مەملەكەت باسشىسىنىڭ ايتۋىنشا, نەگىزگى جەتىستىك – ALEM (Astana Life Ex-situ Machine) يننوۆاتسيالىق مەديتسينالىق اپپاراتىن جاساۋ بولدى.
«ەڭ الدىمەن, بۇگىندە ۋنيۆەرسيتەتتەردىڭ تەحنولوگيالىق حابتارعا اينالىپ كەلە جاتقانىن اتاپ وتكەن ءجون. مىسالى, وتكەن جىلى University Medical Center جۇرەك ورتالىعىنىڭ دارىگەرلەرى بىرەگەي جاڭالىق – ALEM (Astana Life Ex-situ Machine) يننوۆاتسيالىق مەديتسينالىق اپپاراتىن ازىرلەدى. بۇل قۇرىلعىنى 2025 جىلدىڭ ەڭ ماڭىزدى عىلىمي جەتىستىگى دەپ تولىق ايتۋعا بولادى. اتالعان قۇرىلعى دونورلىق ورگاننىڭ ادام دەنەسىنەن تىس جەردە 24 ساعاتتان استام ۋاقىت بويى فۋنكتسيونالدىلىعىن ساقتاۋعا مۇمكىندىك بەرەدى. وسىنداي بىرەگەي جەتىستىكتەر قازاقستاندىق عىلىمنىڭ جوعارى الەۋەتىن كورسەتەدى», دەدى قاسىم-جومارت توقاەۆ.
دونورلىق اعزالاردى ساقتاۋعا ارنالعان تەحنولوگيا
ALEM (Astana Life Ex-situ Machine) قۇرىلعىسى دونورلىق اعزالاردى ساقتاۋ جانە تاسىمالداۋ ءۇشىن ارنالعان. جۇيە ولاردىڭ ومىرشەڭدىگىن 24 ساعاتتان استام ۋاقىت بويى ساقتاۋعا مۇمكىندىك بەرەدى.
ءداستۇرلى ادىسپەن سالىستىرعاندا, وندا اعزا تەك 4-6 ساعات قانا ساقتالسا, ALEM تابيعي جاعدايعا جاقىن ورتا قالىپتاستىرادى. قۇرىلعى تەمپەراتۋرانى باقىلاپ, قاندى وتتەگىمەن قانىقتىرادى جانە نەگىزگى كورسەتكىشتەردى ناقتى ۋاقىت رەجيمىندە قاداعالايدى.
