بۇنداي جارىس بۇرىن-سوڭدى قازاقستاندا بولماعان. بىلتىر «ەلىك ساي» دەمالىس ورنىنىڭ باسشىسى, ۇلتتىق ونەرىمىزدىڭ جاناشىرى, سپورت ساڭلاعى ايبەك قۇدەنوۆتىڭ باستاماسىمەن اتالعان ءتۋرنيردىڭ تۇساۋى كەسىلدى. وسى ءدۇبىرلى دودانىڭ جوعارى دەڭگەيدە وتۋىنە «مەرگەندەر ورداسى» ءداستۇرلى ساداق اتۋ فەدەراتسياسىنىڭ پرەزيدەنتى مۇحتارحان اباعان, جامبىل اۋدانىنىڭ اكىمى نۇرلان ەرتاس جانە تاعى دا باسقا ازاماتتار بارىنشا ۇلەس قوسىپ, قولداۋ كورسەتتى. جارىسقا وتاندىق سپورتشىلاردان بولەك, شەتەلدەن كەلگەن ساداقشىلار دا قاتىستى. اتاپ ايتقاندا, قىرعىزستان مەن رەسەيدەن قۇرالايدى كوزگە اتقان مەرگەندەرى ءوز شەبەرلىكتەرىن پاش ەتتى. باسەكەلەر 3D نىسانالار, «قالقان» جانە «پۋتا» نىسانالارى بويىنشا وتكىزىلدى.
«ەلىك ساي» ەتنواۋىلىندا ۇيىمداستىرىلعان جارىسقا بيىل قازاقستاننىڭ بىرقاتار ايماعى جانە وزبەكستان مەن قىرعىزستاننىڭ مەرگەندەر باق سىنادى. الماتى وبلىسى دەنە شىنىقتىرۋ جانە سپورت باسقارماسىنىڭ باسشىسى اقجۇرەك تاناتاروۆ اۋدان اكىمى نۇرلان ەرتاس, بوكستان وليمپيادا چەمپيونى ەرماحان ىبىرايىموۆ, ەركىن كۇرەستەن ازيا كۋبوگىنىڭ يەگەرى بەرىك دەڭگەلباەۆ جانە باسقا دا قۇرمەتتى سپورت قايراتكەرلەرى مەن ەل سپورتىنا ەلەۋلى ەڭبەك سىڭىرگەن ارداگەرلەر وسى جارىستى ارنايى كەلىپ تاماشالادى.
ايىم تىلەپبەرگەن: ءداستۇرلى ساداق اتۋ – دالدىك پەن بايسالدىلىق سپورتى
قاتىسۋشىلاردىڭ جالپى سانى 200 ادامعا جۋىقتادى. «پۋتا» نىساناسىندا ايەلدەر اراسىندا باتيحان ايكوركەم (استانا) التىننان القا تاقسا, ەرلەر سايىسىندا مۇرات لۇقپانوۆتىڭ (باتىس قازاقستان) مەرەيى ۇستەم بولدى. «قالقاندا» دا مۇرات مەرگەن الدىنا جان سالمادى. ەكىنشى التىندى باتىس قازاقستان وبلىسىنىڭ تاعى ءبىر وكىلى اسەمگۇل عالىمجانوۆا ولجالادى. اسەمگۇل «جامبىدا» دا جەڭىمپاز اتاندى. ەرلەر سايىسىندا جايىق جاعالاۋىنان كەلگەن ورازاي قايىرسالين وزدى. ءبىرىنشى ورىن العان مەرگەندەرگە 150 000 تەڭگەدەن تابىس ەتىلسە, ەكىنشى جانە ءۇشىنشى ورىندى ەنشىلەگەندەر 100 000 مەن 50 000 تەڭگەنىڭ سەترتيفيكاتىنا يە بولدى.
– ءداستۇرلى ساداق اتۋ – تەك سپورت قانا ەمەس, ول اتا-بابادان قالعان اسىل مۇرا, ۇلتتىق رۋحتىڭ ايناسى. وسىنداي جارىستار ارقىلى بۇل ونەر جاڭعىرىپ, جاس ۇرپاقتىڭ وتانسۇيگىشتىك پەن ۇلتتىق قۇندىلىقتارعا دەگەن قۇرمەتى ارتاتىنى ءسوزسىز. ءتۋرنيردىڭ باستى ماقساتى – ءداستۇرلى ساداق اتۋدى دامىتۋ, ونىڭ اياسىن كەڭەيتۋ, جاستاردى ۇلتتىق سپورتقا باۋلۋ جانە سالاۋاتتى ءومىر سالتىن ناسيحاتتاۋ. بۇل باعىتتا جۇيەلى جۇمىستار جۇرگىزىلىپ, ۇلتتىق سپورتتىڭ مارتەبەسىن كوتەرۋگە ەرەكشە كوڭىل ءبولىنىپ جاتىر, – دەيدى وسى شارانى ۇيىمداستىرۋشى ايبەك كەڭەسباي ۇلى.
توقسان ءسوزدىڭ توبىقتاي ءتۇيىنى, «ەلىك سايداعى» جارىس سپورتتىق باسەكە عانا ەمەس, ۇلتتىق قۇندىلىقتاردى دارىپتەۋدىڭ ماڭىزدى الاڭىنا اينالدى. وسى ساپار بارىسىندا قاتىسۋشىلار مەن كورەرمەندەر قازاقتىڭ ءداستۇرلى ساداق اتۋ مادەنيەتىمەن تەرەڭىرەك تانىسىپ, ونىڭ تاربيەلىك ءمانى مەن رۋحاني ماڭىزدىلىعىن تولىقتاي سەزىندى. الداعى ۋاقىتتا اتالعان جارىستىڭ جاعراپياسىن كەڭەيتىپ, بۇدان دا جوعارى دەڭگەيدە ۇيىمداستىرۋ كوزدەلىپ وتىر.
