كورمەنىڭ ماقساتى – ادامزاتتىڭ عارىشقا العاش ۇشۋىنان باس-تاپ ەلىمىزدىڭ قازىرگى زامانعى عارىش سالاسىنىڭ قالىپتاسۋى مەن دامۋىنا دەيىنگى تاريحي ساباقتاستىقتى كورسەتۋ, سونداي-اق ەلىمىزدىڭ جەتىستىكتەرىندەگى ونىڭ ءرولىن ايقىنداۋ. سونىمەن بىرگە بۇل كورمە ەلىمىزدىڭ عارىش مۇراسىن ناسيحاتتاۋعا, سالانىڭ يننوۆاتسيالىق دامۋىنىڭ ۇلگىسى رەتىندە كوممەرتسيالىق عارىش ءتۋريزمىنىڭ 25 جىلدىعىن تانىتۋعا باعىتتالعان.
ءىس-شارانىڭ اشىلۋىندا پرەزيدەنتتىك ورتالىقتىڭ ديرەكتورى باقىتجان تەمىربولات كورمەنىڭ ماڭىزىنا ايرىقشا توقتالدى.
«بۇل كۇننىڭ ەلىمىز ءۇشىن ورنى بولەك. ويتكەنى ءدال وسى قازاق جەرىندە ادامزات وركەنيەتىنىڭ عارىش ءداۋىرى باستالدى. يۋري گاگاريننىڭ عارىشقا ۇشۋى عىلىمي-تەحنيكالىق پروگرەستىڭ ۇلى رامىزىنە اينالىپ, ادام مۇمكىندىگىنىڭ شەكسىزدىگىن تانىتتى. عارىش سالاسى ءۇشىن مەرەيتويلىق بۇل جىلدىڭ ەل تاۋەلسىزدىگىنىڭ 35 جىلدىعىمەن تۇسپا-تۇس كەلۋى دە تەرەڭ رامىزدىك مانگە يە. 1991 جىلى قازاقستان ەگەمەندىگىنىڭ رامىزدىك باستاۋى توقتار اۋباكىروۆتىڭ عارىشقا ۇشۋىمەن استاسىپ جاتىر. اتالعان تاريحي وقيعانىڭ 35 جىلدىعىمەن قاتار, ايتۋلى تۇلعانىڭ 80 جىلدىق مەرەيتويىن دا اتاپ وتەمىز. سونداي-اق بيىل تاعى ءبىر داڭقتى وتاندىق عارىشكەر تالعات مۇساباەۆتىڭ 75 جىلدىعى اتالىپ وتەر ەدى», دەدى ول.
كورمە ەكى بولىمنەن جاساقتالعان. وعان 30-عا جۋىق ەكسپونات پەن 60-تان استام ارحيۆ ماتەريالى ۇسىنىلدى. ءبىرىنشى «شەكسىز عارىشقا العاشقى قادام» دەگەن بولىمدە – يۋري گاگاريننىڭ العاشقى عارىشقا ۇشقان تاريحي ماڭىزى كورسەتىلىپ, ادامزاتتىڭ ونى يگەرۋىندەگى جاڭا ءداۋىردىڭ باستالعانى باياندالعان.
ال ەكىنشى ءبولىم «قازاقستان جانە عارىش» دەپ اتالدى. وندا ەلىمىزدەگى عارىش سالاسىنىڭ دامۋى تۋرالى ماتەريالدار قويىلدى. اسىرەسە وتاندىق عارىشكەرلەر توقتار اۋباكىروۆ, تالعات مۇساباەۆ پەن ايدىن ايىمبەتوۆتىڭ جەتىستىكتەرى كوپشىلىكتىڭ قىزىعۋشىلىعىن تۋعىزدى. سونداي-اق بۇل بولىمدە العاشقى عارىش ءتۋريسى دەننيس تيتو تۋرالى دا ايتىلادى.
ازامات قۇسايىن
