سان-كارلونىڭ العاشقى گاسترولى

جۇمىر جەردەگى ەڭ كونە دە اتاقتى سان-كارلو تەاترى قازاقستانعا العاش رەت گاسترولمەن كەلەدى. تەك ەكى كۇن – 5 جانە 6 شىلدەدە «استانا وپەرا» ساحناسىندا ادولف اداننىڭ «جيزەل» بالەتى الەمدىك دەڭگەيدەگى جۇلدىزدار – نورۆەگيا ۇلتتىق بالەتىنىڭ پريما بالەريناسى يولاندا كوررەانىڭ جانە پرەمەرى يوەل كاررەنونىڭ قاتىسۋىمەن وتەدى. جيزەل پارتياسىن ورىندايتىن پريما بالەرينا يولاندا كوررەا تاماشا تەحنيكاسىمەن ايگىلى, ونىڭ بيلەۋ مانەرىندە ءمىن جوق, وعان كەرەمەت ۇيلەسىمدىلىك – ساحنادا جارقىراپ, جەڭىل, اسەم ءارى سەنىمدى قيمىلداۋ, مۋزىكاعا دەگەن جوعارى قابىلەت ءتان. ونىڭ سەرىگى يوەل كاررەنو حانزادا البەرتتىڭ ءرولىن سومدايدى. كۋبالىق ءبيشى قايتالانباس دارا ارتىستىك قابىلەتىمەن جانە ساحناعا ساي تاماشا دەنە بىتىمىمەن سۇيسىندىرەدى. ول كۇردەلى قيمىلداردى اسقان شەبەرلىكپەن تازا ورىنداۋدى, بي قيمىلىن مانەرلى ادىسكە سالۋدى جەتىك مەڭگەرگەن. 60 ادامنان تۇراتىن نەاپوليتاندىق تەاتردىڭ بالەت ترۋپپاسى «جيزەل» بالەتىن كسرو حالىق ءارتىسى, مەملەكەتتىك سىي­لىق يەگەرى ليۋدميلا سەمەنياكانىڭ رەداك­تسياسىندا ۇسىنادى. ۇلكەن تەاتردىڭ پريماسى جيزەل پارتياسىن دۇنيەجۇزىندە ەڭ ۇزدىك ورىندايتىنداردىڭ ءبىرى بولعا­نىن ەسكە سالايىق. سيۋجەتكە, اڭىزعا اينال­عان قىزدار-ۆيلليسالار – تويعا دەيىن كوز جۇمعان, الدانعان قالىڭدىقتار نەگىز بولعان. ولار ءومىر باقي ورمان كەزىپ, تۇنگى جولاۋشىلاردى ەلىكتىرىپ, السىرەپ ولگەنشە بيگە شىر اينالدىرۋعا ءماجبۇر. «گۇلمەن ارلەنگەن نەكەقيار كويلەكتەرىن كيىپ... ايدىڭ جارىعىندا توقتاۋسىز بيلەيتىن ۆيلليسالار بيلەۋگە بەرىلگەن ۋاقىت اياقتالۋعا جاقىن قالعانىن سەزگەن سايىن قۇمارلانا ءارى جىلدامىراق بيلەي تۇسەدى, سوسىن ولار مۇزداي سۋىق مۇردەلەرىنە قايتا ورالادى...» (گ.گەينە).  جيزەل ەسىمدى اۋىل قىزى البەرتكە – شارۋا بولىپ كيىنگەن اقسۇيەككە عاشىق بولادى. جيزەل جىگىت تە ونى سۇيەتىنىنە بەرىك سەنىمدى. البەرتتىڭ قالىڭدىعى بار ەكە­نىنەن ول ءالى حابارسىز. كوپ ۇزاماي شىندىق اشىلادى. جيزەل قۇسادان كوز جۇمادى. و دۇنيەلىك بولسا دا, ول ءوزىن ساتىپ كەتكەن كۇيەۋجىگىتتى ءسۇيىپ وتەدى. ار-ۇياتى قيناعان البەرت ءتۇن ىشىندە ونىڭ قابىرىنە كەلگەندە, قىز ونى ۆيلليسالاردان قۇتقارادى. اتالعان گاسترول ءبىر جىل بۇرىن قول قويىلعان قوس تەاتردىڭ سەرىكتەستىك جونىندەگى مەموراندۋمى شەڭبەرىندە جۇزەگە اسقان العاشقى جوبا بولماق. سۋرەتتە: «جيزەلدەن» كورىنىس.