اتىراۋداعى قۇرىلىس سالاسىندا كەمشىلىك جويىلعان جوق

اتىراۋ. 26 اقپان. اتىراۋ وبلىسىنىڭ اكىمى باقتىقوجا ىزمۇحامبەتوۆ قۇرىلىس سالاسىنداعى كەمشىلىكتەردىڭ ءالى دە جويىلماي وتىرعانىن مالىمدەدى. بۇل تۋرالى egemen.kz. ءتىلشىسى حابارلادى. اكىمنىڭ ءمالىم ەتۋىنشە, قۇرىلىس سالاسىنداعى كەمشىلىكتەر اتىراۋ قالاسىندا دا, اۋدانداردا دا كەزدەسەدى. «كوپ ۇيلەر ۋاقىتىندا تاپسىرىلمادى. قۇرمانعازى, يندەر, قىزىلقوعا اۋداندارى ەكى ايدا سالىپ تاستايتىن ءۇش بولمەلى, ءبىر قاباتتى ۇيلەردى ەكى جىلدان بەرى ءالى تاپسىرعان جوق. 60 پاتەرلى 9 ءۇي دە اۋدانداردا بىلتىر بەرىلۋگە ءتيىس ەدى. ينجەنەرلىك-كوممۋنيكاتسيالىق جەلى مەن ءۇي قۇرىلىسى جوسپارىندا سايكەسسىزدىك بار. بۇل جەردە كەيبىر قۇرىلىس كومپانيالارى مەن جوبالاۋشىلاردىڭ دا جاۋاپسىزدىعىن اقتاپ الا المايمىز», دەپ اتىراۋ وبلىسىنىڭ اكىمى باقتىقوجا ىزمۇحامبەتوۆ جۇرتشىلىقپەن كەزدەسۋدە ماسەلەنى توتەسىنەن قويدى. سونىمەن بىرگە, اتىراۋ قالاسىنداعى حالىقارالىق اۋەجاي ماڭىنان جەكە تۇرعىن ءۇي قۇرىلىسىن جۇرگىزۋگە 90 جەر تەلىمى بەرىلگەنىنە دە توقتالدى. جەر تەلىمى نەگە ۇشاقتار ۇشىپ-قوناتىن اۋماققا تاياۋ ماڭنان بەرىلگەنى ازىرگە تۇسىندىرىلمەي وتىر. بىراق, جەر تەلىمىن العاندار اراسىنان 40 ادام قۇرىلىس جۇمىستارىن باستاپ جىبەرگەن. اكىمنىڭ پىكىرىنشە, ەندى بۇلاردىڭ بارلىعىنا قالانىڭ باسقا اۋدانىنان جەر تەلىمى, ال تۇرعىن ءۇي قۇرىلىسى جۇمىستارىن جۇرگىزگەندەرگە وتەماقى بەرىلۋى قاجەت. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.