- مىسىردىڭ استاناسى كايردە سپورتتىق گيمناستيكادان الەم كۋبوگىنىڭ ءتورتىنشى كەزەڭى اياقتالدى. ىرىكتەۋ سىنىنىڭ قورىتىندىسى بويىنشا ناريمان قۇربانوۆ, زەينوللا ىدىرىسوۆ, التىنحان تەمىربەك فينالعا جولداما الدى. العاشقى ەكەۋى «اتتا», سوڭعىسى ەركىن جاتتىعۋدا ونەر كورسەتتى. ناتيجەسىندە, زەينوللا كۇمىس السا, ناريمان قولا مەدالدى ەنشىلەدى. التىنحان التىنشى ورىندا قالىپ قويدى.
- اۋستريا كۋبوگىندە ەلىمىزدىڭ ۇستەل تەننيسشىلەرى تابىستى ونەر كورسەتتى. «شتوككەراۋ» كلۋبى ساپىندا ايدوس كەنجەعۇلوۆ جارىس جەڭىمپازى اتانسا, ونىڭ ءىنىسى داستان «بادەن» كلۋبىنىڭ قۇرامىندا قولا جۇلدەگە يە بولدى.
- وتكەن اپتانىڭ اياعىندا ەلىمىزدىڭ ءۇش بىردەي كاسىپقوي بوكسشىسى تايلاندتىڭ باس شاھارى بانگكوكتا وزدەرىنىڭ كەزەكتى جەكپە-جەكتەرىن وتكىزدى. جارتىلاي ورتا سالماقتاعى رۋسلان ماديەۆ فرانتسيالىق فلوران دەرۆيدى ايقىن باسىمدىقپەن جەڭىپ, WBA Asia نۇسقاسى بويىنشا چەمپيوندىق اتاعىن ساقتاپ قالدى. ارمات ارمان ۇلى تۇركيالىق كەنان گيۋزەلدى ۇرىپ جىقتى. بۇل باسەكەنىڭ ەكەۋى دە جەتىنشى راۋندتا اياقتالدى. ال ءساماتالى تولتاەۆقا ۆەتنامدىق حونگ كۋان ءديندى ويسىراتا ۇتۋ ءۇشىن التى راۋند جەتكىلىكتى بولدى.
- وسىعان دەيىن ۇندىستانداعى تەننيسشىلەر تۋرنيرىندە ەكى رەت باس جۇلدەنى ولجالاعان جىبەك قۇلامباەۆا كۇنى كەشە ءۇشىنشى تيتۋلىنا قول جەتكىزدى. ەكاتەرينا ياشينامەن جۇپ قۇرعان قازاق قىزى ITF W15 دوداسىنىڭ جەڭىمپازى اتاندى. فينالدا ولار الەكساندرا كۋپارەۆ (گەرمانيا) پەن سەۆيل يۋلداشەۆانى (وزبەكستان) 6:1, 6:4 ەسەبىمەن ەڭسەردى.
- بالي ارالدارىندا (يندونەزيا) ازيانىڭ بادمينتون فەدەراتسياسىنىڭ ەسەپ بەرۋ كونفەرەنتسياسى ءوتتى. جيىن بارىسىندا وتكەن جىلدىڭ ەڭ ۇزدىك سپورتشىلارى ماراپاتتتالدى. سولاردىڭ قاتارىندا وتانداستارىمىز دا بار. اتاپ ايتساق, دميتري پانارين «Asia Olympic Project» باعدارلاماسى بويىنشا تەڭدەسسىز دەپ تانىلسا, ۇلتتىق كوماندامىزدىڭ باس باپكەرى اسقار ورمانوۆ ەڭ تابىستى جاتتىقتىرۋشىلاردىڭ ءبىرى رەتىندە ارنايى سىيلىققا يە بولدى.
- فۋتبولدان ەلىمىزدىڭ پرەمەر-ليگاسىنىڭ 4-تۋرىندا كوپشىلىكتىڭ قىزىعۋشىلىعىن تۋدىرعان باستى باسەكە «قايرات» پەن «استانا» اراسىندا ءوتتى. بۇل ماتچتا بارلىق ماسەلە ءبىرىنشى تايمدا شەشىلدى. الماتىلىقتار قارسىلاستار قاقپاسىنا جاۋاپسىز ءتورت دوپ سوقتى – 4:0. گول اۆتورلارى – جورجينو (دۋبل), داستان ساتپاەۆ, الەكساندر مارتىنوۆيچ. ۇزىلىستەن كەيىن تابلوداعى ەسەپ وزگەرگەن جوق. وزگە ويىنداردىڭ ناتيجەلەرى مىناداي: «ەرتىس» – «التاي» 1:0, «ەلىماي» – «توبىل» 1:0, «قايسار» – «قىزىلجار» 0:0, «ورداباسى» – «اتىراۋ» 1:1, « ۇلىتاۋ» – «اقتوبە» 1:1, «كاسپي» – «جەتىسۋ» 0:1, «جەڭىس» – «وقجەتپەس» 1:1.
