يۋنەسكو-نىڭ قامقورلىعىمەن وتەتىن اۋقىمدى حالىقارالىق فورۋم جوشى ۇلىسىنىڭ تاريحي مۇراسىن جانە ونىڭ ورتالىق ەۋرازيا كەڭىستىگىندەگى وركەنيەتتىك پروتسەستەردى قالىپتاستىرۋداعى ءرولىن جان-جاقتى ءتۇسىنۋ ءۇشىن جەتەكشى وتاندىق جانە شەتەلدىك عالىمداردى, ساراپشىلار مەن الىقارالىق عىلىمي قوعامداستىق وكىلدەرىن بىرىكتىردى.
سالتاناتتى راسىمدە يۋنەسكو باس ديرەكتورىنىڭ ورىنباسارىنىڭ مىندەتىن اتقارۋشى ەلۋندۋ اسسومو لازار ءسوز سويلەپ, التىن وردانىڭ مادەنيەتارالىق ءوزارا ءىس-قيمىلدىڭ بىرەگەي كەڭىستىگى رەتىندەگى تاريحي ماڭىزدىلىعىن اتاپ ءوتتى.
«التىن وردا بۇل قۇندىلىقتاردىڭ ماڭىزدى كورىنىسى بولىپ سانالادى. بۇل دالا قوزعالىستىڭ, الماسۋدىڭ جانە ءوزارا بايلانىستىڭ سەرپىندى ورتالىعى بولعان ەۋرازيانىڭ كەڭ تاريحىن كورسەتەدى. بۇل ەرەكشە ارتۇرلىلىكتىڭ ساياسي جانە مادەني كەڭىستىگى بولدى. وندا دىندەر, تىلدەر, كوركەمدىك فورمالار مەن تەحنولوگيالار ءبىر-بىرىمەن استاسىپ, ءوزارا اسەر ەتتى. ول بۇگىنگى كۇنگە دەيىن مادەنيەتارالىق ديالوگ پەن مادەني ارتۇرلىلىكتىڭ سەنىمدى تاريحي مودەلى بولىپ قالا بەرەدى», - دەيدى ەلۋندۋ لازار.
فورۋمعا قاتىسۋشىلار تاريحتى زەرتتەۋ تەك وتكەندى ەستە ساقتاۋعا عانا ەمەس, سونىمەن قاتار زاماناۋي پروتسەستەر تۋرالى تەرەڭىرەك تۇسىنىك قالىپتاستىرۋعا جانە تۇراقتى بولاشاقتى قۇرۋعا باعىتتالعانىن اتاپ ءوتتى. سەنىمسىزدىكتىڭ وسۋىنە جانە ءبولىنۋ تەندەنتسيالارىنىڭ كۇشەيۋىنە بايلانىستى جاھاندىق سىن-قاتەرلەر جاعدايىندا التىن وردا مەن جىبەك جولىنىڭ تاريحى ءوزارا ارەكەتتەسۋى, ءوزارا الماسۋى جانە اشىقتىق ارقىلى مادەنيەتتەردىڭ نىعايۋىنىڭ ايقىن مىسالى بولىپ وتىر.
«سيمپوزيۋم يۋنەسكو-نىڭ نەگىزگى مانداتىمەن تىكەلەي بايلانىستى. وتىز جىلدان استام ۋاقىت بويى يۋنەسكو-نىڭ جىبەك جولى باعدارلاماسى, جىبەك جولى تەك ساۋدا جولدارىنىڭ جەلىسى عانا ەمەس, مادەني ءوزارا ارەكەتتەسۋ مەن الماسۋدىڭ جارقىن كەڭىستىگى بولعانىن كورسەتەدى. ونىڭ ماڭىزدى توراپتارىنىڭ اراسىندا قازىرگى قازاقستان مەن كورشى مەملەكەتتەردىڭ اۋماقتارى بولعاندىعى نازار اۋدارتادى», - دەپ اتاپ ءوتتى ەلۋندۋ لازار.
حالىقارالىق سيمپوزيۋمدى وتكىزۋ عىلىمي ىنتىماقتاستىقتى نىعايتۋ, پانارالىق زەرتتەۋلەردى دامىتۋ جانە ۇلى دالانىڭ تاريحي-مادەني مۇراسىن حالىقارالىق دەڭگەيدە ىلگەرىلەتۋ ءۇشىن ماڭىزدى الاڭعا اينالدى.
