«بارشاڭىزعا بەلگىلى, قىرعىزستاننىڭ قورداعى قىزمەتى توقتاپ تۇر. بۇل – قىرعىز مەملەكەتىنىڭ ءوز ەركى. قازاقستان وعان قۇرمەتپەن قارايدى. بۇل رەتتە قازاقستان ۆەدومستۆولار اراسىنداعى جۇمىس دەڭگەيىندە قىرعىزستانمەن بايلانىستىڭ دامۋىن جوعارى باعالايدى جانە قارىم-قاتىناستى ودان ءارى جانداندىرۋعا دايىن. ورتالىق ازيانىڭ ورنىقتى دامۋى ءۇشىن قىرعىزستاننىڭ تاجىريبەسى وتە ماڭىزدى. سوندىقتان ەلىمىز قىرعىزستاننىڭ حالىقارالىق ارالدى قۇتقارۋ قورىنداعى قىزمەتىن ەرتەلى-كەش جاڭعىرتادى دەپ ەسەپتەيدى. ءبىز بۇعان تەك قۋانار ەدىك. قوردىڭ ايماقتاعى ءرولىن نىعايتۋ ماقساتىندا كوپجاقتى ىقپالداستىقتىڭ ءتۇرلى فورماتىندا, سونىڭ ىشىندە كونسۋلتاتيۆتىك كەزدەسۋلەردىڭ كۇن تارتىبىندە سۋ ماسەلەسىن قاراستىرۋدى ۇسىنامىن», دەدى قاسىم-جومارت توقاەۆ.
بۇدان بولەك, پرەزيدەنت سۇرانىسقا يە جوبالاردىڭ قوسىمشا قورىن جاساقتاۋ ءۇشىن حالىقارالىق ۇيىمدارمەن, دونورلارمەن جانە قارجى ينستيتۋتتارىمەن بىرلەسكەن جۇمىستى كۇشەيتۋدىڭ ماڭىزىنا توقتالدى.
«بۇگىن وڭىرلىك ەكولوگيالىق ءسامميتتىڭ پلەنارلىق وتىرىسىندا بۇۇ-نىڭ مامانداندىرىلعان ينستيتۋتى رەتىندە حالىقارالىق سۋ ۇيىمىن قۇرۋ تۋرالى باستامانى قايتا كوتەردىم. مۇنداي قۇرىلىمدى جاساقتاۋ – ۋاقىت تالابى. بۇل باستامانى حالىقارالىق سۋ قوعامداستىعى دا قولداپ وتىر. اتالعان تەتىك ايماقتاعى سۋ قاۋىپسىزدىگىن ساقتاۋ ماسەلەسىندە الەمدىك قاۋىمداستىقتىڭ كۇش-جىگەرىن شوعىرلاندىرۋعا ىقپال ەتەدى. بۇۇ اياسىندا جۇمىس ىستەيتىن مۇنداي ينستيتۋت ەشبىر ەلگە, اسىرەسە, ورتالىق ازيا مەملەكەتتەرىنە زيانىن تيگىزبەيدى. سوندىقتان وسى باستاماعا قولداۋ كورسەتۋلەرىڭىزدى سۇرايمىن. ءتىپتى, ونى بىرىككەن ۇلتتار ۇيىمىنا ورتالىق ازيا ەلدەرىنىڭ ورتاق جوباسى رەتىندە ۇسىنۋعا بولادى. وسىلايشا, ورتالىق ازيانىڭ بىرقاتار مەملەكەتتەرىنىڭ استانالارىندا UN Water ۇيىمىنىڭ جەكەلەگەن سەگمەنتتەرىن اشۋعا مۇمكىندىك تۋادى. بۇدان بولەك, بۇۇ اياسىندا ارال سۋ جۇيەسىنىڭ, ءامۋداريا مەن سىرداريا وزەندەرىنىڭ حالىقارالىق كۇندەرىن بەكىتۋ تۋرالى بىرلەسىپ باستاما كوتەرگەن ءجون. سول ارقىلى ارالدىڭ سۋ ەكوجۇيەسىن ساقتاۋ ماسەلەسىنە الەم نازارىن اۋدارا الامىز. مەن ايتقان ۇسىنىستاردىڭ بارلىعى ءبىزدىڭ ورتاق مۇددەمىزگە ساي كەلەدى. بۇل – ساياسي پوپۋليزم ەمەس, ونىڭ ەشقانداي استارى دا جوق», دەدى مەملەكەت باسشىسى.
پرەزيدەنت ارالدى قۇتقارۋ قورىنىڭ ءوڭىر ءۇشىن ماڭىزىن اتاپ ءوتتى
ءسوز سوڭىندا قاسىم-جومارت توقاەۆ ارال تاعدىرى – ايماق ەلدەرىنە تونگەن زور ەكولوگيالىق قاۋىپ-قاتەر عانا ەمەس, ناقتى ناتيجەگە جەتۋ جولىنداعى ارەكەتتەردىڭ سىنالار شاعى ەكەنىن ايتتى.
«ايماقتىڭ تاعدىرى تەك قانا ءوز قولىمىزدا, سەنىمدى ديالوگ پەن ەلدەرىمىز اراسىنداعى تىعىز ىنتىماقتاستىققا تىكەلەي بايلانىستى. قۇرمەتتى ارىپتەستەر, پرەزيدەنتتەر, قادىرلى باۋىرلار, ءبارىڭىز سۋ ماسەلەسىنىڭ ماڭىزىن جاقسى تۇسىنەتىن ىقپالدى ءارى تاجىريبەلى ازاماتسىزدار. وڭىردە سۋ بولماسا, ورتالىق ازيا ەلدەرىنىڭ دە كۇنى قاراڭ. سۋ جاستارىمىزدىڭ تۇرمىسىن جاقسارتىپ, بولاشاعىن جارقىن ەتەدى. «سۋ – تىرشىلىك كوزى». بۇگىنگى سامميت حالىقارالىق ارالدى قۇتقارۋ قورىنىڭ قىزمەتىنە تىڭ سەرپىن بەرىپ, حالىقتارىمىزدىڭ يگىلىگى جولىنداعى وڭىرلىك ءوزارا ىقپالداستىقتىڭ جاڭا كەزەڭىنە اينالادى دەپ سەنەمىن», دەدى پرەزيدەنت.
