ماسكەۋدە بوريس نەمتسوۆ ءولتىرىلدى

استانا. اقپاننىڭ 27-نەن 28-نە قاراعان ءتۇنى ماسكەۋ قالاسىنىڭ ورتالىعىندا بەلگىلى ساياساتكەر بوريس نەمتسوۆ ءولتىرىلدى. بۇل تۋرالى «كوممەرسانت» حابارلادى. «جۇمادان سەنبىگە قاراعان ءتۇنى ماسكەۋدىڭ ورتالىعىندا رەسەيدىڭ سوڭعى 25 جىلداعى ەڭ تانىمال ساياساتكەرلەرىنىڭ ءبىرى بوريس نەمتسوۆ ءولتىرىلدى. ول اتقاراتىن قىزمەتىنىڭ قانداي بولعانىنا قاراماستان, ساياساتتا دا, قوعامدىق ومىردە دە وراسان زور رول اتقاردى», - دەپ جازادى باسىلىم. «بوريس نەمتسوۆتىڭ ءومىربايانىنا قاراي وتىرىپ, كەڭەستىك كەزەڭنەن كەيىنگى رەسەيدىڭ تاريحىن زەرتتەۋگە بولادى. ءوزىنىڭ كۇش-قۋاتىنىڭ جانە ادامدارمەن سويلەسە ءبىلۋ قابىلەتىنىڭ ارقاسىندا العاشقى تولقىنداعى دەموكرات الدىمەن دەپۋتات, سوسىن تومەنگى نوۆگورود وبلىسىنىڭ گۋبەرناتورى بولدى. ەلتسيننىڭ ءبىرىنشى شاقىرۋىنداعى باسقارماشى ءوزىنىڭ العاشقى قاتەلىكتەرىنەن قورىتىندى شىعارىپ, سول ارقىلى باسقالاردى دا تاربيەلەدى. گۋبەرناتور رەتىندە شەشەنستانداعى سوعىسقا بايلانىستى فەدەرالدى ورتالىقتىڭ ساياساتىنا قارسى شىقتى», - دەلىنگەن حابارلامادا. رەسەي پرەزيدەنتى ۆلاديمير پۋتين بەلگىلى ساياساتكەردىڭ وتباسىنا قايعىرىپ كوڭىل ايتتى. ول بۇل وقيعانى «الدەكىمدەردىڭ قاساقانا جاساعان ارانداتۋشىلىعى» دەپ باعالادى. رەسەي پرەزيدەنتى بوريس نەمتسوۆتىڭ ولىمىنە بايلانىستى بارلىق ىزدەستىرۋ جۇمىستارىنىڭ ءوزىنىڭ باقىلاۋىندا بولاتىنىن مالىمدەدى. مۇرات ايتقوجا.