سولتۇستىك قازاقستاندا الاياق ازامات 11 جىلعا سوتتالدى

پەتروپاۆل. 28 ناۋرىز. پەتروپاۆلدا قىلمىستىق ىستەر جونىندەگى مامانداندىرىلعان اۋدانارالىق سوتى يۋسيف گۋسەينوۆقا قاتىستى قىلمىستىق ءىستى قاراپ, ۇكىم شىعاردى. بۇل تۋرالى سولتۇستىك قازاقستان وبلىستىق سوتتىڭ ءباسپاسوز قىزمەتى حابارلادى. يۋ.گۋسەينوۆ پەتروپاۆل قالاسىنىڭ تۇرعىنى ك. دەگەن ازاماتتى الاياقتىق جولمەن الداپ, «HAMMER H2» ماركالى اۆتوكولىگىن يەمدەنىپ كەتكەن. قىلمىستىق ءىزىن جاسىرۋ ماقساتىمەن ول قىرعىزستاندا بوي تاسالاپ جۇرگەن. سول جاقتا ءجۇرىپ-اق وسىنداعى ف.يسرافيلوۆ جانە س.باتاەۆ دەگەن سىبايلاستارىمەن الدىن الا ءسوز بايلاسىپ, 69 كيلو 285 گرامم ەسىرتكى زاتىن (گاشيش) سولتۇستىك قازاقستان وبلىسىنا جەتكىزگەن. ودان ءارى رەسەيگە وتكىزبەك بولعان ارام ويلارىنا وبلىستىق ۇلتتىق قاۋىپسىزدىك دەپارتامەنتىنىڭ قىزمەتكەرلەرى توسقاۋىل بولدى. ءىس سوتقا جولدانىپ, قىلمىسكەرلەر ءتۇرلى مەرزىمگە جازاعا كەسىلدى. قىلمىستىق قۋدالاۋ ورگاندارىنان جاسىرىنعان يۋ.گۋسەينوۆكە حالىقارالىق ىزدەۋ جاريالانىپ, 2014 جىلى بىشكەك قالاسىنىڭ حالىقارالىق اۋەجايىندا قولعا تۇسكەن. سولتۇستىك قازاقستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ۇكىمىمەن يۋسيف گۋسەينوۆ قىلمىستىق كودەكستىڭ 177-بابى بويىنشا ايىپتى دەپ تانىلدى. سوعان سايكەس, 11 جىلعا باس بوستاندىعىنان ايىرىلدى. ءومىر ەسقالي. دەرەك: سولتۇستىك قازاقستان وبلىستىق سوتتىڭ ءباسپاسوز قىزمەتى. سۋرەت: members.vb.kg.