انە-مىنە دەگەنشە جاڭا وقۋ جىلى دا باستالىپ, بالا بىتكەن كەرەك-جاراعىن ارقالاپ مەكتەپتى بەتكە الادى. وسى ورايدا وقۋشىنىڭ جوعىن تۇگەندەيتىن «مەكتەپكە جول» اكتسياسىنىڭ باستالعانىنا دا ءبىرشاما ۋاقىت بولدى. سودان بەرى قاراعاندى وبلىسى بويىنشا جاقسى شارۋالاردىڭ باسى قايىرىلدى. سونداي شارانىڭ ءبىرى «مۇراگەر» مامانداندىرىلعان مەكتەپ-ينتەرناتىندا ءوتتى. مۇندا وبلىستىق ءبىلىم بەرۋ باسقارماسى مەن «نۇر وتان» پارتياسى وبلىستىق فيليالىنىڭ وكىلدەرى باس قوسىپ, قولى قىسقا وتباسىلارىنىڭ بالالارىنا وقۋ قۇرال-جابدىقتارىن تابىس ەتتى.
سونىمەن قاتار, «مۇراگەر» مەكتەبىندە «مەكتەپكە جول» اكتسياسىنىڭ باستى قاھارماندارى – الەۋمەتتىك جاعىنان از قامتىلعان وتباسىلاردىڭ بالالارى عانا ەمەس, ەستۋ قابىلەتى ناشار جانە اياق-قولدارى كەم بالالارعا دا قايىرىمدىلىق كومەكتەرى كورسەتىلدى. «بالالارعا ءبارىمىز كومەكتەسەيىك!» دەگەن ۇرانمەن وتكەن بۇل شارا بارىسىندا بالاقايلار وقۋ قۇرالدارى مەن سىزعىش, قالام, بوياۋ, قارىنداش سەكىلدى كەرەك-جاراققا دا قارىق بولدى, ءتۇرلى جۇمساق ويىنشىقتاردى دا سىيعا الدى. ەلىمىز بويىنشا 1 تامىزدان باستالعان «مەكتەپكە جول» اكتسياسى 30 قىركۇيەككە دەيىن جالعاسادى. بۇل يگى شارا جاڭا وقۋ جىلىنا ازىرلىك بارىسىندا بالالارعا ماتەريالدىق كومەك كورسەتۋ ماقساتىن كوزدەيدى. جالپى, اتالعان اكتسيانىڭ بەرەرى مول. قازىرگى تاڭدا بۇل كەزەڭ اياسىندا وتەتىن جاپپاي وقۋ بويىنشا ايلىقتار, «ەڭبەكپەن قامتۋ» جانە «تۇنگى قالاداعى بالالار» رەيدتەرى, كومەك قابىلداۋ بەكەتتەرىن اشۋ سىندى وڭدى شارالار داستۇرگە اينالىپ ۇلگەردى. بۇدان بولەك, كاسىپكەرلەردى قاتىستىرا وتىرىپ تومەنگى باعامەن كەڭسە تاۋارلارىن ساتۋ ءۇشىن مەكتەپ جانىنداعى جارمەڭكەلەردى ۇيىمداستىرۋ ءىسى دە كەڭىنەن ەتەك جايىپ كەلەدى. وبلىستىق ءبىلىم بەرۋ باسقارماسى جانىنان تۇرعىندارعا ارنالىپ جەدەل تەلەفون جەلىسى ۇيىمداستىرىلعان. سونىمەن قاتار, ءبىلىم باسقارماسىنىڭ سايتىندا «ءسىزدىڭ بالاڭىز مەكتەپكە دايىن با؟» اتتى اقپاراتتىق اكتسيا دا باستالدى. مۇنىڭ ءوزى ءبىزدىڭ ءوڭىر بالالارىنىڭ تاعى دا قانداي مۇقتاجدىقتارى بارلىعىن دەر كەزىندە ءبىلىپ وتىرۋعا مۇمكىندىك بەرەدى.
جالپى, جىل سايىن قاراعاندى وبلىسىنداعى وسى تاقىلەتتەس اكتسيالارعا اۋداندىق, قالالىق ءبىلىم بولىمدەرى, ۇكىمەتتىك ەمەس ۇيىمدار, قوعامدىق قورلار, كاسىپورىندار جانە جەكەلەگەن مەتسەناتتار كوپتەپ قاتىسادى. اسىرەسە, «مەكتەپكە جول» اكتسياسىنا اباي, جاڭاارقا, بۇقار جىراۋ, قارقارالى, نۇرا اۋداندارى مەن قاراعاندى, بالقاش, ساتباەۆ جانە تەمىرتاۋ قالالارى بەلسەندى تۇردە ات-سالىسادى. جوعارىدا اتالعان وڭىرلەردەگى پەداگوگتار مەن مەكتەپ اكىمشىلىكتەرى, اۋداندىق جانە قالالىق ءبىلىم بولىمدەرىنىڭ باسشىلارى اكتسياعا كوپتەگەن دەمەۋشىلەردى تارتىپ, سونىڭ ناتيجەسىندە مۇقتاجى كوپ ءبىرتالاي بالاعا كومەك قولىن سوزا الدى. «سوڭعى جىلدا اكتسيا اياسىندا 25 مىڭنان استام بالاعا كومەك بەرە الدىق. بيىل دا مەكتەپكە دايىندىق ماسەلەسىنە قوعام نازارىن اۋدارىپ, ءبىرتالاي شارۋانى تىندىرۋدى كوزدەپ وتىرمىز», – دەدى وبلىستىق ءبىلىم بەرۋ باسقارماسى باسشىسىنىڭ ورىنباسارى باقىتگۇل ادەكەنوۆا. «مەكتەپكە جول» اكتسياسىنان بولەك, بيىلعى جىلدىڭ تامىز ايىندا «بولاشاق» اكتسياسى دا باستاۋ العان. بۇل يگى باستاما ءماجىلىس دەپۋتاتتارىنىڭ مۇرىندىق بولۋىنىڭ ارقاسىندا ومىرگە كەلدى. اكتسيا اياسىندا ارنايى قامقورلىققا الىنعان بالالارعا ارنالعان ءبىلىم بەرۋ ەسەپشوتتارى اشىلعان. «نۇر وتان» پارتياسىنىڭ وبلىستىق فيليالى توراعاسىنىڭ ءبىرىنشى ورىنباسارى قاديشا وسپانوۆانىڭ ايتۋىنشا, اتالعان اكتسيا جىل سوڭىنا دەيىن جالعاسادى. سونداي-اق قاراعاندىلىق نۇروتاندىقتار «باقىتتى بالالىق» جوباسى اياسىندا دا بەلسەندى تۇردە جۇمىس ىستەيدى. ولار از قامتىلعان وتباسىلارىنان شىققان بالالاردى قوعامدىق جانە مادەني ومىرگە ارالاستىرىپ, جان-جاقتى كومەك پەن قولداۋ كورسەتەدى. اكتسياعا قاتىسىپ, قىسقا ءجىبى كۇرمەۋگە كەلمەيتىن وتباسىلاردىڭ بابالارىنا كومەك قولىن سوزۋ – ءاربىر ازاماتتىڭ جەكە شارۋاسى. كەيىنگى جىلدارى مۇنداي يگى شاراعا قاتىسۋعا نيەت ءبىلدىرگەندەردىڭ قاتارى مولايىپ كەلەدى. قۋانارلىق, قۇپتارلىق ءۇردىس.
قايرات ءابىلدينوۆ, «ەگەمەن قازاقستان».
قاراعاندى. –––––––––––––––– سۋرەتتى تۇسىرگەن دميتري كۋزميچەۆ.
