قوستانايداعى ءىرى زاۋىتتىڭ ۇجىمى ەلباسىعا ۇندەۋ جولدادى

قوستاناي. 27 اقپان. «اگروتەحماش» ءىرى اۋىل شارۋاشىلىعى زاۋىتىنىڭ ۇجىمى كەزەكتەن تىس سايلاۋ وتكىزۋدى قولداپ, جينالىس وتكىزدى. جيىن بارىسىندا زاۋىت قىزمەتكەرلەرى ەلباسىعا ءوز كانديداتۋراسىن ۇسىنۋدى ءوتىنىپ, ۇندەۋ جولدادى. بۇل تۋرالى alau.kz حابارلادى. «اگروتەحماش» جاۋاپكەرشىلىگى شەكتەۋلى سەرىكتەستىگى ەلىمىزدەگى اۋىل شارۋاشىلىعى تەحنيكالارىن جاساۋ كاسىپورنى. ودان بولەك, وبلىس وڭىرىندەگى بىردەن ءبىر ەسكى زاۋىت بولىپ سانالادى. ونىڭ ىرگەتاسى 1942 جىلى قالاندى. بۇگىندە زاۋىتتا 400-دەن اسا قىزمەتكەر ەڭبەك ەتەدى. ءوندىرىس ورنىندا ءارتۇرلى ونىمدەردىڭ 500 ءتۇرى دايىندالادى. وسىنىڭ بارلىعى ەڭبەك ۇجىمىنىڭ ماڭداي تەرىمەن جانە مەملەكەت قولداۋىمەن مۇمكىن بولىپ وتىر. سوندىقتان  زاۋىت ۇجىمى ەلىمىزدە كەزەكتەن تىس وتەتىن پرەزيدەنت سايلاۋىن قولدايدى. «ءبىزدىڭ لايىقتى كوشباسشىمىز بار, تىنىش, بەيبىت ءومىر سۇرەمىز. كۇندەلىكتى جۇمىسىمىز بار, ەڭبەكاقىمىزدى الامىز. وسىنىڭ بارلىعى ءۇشىن ءبىز ەلباسىمىزعا قارىزدارمىز. ءوز ەلىمىزگە لايىقتى كوشباسشىنى تاڭداۋ ءۇشىن سايلاۋعا بارامىز», – دەيدى زاۋىت جۇمىسشىسى ا.ۆاراپاەۆا. اتالعان مەكەمەنىڭ ۇجىمى ەلباسىنىڭ اتىنا حات جازىپ, الداعى سايلاۋعا قاتىسۋ ءۇشىن ءوز كانديداتۋراسىن ۇسىنۋدى سۇرادى. بۇل جونىندە زاۋىت ديرەكتورى ۆ.كۋتس: «ءبىز «نۇرلى جول» ەكونوميكالىق باعدارلاماسىن قولدايتىنىمىزدى مالىمدەيمىز. سونداي-اق, كەزەكتەن تىس سايلاۋدىڭ ءوتۋىن قولداي وتىرىپ, ءبىز ءوز تاڭداۋىمىزدى جاسادىق. سوعان بايلانىستى نۇرسۇلتان نازارباەۆتان ءوزىنىڭ كانديداتۋراسىن ۇسىنۋدى وتىنەمىز», دەدى. ءنازيرا جارىمبەتوۆا دەرەك, سۋرەت: alau.kz.