قوستاناي. 17 تامىز. قوستانايعا جاپونيانىڭ قازاقستانداعى توتەنشە جانە وكىلەتتى ەلشىسى كاموحارا ماساەسي كەلدى. مارتەبەلى مەيمان ساپارىنىڭ باستى ماقساتى – «ءشوپ تامىرى» باعدارلاماسى جوباسىن اياقتاۋ بولىپتى. بۇل تۋرالى egemen.kz ءتىلشىسى حابارلادى.
«ءشوپ تامىرى» باعدارلاماسى بويىنشا وبلىستىق سپيد-ءتىڭ الدىن الۋ جانە كۇرەس ورتالىعى بيىل تەست جۇيەسىنىڭ 4 شىعارىلىمىمەن يممۋنوفەرمەنتيىك اناليزاتور قۇرالىن جانە ۋزي-سكانەر العان بولاتىن. ورتالىقتىڭ باس دارىگەرى جاننا تۇتەنوۆانىڭ ايتۋىنشا, يممۋندىق تاپشىلىققا قارسى تەكسەرىلۋ ءۇشىن, اسىرەسە, ەكىقابات ايەەلدەرگە كوپشىلىك كەزەك كۇتپەي-اق تىكەلەي سپيد ورتالىققا كەلىپ, تەكسەرىلۋگە بولادى. ال ۋزي-سكانەر قازقستاننىڭ سولتۇستىك وڭىرىندە تەك قوستانايدا عانا بار.
وبلىس اكىمى نۇرالى سادۋاقاسوۆ ەلشىمەن بىرگە جاڭا جابدىقتى قارادى. يممۋندىق اناليزاتورودىڭ جاڭا ۇرپاعى ادامنىڭ يممۋنتاپشىلىق اۋرۋىن جۇققىزعانىن بۇرىنعىداي ءۇش ايدان اسا ۋاقىتتا ەمەس, بار-جوعى 5 كۇندە انىقتاپ بەرەدى. جاپون ەلىنىڭ «ءشوپ تامىرى» باعدارلاماسى الەمنىڭ 141 ەلىندە جۇمىس ىستەيدى. قازاقستانعا كەلگەنىنە 18 جىل بولدى. وسى جىلدار ىشىندە 5 ميلليون دوللار تۇراتىن 75 جوبا جۇزەگە اسىرىلعان. الايدا سونىڭ 4 جوباسى عانا قوستانايعا تيەسىلى بولىپتى.
ءنازيرا جارىمبەتوۆا.
دەرەك, سۋرەت: egemen.kz
