەبە المادى.
وسى جەڭىسىنەن كەيىن يسلانديا ۇپاي سانىن 12-گە جەتكىزدى. بۇل كورسەتكىش بويىنشا توپ باسىنداعى چەحيامەن تەڭەستى. دەگەنمەن, چەحتار بەسىنشى ويىندارىن ەندى وتكىزەدى.
ال قازاقستان ازىرگە 1 ۇپايمەن توپتىڭ ەڭ سوڭىندا كەلەدى. بۇگىن ءبىزدىڭ توپتا تاعى ەكى ويىن وتەدى. چەحيا ءوز الاڭىندا لاتۆيانى قابىلداسا, تۇركيا نيدەرلاندىعا قوناققا بارادى. ءبىزدىڭ كوماندا تۋرنير اياسىنداعى كەلەسى ويىنىن 12 ماۋسىم كۇنى ءوز الاڭىندا تۇركياعا قارسى وتكىزەدى.
سونىمەن باس كوماندامىزدىڭ تاعى ءبىر سۇرەڭسىز ويىنىنا كۋا بولدىق. ۋەفا-عا مۇشە بولعالى وزگەرگەن دۇنيە جوق. باياعى جارتاس – سول جارتاس. بۇگىنگى ماتچتا ەرەكشە ايتاتىن نارسە, نەگىزگى قۇرامدا بەس بىردەي قازاق فۋتبولشىسىنىڭ الاڭعا شىعۋى. سونداي-اق, كراسنوجان تاعى ەكى قازاق بالاسىن ويىنعا قوستى. ياعني, بۇگىنگى ويىندا بارلىعى جەتى قاراگوز دوپ تەپتى. ايتار دۇنيە وسى. باسقا كوڭىل قۋانتارلىق ەش قىزىق جوق...
ەلامان قوڭىر.
دەرەك: egemen.kz.
سۋرەت: vesti.kz.
ويىننىڭ حاتتاماسى:
قازاقستان – يسلانديا 0:3 (0:2)
28 ناۋرىز. استانا. «استانا-ارەنا» ستاديونى. 13 000 كورەرمەن. تورەشى: اناستاسيوس سيديروپۋلوس (گرەكيا). قازاقستان: اندرەي سيدەلنيكوۆ, سامات سماقوۆ, مارك گۋرمان (ەرمەك قۋانتاەۆ 67), رەنات ابدۋللين (الەكسەي ششەتكين 80), يليا ۆوروتنيكوۆ, گافۋرجان سۇيىمباەۆ, يۋري لوگۆينەنكو, ازات نۇرعاليەۆ (ۇلان قونىسباەۆ 56), باۋىرجان يسلامحان, اسحات تاعىبەرگەن, داۋرەنبەك تاجىمبەتوۆ. يسلانديا: حاننەس حاللدورسون, راگنار سيگۋردسسون, بيركير مار سەۆارسسون, اري فرەير سكۋلاسون, بيركير بيارناسون, كاري ارناسون, ارون گۋننارسسون (ەميل حوللفرەدسسون 72), گيلفي تور سيگۋردسسون, يوحانن گۋدمۋندسسون, ەيدۋر گۋدونسەن (الفرەد فيننبوگاسون 84), كولبەينن سيگتورسسون (يون دادي بودۆارسسون 70). گولدار: ەيدۋر گۋدونسەن 20, بيركير بيارناسون 32, 90+1. ەسكەرتۋلەر: ازات نۇرعاليەۆ 55, ەرمەك قۋانتاەۆ 70 – اري فرەير سكۋلاسون 62.
