پەتروپاۆلدىقتار مەردىگەرلەردەن ءتۇڭىلىپ وتىر

پەتروپاۆل. 28 اقپان. سوڭعى كەزدەرى قالا تۇرعىندارى تاراپىنان «تۇرعىن ءۇي-كوممۋنالدىق شارۋاشىلىقتى جاڭعىرتۋ» باعدارلاماسىنىڭ ساپاسىز جۇرگىزىلۋىنە بايلانىستى كوپ سىندار ايتىلىپ كەلەدى. بۇل تۋرالى egemen.kz ءتىلشىسى حابارلادى. بىلتىر ۇل سالاعا رەسپۋبليكالىق قازىنادان 777 ميلليون تەڭگە باعىتتالعانىمەن, شالاعاي اتقارىلعان جۇمىستاردىڭ سالدارىنان بىرقاتار قۇرىلىس مەردىگەرلەرىمەن شارتتى ۇزۋگە تۋرا كەلگەن. 45 كوپ قاباتتى ءۇيدىڭ 39-نىڭ جوندەۋى اياقتالعانىمەن, 6 ءۇيدى قالپىنا كەلتىرۋ لداعى جىلىتۋ ماۋسىمىنا دەيىن شەگەرىلگەن. بۇل جونىندە «نۇر وتان» پارتياسى دەپۋتاتتار فراكتسياسىنىڭ ماجىلىسىندە ەسەپ بەرگەن تۇرعىن ءۇي ينسپەكتسياسىنىڭ جەتەكشىسى داۋلەت قالياسقاروۆ باياندادى. ماسەلەن, 2-ءشى زارەچنايا كوشەسىندە ورنالاسقان 58-ءشى ءۇيدىڭ تۇرعىندارى «كازتەپلومونتاج» جشس-مەن كەلىسىم-شارتتى توقتاتۋلارىنا تۋرا كەلگەن. ويتكەنى, جوندەۋ جۇمىستارى كەزىندە ەكى پاتەردى سۋ الىپ كەتكەن. ونىڭ اقىرى 900 مىڭ تەڭگە وتەماقى تولەۋگە سوقتىرعان. جوندەۋ جۇمىستارىن جالعاستىرۋ «مەكونا» سەرىكتەستىگىنە جۇكتەلگەن. «جيلماسسيۆ» مەردىگەرلىك كومپانياسى ينتەرناتسيونال كوشەسىندەگى 68-ءشى ءۇيدىڭ تۇرعىندارىنا 450 مىڭ تەڭگە وتەماقى تولەۋىنە ءماجبۇر بولعان. سەبەبى جوندەۋ جۇمىستارى ءاتۇستى اتقارىلىپ, ادامداردىڭ نارازىلىعى جيىلەپ كەتكەن. – پەتروپاۆلدىقتاردى تۇرعىن ءۇي-كوممۋنالدىق شارۋاشىلىق سالاسىندا قوردالانىپ قالعان ماسەلەلەر قاتتى تولعاندىرادى. ونى ءبىز ولارمەن وتكىزگەن 12 كەزدەسۋ بارىسىندا بايقادىق. ارىزداردىڭ دەنشىلىگى مەردىگەرلەردىڭ ساپاسىز جۇمىستارىنا كەلىپ تىرەلەدى, دەيدى قالالىق ءماسليحاتتىڭ دەپۋتاتى ۆيكتور لي. ءومىر ەسقالي. دەرەك: egemen.kz. سۋرەت: ueikh.sko.gov.kz.