ەل تىلەگىن  ەسكەرىڭىز, ەلباسى!

قازاقستان حالقى اس­سام­ب­لەياسىنىڭ كەڭەسى باستاپ, بۇكىل حالىق قوستاپ, پارلامەنتتىڭ قوس پالاتاسى, ۇكىمەت قولداپ,  كونس­تيتۋتسيالىق كەڭەس راستاپ, وسى­دان ەكى كۇن بۇرىن مەملە­كەت باسشىسىنىڭ قازاقستان حال­قىنا ۇندەۋ ارناۋىمەن, «قازاقستان رەسپۋبليكاسى پرە­زي­دەنتىنىڭ كەزەكتەن تىس ساي­لاۋىن تاعايىنداۋ تۋرالى» جارلىققا قول قويۋىمەن تيا­ناقتالعان تاعدىرلى, تاريحي شەشىم بارشا جۇرتتىڭ كوڭى­لىنەن شىعىپ وتىر. ونى «ەگە­مەن قازاقستاننىڭ» اۋەلدە وي­لاستىرىلعان ەكى بەتىنە سىيماي, ءتورت بەتىن تولتىرىپ كەتكەن قۋانىشتى قولداۋ سوزدەرى جاريالانعان كەشەگى ءنومىرى دە ايعاقتايدى. ارينە, حالىق كەزەكتەن تىس پرە­زيدەنتتىك سايلاۋدى ءوت­كى­زۋ جونىندەگى باستامانى قول­دا­عاندا ايتەۋىر بيىل سايلاۋ­دى اتقارىپ الايىق, كەلەسى جىل­عى پارلامەنتتىك سايلاۋمەن قا­باتتاسپاسىن, كونستيتۋتسيانىڭ تالابى بۇلجىتپاي ساقتالسىن دەپ قانا وتىرعان جوق. حالىق بۇل باستامانى قولداعاندا ەڭ ال­دىمەن ەلدىڭ ەرتەڭىن ەرتە جارىقتا ايقىندايىق, ەل باس­قارۋدىڭ  ەكى تىزگىن, ءبىر شىل­بىرىن ەلىن سۇيگەن, ەلى ءسۇي­گەن ەرگە بەرەيىك, الەمدى بۋىپ تۇرعان ەكونوميكالىق قيىن­شىلىقتاردى ەلباسى­مىزدىڭ باسشىلىعىمەن بىرگە ەڭسەرەيىك دەپ وتىر. سونداي تۇستا ەلدىڭ پرەزيدەنت ءوز ۇندەۋىندە ايتقان «الداعى سايلاۋعا ءوزىمنىڭ قاتى­ساتىنىما وراي شەشىمدى مەن كەيىنىرەك, ەلىمىزدىڭ كونس­تي­تۋتسياسى مەن زاڭدارىنا تولىق سايكەس قابىلدايتىن بولامىن» دەگەن ۇستامدى سوزىنە ءۇمىت ار­تاتىنى دا انىق. ويتكەنى, ءبىز نۇرسۇلتان نازارباەۆتىڭ ەگە­مەندىكتىڭ ەلەڭ-الاڭىندا, تاۋەل­سىزدىكتىڭ ءتاڭسارى شاعىندا ايتقان «مەن ەلىمنىڭ جولىندا باسىمدى بايگەگە تىككەن اداممىن» دەگەن ءسوزىن ۇمىتپايمىز. ويتكەنى, ءبىز نۇرسۇلتان نازار­باەۆ­تىڭ بۇكىل ءومىرىن, بار ءبىلىمى مەن بىلىگىن, بار قابىلەتى مەن قاجىرىن حالقىنا, تەك حالقىنا, تاعى دا حالقىنا ارنايتىنىنا انىق سەنەمىز. ال ەلدىڭ ونداي ءۇمىتىن الدىمەن كىمدەر بىلدىرە الادى؟ كەڭەستىك كەزەڭنىڭ كورنەك­تى جازۋشىسى, ورىس كوركەمسوزىنىڭ زەرگەرى اندرەي پلاتونوۆتىڭ «قارت مەحانيك» دەگەن اڭگى­مە­سىندە ءبىر كەيىپكەر: «بەز مەنيا نارود نە پولنىي!» دەيتىن ەدى. قا­ناتتى سوزگە اينالىپ كەتكەن بۇل تىركەس ءار ادامنىڭ ازامات جانە تۇلعا رەتىندە ەل ومىرىندە وزىنشە الار ورنى بار ەكەنىن كورسەتەدى. سونىڭ وزىندە دە ەل ءسوزىن ۇستاعان, ەل ءۇشىن قالام ۇشتاعان ازاماتتارىمىزدىڭ – قالامگەرلەر قاۋىمىنىڭ مەملەكەتتىڭ تىنىس-ءتىرشى­لى­گىندەگى جولى بولەكشە. بۇل ءدال وسى كۇندەردە تاعى دا تاماشا تانىلىپ وتىر. كەشە الماتىدا, قازاقستان جازۋشىلار وداعىندا قالامگەرلەر قاۋىمى باس قوسىپ, الداعى سايلاۋعا تۇسۋگە ەل­باسىمىز نۇرسۇلتان ءابىش ۇلى نازارباەۆتىڭ كەلىسىم بەرۋىن سۇراعان مالىمدەمە جاسادى. استاناداعى بەلدى جازۋشىلار­دىڭ ءبىر توبى رەداكتسيامىزعا حابارلاسىپ, وسى ماسەلەگە وراي ءوز پىكىرلەرىن تارالىمى ەكى ءجۇز مىڭنان اساتىن ەل گازەتى ارقىلى جەتكىزۋدى سۇرادى. قالامگەرلەر قاۋىمىنىڭ لەبىزدەر توپتاماسىن «ەگەمەن قازاقستاننىڭ» بۇگىنگى نومىرىنە (2-ءشى بەتكە) جاريالاي وتىرىپ, وسىناۋ ورتاق وي بارشا جۇرتشىلىقتىڭ كوڭىلىنەن شىعاتىنىنا, بۇكىل حالىقتىڭ قولداۋىنا يە بولاتىنىنا نىق سەنىمىمىزدى بىلدىرەمىز. سونىمەن, ەلدىكتىڭ تاعى ءبىر سىن ساعاتى سوققالى تۇر. ەلى­مىز جاسامپازدىق جولىن جەمىستى جالعاستىرا بەر­سىن دەسەك, مەملەكەتىمىز ءبىز­دىڭ وزىمىزگە قاتىسى جوق سەبەپ­تەرمەن بەتپە-بەت كەلىپ وتىر­عان قيىندىقتاردى تابىس­تى ەڭسەرسىن دەسەك, ىشكى جانە سىرتقى ساياساتىمىزداعى سا­باق­تاستىق ءساتتى ساقتالسىن دەسەك, حالقىمىزدىڭ كوڭىل-كۇيى الداعى كەزدە دە الاڭسىز بولسىن دەسەك, ەرتەڭگى كۇنىنە سەنىمدى بولسىن دەسەك, ءبىز قازاقستاندى وسى جىلدار ىشىندە ءبىر اسۋدان ءبىر اسۋعا باستاپ كەلە جاتقان, تۋعان ەلىن الەم تانيتىن, ساناساتىن, قۇرمەتتەيتىن ەلگە اي­نالدىرعان ازاماتقا – نۇر­سۇلتان نازارباەۆقا حالىق اتىنان ۇسىنىس ايتۋعا, ءۇمىت ارتۋعا, ەلى ءۇشىن كەسىمدى شەشىم قابىلداۋىن سۇراۋعا ءتيىسپىز. ول شەشىم ەلباسىنىڭ وزىنەن دە بۇرىن ءوزى جانىنداي سۇيەتىن, سۋىعىنا توڭىپ, ىستىعىنا كۇيەتىن ەلى ءۇشىن كەرەك, ورتاق وتانىمىز – قازاقستاننىڭ بولاشاعى ءۇشىن كەرەك. قىسقاسى, ەلباسىنا تىلە­گى­مىزدى قازاقى قايىرىمعا سالىپ تۇيىندەسەك: جەلبىرەتۋگە ەل تۋىن, شىعىڭىز تاعى بەل بۋىپ! ساۋىتبەك ابدراحمانوۆ.