ستۋدەنتكە يپوتەكا بەرىلە مە؟

18 جاسقا تولعان ازاماتتار «وتباسى بانكىنىڭ» بىرقاتار باعدارلاماسىنا قاتىسۋعا مۇمكىندىگى بار. سونىمەن قاتار «تسەنتركرەديت بانكى» ارقىلى جۇزەگە اسىرىلاتىن «7-20-25» باعدارلاماسىمەن دە باسپاناعا يپوتەكا راسىمدەي الادى. دەگەنمەن ساراپشىلار جاستارعا ەڭ قولايلى تەتىكتەردىڭ ءبىرى رەتىندە «ناۋرىز» باعدارلاماسىن اتاپ ءجۇر. باعدارلامانىڭ باستى ەرەكشەلىگى – ستۋدەنتتەردىڭ شاكىرتاقىسى رەسمي تابىس رەتىندە ەسەپكە الىنادى. ەگەر شاكىرتاقى كولەمى جەتكىلىكسىز بولسا, باعدارلاما شارتتارىنا سايكەس ءبىر نەمەسە ەكى كەپىلگەر تارتۋعا بولادى.

يپوتەكا ساراپشىسى گۇلبيبى جاقسىبايدىڭ ايتۋىنشا, باعدارلاماعا قاتىسۋ ءۇشىن ەڭ الدىمەن «وتباسى بانكىندەگى» جيناق شوتىندا بەلگىلى ءبىر كولەمدە قاراجات بولۋى قاجەت.

«ستۋدەنت الدىمەن جيناق شوتىن 2 ملن تەڭگەگە تولىقتىرادى. كەيىن Baspana Market پلاتفورماسى ارقىلى ءوتىنىم بەرەدى. ءوتىنىم تاپسىرىلعان كەزدە ەسەپشوتتاعى قاراجات تولىق كولەمدە جاتۋعا ءتيىس. شامامەن ءبىر اپتادان كەيىن كونكۋرستىڭ قورىتىندىسى جاريالانادى. قاتىسۋشىلاردى ىرىكتەۋ بارىسىندا جيناقتاعى سىياقى كورسەتكىشى ەسكەرىلەدى. ياعني ۇزاق ۋاقىت تۇراقتى تۇردە قاراجات جيناعان ازاماتتاردىڭ مۇمكىندىگى جوعارى بولادى», دەيدى مامان.

ساراپشىنىڭ سوزىنشە, كونكۋرس ارقىلى ىرىكتەلگەن قاتىسۋشىلار تابىسىن راستاۋ كەزەڭىنەن وتەدى. بۇل ءراسىمدى بانك بولىمشەسىندە دە, ونلاين فورماتتا دا جۇرگىزۋگە بولادى. ستۋدەنتتەردىڭ شاكىرتاقىسى تابىس رەتىندە قابىلدانادى. سونىمەن قاتار كەپىلگەر رەتىندە تارتىلاتىن ادامنىڭ رەسمي جۇمىسى بولۋى ءارى زەينەتاقى جارنالارى تۇراقتى اۋدارىلىپ تۇرۋى قاجەت. كەلەسى كەزەڭدە العاشقى جارنا ەنگىزىلەدى. مىسالى, پاتەر قۇنى 30 ملن تەڭگە بولسا, العاشقى جارنا 6 ملن تەڭگەنى قۇرايدى. بۇعان دەيىن جيناقتالعان
2 ملن تەڭگە سول سومانىڭ ىشىنە كىرەدى دە قوسىمشا 4 ملن تەڭگە سالىنادى. ال 25 ملن تەڭگەلىك تۇرعىن ءۇي ءۇشىن
5 ملن تەڭگە, 20 ملن تەڭگەلىك باسپانا ءۇشىن 4 ملن تەڭگە كولەمىندە العاشقى جارنا كەرەك.

«ناۋرىز» باعدارلاماسى اياسىندا الەۋمەتتىك وسال توپتار ءۇشىن نەسيە مولشەرلەمەسى جىلدىق 7 پايىز بولسا, وزگە قاتىسۋشىلارعا 9 پايىز بولىپ بەلگىلەنگەن. نەسيە مەرزىمى 19 جىلعا دەيىن بەرىلەدى. باعدارلاما ارقىلى استانا مەن الماتى قالالارىندا 36 ملن تەڭگەگە دەيىنگى, ال باسقا وڭىرلەردە 30 ملن تەڭگەگە دەيىنگى تۇرعىن ءۇي ساتىپ الۋعا بولادى. جالپى, بۇگىندە جاستاردىڭ باسپانالى بولۋىنا باعىتتالعان مۇمكىندىكتەر كوبەيىپ كەلەدى. سوندىقتان ستۋدەنتتىك كەزەڭنەن باستاپ قارجى جيناپ, تۇرعىن ءۇي باعدارلامالارىنىڭ شارتتارىن زەرتتەۋ بولاشاقتا ءوز باسپاناسىنا قول جەتكىزۋگە كومەكتەسۋى مۇمكىن», دەيدى گ.جاقسىباي.

داريعا دارحان,

ل.ن.گۋميلەۆ اتىنداعى ەۇۋ ستۋدەنتى