پەتروپاۆلدا «قازاقستاندا جاسالعان» اتتى اكتسيا ءوتتى

پەتروپاۆل. 27 اقپان. پەتروپاۆل قالالىق اكىمدىگىنىڭ ۇيىمداستىرۋىمەن جانە «ارديس» ازاماتتىق باستامالاردى دامىتۋ ورتالىعىنىڭ, «قازاقستان-2050» قوعامدىق قوزعالىسى اۋماقتىق فيليالىنىڭ قولداۋىمەن «قازاقستاندا جاسالعان» اتتى اكتسيا ءوتىپ, ول 43 ءىرى كاسىپورىننىڭ سۇيەمەلدەۋىنە يە بولدى. بۇل تۋرالى قالالىق اكىمدىكتىڭ ءباسپاسوز قىزمەتى حابارلادى. باستاماشىلدار تۇرعىندار مەن ساۋدا ورىندارىندا بولىپ, وتاندىق ونىمدەر مەن تاۋارلار شىعاراتىن جەرگىلىكتى ءوندىرىس ورىندارى جايلى جان-جاقتى اقپارات توپتاستىرىلعان ءتۇرلى-ءتۇستى بۋكلەتتەر تاراتتى. مەملەكەتتىك اۆتوينسپەكتسيا قىزمەتكەرلەرىمەن بىرلەسىپ, رەيدتەر جۇرگىزۋ بارىسىندا «جەرگىلىكتى ونىمدەردى كوپتەپ ساتىپ الىڭىزدار!» دەپ ءىرى ارىپتەرمەن ايشىقتى ەتىپ جازىلعان ستيكەرلەر جۇرگىزۋشىلەرگە ۇلەستىرىلدى. اۆتوتۇراقتاردا تۇرعان كولىكتەردىڭ اينەكشەلەرىنە جاپسىرىلدى. الەۋمەتتىك جەلىلەر ارقىلى «سولتۇستىك قازاقستاندا جاسالعان» كونكۋرسى ۇيىمداستىرىلىپ, ءتۇرلى ساۋالدار قويىلدى. ونىڭ جەڭىمپازدارى ناۋرىز مەرەكەسى قارساڭىندا جاريالانادى. «سقو ستۋدەنتتەر اليانسى» قوزعالىسىنىڭ وكىلدەرى «مير» كوشەسىندە ورنالاسقان گيپەرماركەتتە بولىپ, تۇتىنۋشىلار اراسىندا جەرگىلىكتى جانە شەتەلدىك ازىق-ت ۇلىك ونىمدەرى مەن تاۋارلاردىڭ ساپاسىنا قاتىستى ساۋالداما جۇرگىزدى. ونىڭ قورىتىندىسى بويىنشا وتاندىق ونىمدەرگە دەگەن سۇرانىستىڭ كوبەيىپ كەلە جاتقانى بايقالدى. باسقا دا ساۋدا ورىندارىن ارالاپ, «فرەگات», «سبي-اگرو», «لەونتەۆ», «كازمياسوپرودۋكت» سەكىلدى جەرگىلىكتى تاۋار وندىرۋشىلەردىڭ ونىمدەرىن الۋشىلار قاراسى مول ەكەنىن كوز جەتكىزدى. ويتكەنى, بىرىنشىدەن, قوسپاسى جوق, تازا, ەكىنشىدەن, باعا قولجەتىمدى. ءومىر ەسقالي. دەرەك: پەتروپاۆل قالالىق اكىمدىگىنىڭ ءباسپاسوز قىزمەتى. سۋرەت: bag.kz.