ەلباسى استانا كۇنىنە وراي وتەتىن مەرەكەلىك شارالارعا قاتىسادى

استانا. 29 ماۋسىم. مەملەكەت باسشىسىنىڭ الداعى ءىس-شارالار اڭداتپاسى جاريالاندى. بۇل تۋرالى akorda.kz حابارلادى. قازاقستان پرەزيدەنتىنىڭ قاتىسۋىمەن 2 شىلدەدە يندۋستريالاندىرۋ كۇنىن وتكىزۋ جوسپارلانۋدا. ءىس-شارا «نۇرلى جول» جانە ەلدى يندۋستريالىق-يننوۆاتسيالىق دامىتۋ جونىندەگى مەملەكەتتىك باعدارلامالاردىڭ جۇزەگە اسىرىلۋ بارىسىنا ارنالادى. ونىڭ شەڭبەرىندە يندۋستريالاندىرۋ كارتاسىنداعى جاڭا جوبالاردى جانە «نۇرلى جول» باعدارلاماسى اياسىنداعى ينفراقۇرىلىمدىق نىساندار قۇرىلىسىن ىسكە قوسۋ ءراسىمى وتەدى. سونىمەن قاتار, قازاقستاننىڭ ءوندىرىس تاۋارلارىنىڭ كورمەسى ۇيىمداستىرىلادى. سونداي-اق, 3 شىلدەدە وتەتىن جيىندا جاڭعىرتۋ جونىندەگى ۇلتتىق كوميسسيانىڭ ەسەبى تىڭدالادى. ال 4-6 شىلدە كۇندەرى مەملەكەت باسشىسىنىڭ استانا كۇنىنە ارنالعان ءىس-شارالارعا قاتىسۋى جوسپارلانعان. شىلدەنىڭ سەگىزىندە ەلىمىزگە ءۇندىستان پرەمەر-ءمينيسترى نارەندرا مودي ساپارمەن كەلەدى. ساپار بارىسىندا قازاقستان-ءۇندىستان ىنتىماقتاستىعىن ودان ءارى نىعايتۋ جولدارى قاراستىرىلادى. ودان بولەك, 9-10 شىلدەدە قازاقستان پرەزيدەنتىنىڭ رەسەي فەدەراتسياسىنىڭ ۋفا قالاسىندا وتەتىن شىۇ جانە بريكس سامميتتەرىنە قاتىسۋى كوزدەلگەن. سونىمەن قاتار, پرەزيدەنتتىڭ ءباسپاسوز قىزمەتى 3 شىلدەدە مەملەكەت باسشىسىنىڭ akorda.kz رەسمي سايتىنىڭ جاڭارتىلعان نۇسقاسىن ىسكە قوسۋدى جوسپارلاپ وتىر. جاڭا سايتتىڭ ەرەكشەلىكتەرى رەتىندە ونىڭ قولايلى قۇرىلىمى مەن ناۆيگاتسيالارىن, سايتتىڭ پلانشەتتەر مەن سمارتفونداردا تولىق كورىنۋىنە لايىقتالعان ديزاينىن, «پرەزيدەنتكە حات» فۋنكتسياسى اياسىندا مەملەكەت باسشىسىنا حات جولداۋ مۇمكىندىگى قاراستىرىلعانىن اتاپ ايتۋعا بولادى. ەلامان قوڭىر. دەرەك, سۋرەت: akorda.kz.