العاشىندا الماتىداعا ات باسىن تىرەگەن ولار «شاڭىراق» ىقشاماۋدانىداعى سپورتتاعى دارىندى بالالارعا ارنالعان مامانداندىرىلعان مەكتەپ-ينتەرنات, «الماتى ارەنا» جانە وليمپيادالىق دايارلاۋ ورتالىعىن ارالادى. ودان كەيىن استاناعا كەلدى. بۇل جەردە بىرقاتار ماڭىزدى كەزدەسۋلەر ءوتىپ, وتاندىق كۇرەستى دامىتۋعا باعىتتالعان ستراتەگيالىق باستامالار جۇزەگە اسىرىلدى. شەتەلدىك قوناقتار ەلوردامىزدا سالىنىپ جاتقان قازاقستان كۇرەس اكادەمياسىنىڭ جۇمىس بارىسىمەن تانىستى. اكادەميادا گرەك-ريم كۇرەسى, ەركىن كۇرەس جانە ايەلدەر كۇرەسىنەن بولەك, جاعاجاي كۇرەسىمەن شۇعىلداناتىن بالۋاندارىنىڭ دا ەش الاڭسىز جاتتىعۋىنا بارلىق جاعداي جاسالعان. الداعى ۋاقىتتا اكادەميا اياسىندا مەديتسينالىق جانە سپورتتىق-عىلىمي لابوراتوريالار اشۋ كوزدەلگەن.
مەيماندار جاقسىلىق ۇشكەمپىروۆ اتىنداعى جەكپە-جەك سارايى مەن «بارىس-ارەنانى» ارالادى. ءدال سول كەزدە استانادا قازاقستان كۇرەس فەدەراتسياسىنىڭ شتاب-پاتەرىنىڭ رەسمي اشىلۋ سالتاناتى ءوتتى. سالتاناتتى ءراسىم بارىسىندا لەنتا قيۋ قۇرمەتى ەركىن وقاسوۆ پەن نەناد لالوۆيچكە بۇيىردى. بۇل ەل كۇرەسىنىڭ جاڭا كەزەڭگە قادام باسقانىن ايشىقتايتىن تاريحي ساتتەردىڭ ءبىرى بولدى. ويتكەنى, جاڭا كەڭسە اكىمشىلىك ورتالىق قانا ەمەس, ول ۇلتتىق سپورتتىڭ رۋحىن دارىپتەيتىن ەرەكشە كەڭىستىك رەتىندە جاساقتالعان. سول جەردە قازاقستان كۇرەسىنىڭ جەڭىسپەن ورىلگەن باي ءداستۇرىن پاش ەتەتىن باي ارنايى داڭق زالى اشىلدى.
داڭق زالى – ەل نامىسىن الەمدىك ارەنادا اسقاقتاتقان ايگىلى بالۋاندارعا تاعزىم ەتەتىن رۋحاني وردا. مۇندا وليمپيادا جانە الەم چەمپيوناتتارىندا اتوي سالعان قازاق سپورتشىلارىنىڭ تاريحي جەتىستىكتەرىن بەينەلەيتىن بىرەگەي جادىگەرلەر قويىلدى. اتاپ ايتقاندا, چەمپيونداردىڭ مەدالدارى, بەلبەۋلەرى, جارىس فورمالارى, فوتوسۋرەتتەرى مەن جەكە ارحيۆتىك ماتەريالدارى كەلۋشىلەر نازارىنا ۇسىنىلدى.
وسى ساپاردىڭ نەگىزگى ناتيجەلەرىنىڭ ءبىرى – قازاقستاندا كۇرەسىن جۇيەلى تۇردە دامىتۋعا باعىتتالعان ماڭىزدى قۇجاتقا قول قويىلۋى. اتاپ ايتقاندا, قازاقستان كۇرەس اكادەمياسى United World Wrestling اياسىندا جۇمىس ىستەپ, الەمنىڭ ۇزدىك بالۋاندارىنىڭ ورتالىعىنا اينالادى.
«بۇل باستاما ەلىمىزدە جاس بالۋانداردى دايارلاۋ جۇيەسىن جاڭا دەڭگەيگە كوتەرىپ, حالىقارالىق ستاندارتتارعا سايكەس مامانداردى قالىپتاستىرۋعا ۇلكەن سەپتىگىن تيگىزۋگە اشۋى ءتيىس. سونىمەن قاتار, اكادەميا وتاندىق جانە شەتەلدىك تاجىريبەنى بىرىكتىرەتىن ءبىلىم بەرۋ جانە جاتتىعۋ ورتالىعىنا اينالىپ, بۇكىل الەم بالۋاندارى كوز تىگەتىن جۇيە قۇرىلادى دەپ سەنەمىز», دەدى ەركىن وقاسوۆ.
ال حالىقارالىق ۇيىم باسشىلارى ءوز كەزەگىندە قازاقستاننىڭ كۇرەس سپورتىن دامىتۋداعى باعىتتالعان قارقىنىنا جوعارى باعا بەرىپ, الداعى ۋاقىتتا ءوزارا ىنتىماقتاستىقتى ودان ءارى نىعايتۋعا دايىن ەكەندەرىن جەتكىزدى.
