قازالىداعى «وركەن» قوجالىعىنىڭ ءىسى ورگە باسىپ كەلەدى

قىزىلوردا. 27 اقپان. قىزىلوردا وبلىسى قازالى اۋدانىندا ءوز كاسىبىن دوڭگەلەتىپ وتىرعان ازامات تۇرادى. بۇل تۋرالى egemen.kz ءتىلشىسى حابارلادى. اۋدانداعى قاراشەڭگەل اۋىلدىق وكرۋگىندەگى «وركەن» شارۋا قوجالىعىنىڭ باسشىسى وركەن وڭعاروۆ 2007 جىلى جەكە كاسىبىن باستادى. بۇگىندە بارلىق جەر كولەمى 200 گەكتاردى قۇرايتىن قوجالىقتىڭ نەگىزگى باعىتى ءىرى قارا مال شارۋاشىلىعىن دامىتۋ. وتكەن جىلى «سىباعا» باعدارلاماسى بويىنشا «قازاگرو» نەسيە كورپوراتسياسى ارقىلى 6 ملن. تەڭگە الىپ, ارال اۋدانى, اقباستى اۋىلىنان قازاقى اق باستى 2 بۇقا جانە اۋدان كولەمىنەن 32 باس انالىق سيىر الدى. قازىرگى كۇنى بۇل جۇمىستار ءوز ناتيجەسىن بەرۋدە. ايتا كەتەيىك, ول قازىرگى تاڭدا قۇمجيەك اۋىلدىق وكرۋگىندەگى №92 مەكتەپتە ءان-اۋەز پانىنەن ساباق بەرە ءجۇرىپ, مال شارۋاشىلىعىن دامىتۋعا ءوز ۇلەسىن قوسىپ كەلەدى. – الداعى ۋاقىتتا اۋىل ءومىرىن بۇدان دا جانداندىرىپ, جەرگىلىكتى ازاماتتاردى جۇمىسپەن قامتىسام دەگەن جوسپارلارىم بار, – دەيدى قوجالىق باسشىسى. ەلامان قوڭىر. دەرەك, سۋرەت: egemen.kz.