بايقوڭىردان رەسەيگە جالعا بەرىلگەن جەر قايتارىلادى

استانا. 28 ناۋرىز. رەسەيگە بايقوڭىردان جالعا بەرىلگەن 25 مىڭ شارشى مەتر جەردى قايتارىپ الۋعا بايلانىستى الدىن-الا كەلىسىم جاسالدى. بۇل تۋرالى kyzylorda-news.kz حابارلادى. اتالمىش جايت قىزىلوردا وبلىسىنىڭ اكىمى قىرىمبەك كوشەرباەۆتىڭ بايقوڭىر قالاسىنا جۇمىس ساپارى بارىسىندا فەدەرالدىق عارىش اگەنتتىنىڭ توراعاسى يگور كوماروۆپەن كەزدەسۋىندە ءمالىم بولدى. ماسەلە وڭىنان شەشىلسە, بۇل جەردىڭ 3 579 گەكتارى تورەتام كەنتىنە بەرىلەدى. ونىڭ 184 گەكتارى جاڭادان كەنت ورتالىعىن سالۋعا, 90 گا. كاسىپكەرلىكتى دامىتۋعا, 145 گا. جەر كەنتتىڭ اۋماعىن كەڭەيتۋگە باعىتتالماق. ال 122 گا. اقايدىڭ اۋماعىن كەڭەيتۋگە پايدالانىلادى. سونداي-اق, 21 344 گا. حالىقارالىق «باتىس ەۋروپا – باتىس قىتاي» كولىك ءدالىزىنىڭ بويىندا كولىك-لوگيستيكالىق ينفراقۇرىلىم سالۋعا جانە «بەينەۋ-شىمكەنت» گاز قۇبىرىنىڭ جەلىلىك بولىگىن وتكىزۋ ماقساتىنا قولدانىلادى. سونداي-اق, باسقوسۋدا بايقوڭىر قالاسىندا ءتۋريزمدى دامىتۋ, 6 مەكتەپتى قازاقستاندىق ستاندارتقا كوشىرۋ, جەڭىستىڭ 70 جىلدىعىمەن جانە «بايقوڭىر» كەشەنىنىڭ 60 جىلدىعىن مەرەكەلەۋ ماسەلەلەرى تالقىلاندى. بولاشاقتا «بايقوڭىر» عارىش ايلاعى تۋريستىك ورتالىققا اينالادى. بۇل ماقساتتا عارىش كەمەلەرىنىڭ ۇشۋىن تاماشالايتىن ارنايى كەشەندەر سالىنباق. قازىرگى «كرايني» اۋەجايى كۇردەلى جوندەۋدەن وتكىزىلىپ, استانا-قىزىلوردا-بايقوڭىر, الماتى-قىزىلوردا-بايقوڭىر باعىتتارىندا اۋە رەيىستەرىن اشۋ باعىتىندا جۇمىستار جاسالۋدا. بۇعان قوسا, بايقوڭىرعا كىرۋگە رۇقسات بەرۋگە ارنالعان قۇجاتتاردى دايىنداۋ جەڭىلدەتىلمەك. جولدىباي بازار. دەرەك, سۋرەت: kyzylorda-news.kz.