Ktk.kz-ءتىڭ حابارلاۋىنشا, اپاتتىڭ كۋاگەرلەرى جالعان جاۋاپ بەردى دەگەن كۇدىككە ىلىنگەن. ناقتىراق ايتساق, اڭگىمە اپاتقا سەبەپشى بولعان Zeekr اۆتوكولىگى جۇرگىزۋشىسىنىڭ دوستارى تۋرالى بولىپ وتىر. جابىرلەنۋشى تاراپتىڭ ادۆوكاتى مالىمدەگەندەي, تەرگەۋ كەزىندە ولار كىنالى دەپ تانىلعان جۇرگىزۋشىنىڭ ماس بولعانىن جاسىرۋعا تىرىسقان.
كۇدىكتىنىڭ دوستارى العاشقى تەرگەۋ كەزىندە ونىڭ ىشىمدىك ىشپەگەنىن العا تارتقان. الايدا مەديتسينالىق ساراپتاما جۇرگىزۋشىنىڭ قانىندا 1,3 پروميللە الكوگول بولعانىن انىقتادى. انىقتاۋشىلار قول جەتكىزگەن مەيرامحانا شوتىنىڭ كوشىرمەسىندە سپيرتتىك ىشىمدىكتەرگە تاپسىرىس بەرىلگەنى رەسمي تۇردە دالەلدەنگەن.
ءال-فارابي داڭعىلىنداعى اپات: كۇدىكتى سوتتا ءوز كىناسىن تولىق مويىندادى
وسىعان بايلانىستى بۇل ماتەريال بولەك وندىرىسكە الىنىپ, تەرگەۋ باسقارماسىنا جولداندى. زاڭ بويىنشا, كورىنەۋ جالعان جاۋاپ بەرگەن كۋاگەرلەردىڭ كىناسى دالەلدەنسە, ولار 6 جىلعا دەيىن باس بوستاندىعىنان ايىرىلۋى مۇمكىن.
ەسكە سالا كەتەيىك, جانتۇرشىگەرلىك جول اپاتى وسىدان ەكى اي بۇرىن بولعان ەدى. تەرگەۋ نۇسقاسى بويىنشا ماس جۇرگىزۋشى تىزگىندەگەن Zeekr كولىگىنە جالعان ءنومىر تاعىلعان. كولىك قالا ىشىندە 219 شاقىرىم/ساعات جىلدامدىقپەن ءجۇرىپ, قارسى بەتكە شىعىپ كەتكەن جانە Mercedes كولىگىنە سوعىلعان. سوققى سالدارىنان Mercedes-ءتىڭ 29 جاستاعى جۇرگىزۋشىسى مەن 20 جانە 22 جاستاعى ەكى بويجەتكەن جولاۋشىسى وقيعا ورنىندا ءتىل تارتپاي كەتتى.
سوت وتىرىسىندا قازا تاپقان ەكى ازاماتتىڭ جاقىندارى جۇرگىزۋشىنى كەشىرگەندەرىن ايتىپ, ونى باس بوستاندىعىنان ايىرماۋدى سۇرادى. ولار مۇنى ايىپتالۋشى تاراپتىڭ شىعىندى تولىق وتەپ بەرگەنىمەن ءتۇسىندىردى. قازى سوت پروتسەسى جالعاسىپ جاتىر.
