اسكەري قىزمەت – وتان الدىنداعى بورىش

بيىلعى 1 ساۋىردەن باستاپ «اسكەري قىز­مەت جانە اسكەري قىزمەتشىلەردىڭ مارتەبەسى تۋرالى» زاڭ مەن وسى جىلعى 20 اقپانداعى №1011 «اسكەري قىزمەتتىڭ بەلگىلەنگەن مەرزىمىن وتكەرگەن مەرزىمدى اسكەري قىزمەتتەگى اسكەري قىزمەتشىلەردى زاپاسقا شىعارۋ جانە قازاقستان رەسپۋبليكاسىنىڭ ازاماتتارىن ۇستىمىزدەگى جىلدىڭ ءساۋىر-ماۋسىمىندا جانە قازان-جەلتوقسانىندا مەرزىمدى اسكەري قىزمەتكە كەزەكتى شاقىرۋ تۋرالى» قازاقستان رەسپۋبليكاسى پرەزيدەنتىنىڭ جارلىعىنا سايكەس ازاماتتاردى كوكتەمگى مەرزىمدى اسكەري قىزمەتكە شاقىرۋ بويىنشا ءىس-شارالار باستالدى. 2015 جىلدىڭ كوكتەمىندە اسكەرگە شاقىرۋدى كەيىنگە قالدىرۋعا نەمەسە ودان بوساتىلۋعا قۇقىعى جوق 18 جاستان 27 جاسقا دەيىنگى ەر ازاماتتار, سونداي-اق, وقۋ ورىندارىنان شىعارىلعان, 27 جاسقا تولماعان جانە اسكەرگە شاقىرۋ بويىنشا اسكەري قىزمەتتىڭ بەلگىلەنگەن مەرزىمدەرىن وتكەرمەگەن 29 مىڭنان استام ەر ازامات مەرزىمدى اسكەري قىزمەتكە شاقىرىلۋعا جاتادى. قازاقستان رەسپۋبليكاسى قارۋلى كۇشتەرى قاتارىنا 4 مىڭعا جۋىق ازاماتتاردى اسكەرگە شاقىرۋ جوسپارلانۋدا, ال قالعان ازاماتتى قازاقستان رەسپۋبليكاسى مەملەكەتتىك كۇزەت قىزمەتى, قازاقستان رەسپۋبليكاسى ۇلتتىق ۇلانى مەن قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ اسكەري بولىمدەرىنە جىبەرىلەتىن بولادى. زاماناۋي تالاپتاعى اسكەرگە شاقىرىلۋدىڭ ەرەكشەلىگى – ونىڭ اشىقتىعى. بۇل ەڭ الدىمەن جۇرتشىلىق وكىلدەرىنىڭ شاقىرۋ كوميسسياسىنىڭ جۇمىسىنا قاتىسۋى ارقىلى جۇزەگە اسىرىلادى. سونىمەن قاتار, 2015 جىلعى 1 قاڭتاردان باستاپ اكىمشىلىك قۇقىق بۇزۋشىلىق كودەكسى مەن قىلمىستىق كودەكسكە وزگەرىستەر مەن تولىقتىرۋلار ەنگىزىلدى. جاڭا قىلمىستىق كودەكستە اسكەري بورىشىن وتەۋدەن جالتارعانى ءۇشىن جازالاۋ شارالارى كۇشەيتىلدى. اتاپ ايتقاندا, زاڭ بۇزۋشىلارعا اقشالاي ايىپپۇل سالۋمەن قاتار, اسكەرگە شاقىرۋدان جۇيەلى تۇردە باس تارتقان ازاماتتاردى قاماۋعا الۋ جازاسى قاراستىرىلعان. بيىل قورعانىس مينيسترلىگىنىڭ باسشىلىعى قويعان تاپسىرمالارعا سايكەس جەرگىلىكتى اسكەري باسقارۋ ورگاندارى كەلىسىمشارت بويىنشا اسكەري قىزمەتشىلەر مەن مەرزىمدى اسكەري قىزمەت جاۋىنگەرلەرىنىڭ اراقاتىناسى 80% دا 20% قۇرايتىندىعىن اتادى. وتكەن جىلى بۇل اراقاتىناس 70% دە 30% قۇراعان بولاتىن. جەرگىلىكتى اتقارۋشى ورگانداردىڭ شەشىمى بويىنشا اسكەرگە شاقىرۋ ناۋقانى كەزىندە ازاماتتاردى دارىگەرلىك كۋالاندىرۋدى قامتاماسىز ەتەتىن شاقىرۋ جانە مەديتسينالىق كوميسسيا قۇرىلادى. ەستەرىڭىزگە سالا كەتسەك, مەرزىمدى اسكەري قىزمەتكە شاقىرۋ «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسىنىڭ زاڭىنا سايكەس جىلىنا ەكى مارتە ۇيىمداستىرىلىپ, وتكىزىلەدى. ورتالىق كوممۋنيكاتسيالار قىزمەتىندە وتكەن بريفينگكە قازاقستان قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى – جاساقتاۋ باسقارماسىنىڭ باستىعى, پولكوۆنيك امانتاي وسەرباەۆ, استانا قالاسى قورعانىس ىستەرى جونىندەگى دەپارتامەنتىنىڭ باستىعى, پولكوۆنيك تالعات امانگەلديەۆ پەن قورعانىس مينيسترلىگى ورتالىق اسكەري-دارىگەرلىك كوميسسياسى اسكەري قىزمەتشىلەردى (اسكەري مىندەتتى) ساراپتاۋ جانە اسكەري جوعارى وقۋ ورىندارىن جاساقتاۋ بولىمشەسىنىڭ باستىعى, پولكوۆنيك نۇرجان ارتىقوۆ قاتىسىپ, جوعارىدا ايتقان ماسەلەلەر تۋرالى جان-جاقتى اقپارات بەرگەن بولاتىن. بەرىك سادىر, «ەگەمەن قازاقستان».