چەمپيوندار ليگاسى. «استانا» كيپردىڭ كومانداسىن جەڭدى (ۆيدەو)

استانا. 19 تامىز. وتكەن تۇندە «استانا» ۋەفا چەمپيوندار ليگاسى ىرىكتەۋ ءتۋرنيرىنىڭ پلەي-وفف باسەكەسىندەگى العاشقى ويىنىن وينادى. وسى سىندا ەلوردالىقتاردىڭ قارسىلاسى كيپردىڭ اپوەل كومانداسى بولعانى بەلگىلى. تارتىس ماتچتىڭ ناتيجەسىندە «استانا» 1:0 ەسەبىمەن جەڭىسكە جەتتى. بۇل تۋرالى egemen.kz حابارلادى. كەزدەسۋ «استانا ارەنا» سپورت كەشەنىندە ءوتتى. ويىندى الاڭ يەلەرى وتە بەلسەندى باستادى. ءتىپتى 4-مينۋتتا فۋتبولشىلارىمىز قاۋىپتى شابۋىل ۇيىمداستىرىپ, سوققى جاساپ ۇلگەردى. فوكسي كەتەۆوامانىڭ بەرگەن پاسىن باۋىرجان جولشيەۆ قاقپاعا باعىتتاعان. الايدا, دوپ نىسانادان قيىس كەتتى. ماتچتىڭ 13-مينۋتىندا الاڭ يەلەرى كوزدەگەن ماقساتتارىنا جەتىپ, ەسەپ اشتى. گولدىڭ اۆتورى جولشيەۆ بولسا, وعان ناتيجەلى پاس شىعارىپ بەرگەن كەتەۆواما ەكەنىن ايتا كەتەيىك. ۇزىلىسكە دەيىن ەسەپ وزگەرگەن جوق. ەكىنشى تايم قوناقتاردىڭ باسىمدىعىمەن ءوتتى. نەگىزىنەن قورعانىسقا ءمان بەرىپ, قارىمتا شابۋىلدارعا عانا يەك ارتقان «استانا» قارسىلاستارىنا ەركىن ويناۋعا مۇمكىندىكتەر بەرىپ قويدى. ابىروي بولعاندا, كيپردەن كەلگەن ويىنشىلار ءبىزدىڭ قاقپادان ساڭىلاۋ تابا المادى. وسى رەتتە كەيبىر جاعدايدا بىزگە ساتتىلىكتىڭ جولداس بولعانىن نازارعا الۋىمىز كەرەك. ناتيجەسىندە ويىن سوڭىنا دەيىن 1:0 ەسەبى ساقتالىپ, بولگار مامانى ستانيمير ستويلوۆ جاتتىقتىراتىن كوماندامىز جەڭىسكە جەتتى. ەندى 26 تامىزدا قوس قارسىلاس كيپردە قارىمتا كەزدەسۋ وتكىزەدى. ويىن بارىسىنداعى كەيبىر ستاتيستيكالىق كورسەتكىشتەرگە نازار اۋدارايىق. دوپقا يەلىك ەتۋ ناتيجەسى بويىنشا قوناقتار الدا بولدى (61% – 39%). سونداي-اق, قاقپاعا جاسالعان سوققىلار سانى جونىنەن دە اپوەل باسىم ءتۇستى (12 – 13). ونىڭ ىشىندە نىساناعا ءدال باعىتتالعانى بويىنشا كورسەتكىش «استانانىڭ» پايداسىنا 6 – 2. ۋەفا چەمپيوندار ليگاسى. ىرىكتەۋ ءتۋرنيرىنىڭ پلەي-وفف باسەكەسى. «استانا» (استانا, قازاقستان) – اپوەل (نيكوسيا, كيپر) 1:0 (1:0) 18 تامىز. استانا. «استانا ارەنا» سپورت كەشەنى. 30 000 كورەرمەن. تورەشىلەر: ۆيكتور كاششاي, دەرد رينگ, ۆەنتسەل توت ء(بارى دە – ۆەنگريا). «استانا»: نەناد ەريچ, ەۆگەني پوستنيكوۆ, مارين انيچيچ, برانكو يليچ, دميتري شومكو, فوكسي كەتەۆواما (سەرىكجان مۇجىقوۆ 90+2), نەمانيا ماكسيموۆيچ, روحەر كانياس, تاڭات نوسەرباەۆ (جۋنيور كابانانگا 68), گەورگي جۋكوۆ (ابزال بەيسەبەكوۆ 85), باۋىرجان جولشيەۆ. اپوەل: بوي ۆاتەرمان, كارلاۋ, ماريۋ سەرجيۋ, ماريوس انتونيادەس, ينياكي استيس, نۋنۋ مورايش, گەورگيوس ەفرەم (سەمير شتيليچ 63), كونستانتينوس ماكريديس (پيەروس سوتيريۋ 85), نەكتاريوس الەكساندرۋ (ماتەۋش پەنتكوۆسكي 46), توماس سەباستيان دە ۆينسەنتي, لۋيس لەال. گول: باۋىرجان جولشيەۆ 13. ەسكەرتۋلەر: دميتري شومكو 78 – توماس سەباستيان دە ۆينسەنتي 14. ەلامان قوڭىر. دەرەك: egemen.kz. سۋرەت: sports.kz.